AMOS 2 - KITABI HABARI MOPIOHE

Moab

¹ Eeya lotahuda, “Ulipu lo Moab mapoo̒-poo̒daata ilodusa, sababu uito Wau̒ tantu mamo hukuumani mai olimongolio. Timongolio helohina li Olongia Edom tamailate boito, wolo lomonggali kuubululio wau lohama tutuu-laloolio wau lomobu mao̒ lowali wahu.

² Sababu uito, Wau̒ mamolao tulu ode lipu lo Moab, wau momobu tunggula maahu bibii-ntengiyalo Keriot. Taulo Moab maamate tohuungo tolonggalo lo popaatea, tou̒ torompeti potingohulo, wau tingalao̒ lo polotuhua pilonguatio̒.

³ Takawa-kawasa to Moab wau ngoa̒amila tahidihima pantungo lo pamalentaalio mapatee-U̒ mate-mateelo mao̒.”

Yehuda

⁴ Eeya lotahuda, “Taulo Yehuda mapoo̒-poo̒daata ilodusa, sababu uito Wau̒ tantu mamo hukuumani mai olimongolio. Timongolio helo lambanga papaa-lentaa-U̒ wau diila lomandungi popoo-ngaajali-U̒. Timongoilo pilopo lapalo lo ila-ila wewo u hetuboo loluuhuru limongolio.

⁵ Sababu uito, Wau̒ mamolao tulu ode Yehuda wau momobu tunggula maahu bibii-ntengiyalo Yerusalemu.”

Hukuumani lo Allahu Taa̒ala ode Isirai̒lu

⁶ Eeya lotahuda, “Taulo Isirai̒lu mapoo̒-poo̒daata ilodusa, sababu uito Wau̒ tantu mamo hukuumani mai olimongolio. Taa motulidu hale tadiila udiila loo̒ powalingao̒ u bilulotalio, mapilotali limongolio lowali wato. Odito olo hepilohutu limongolio ode taa mosikini tadiila loo̒baayali bilolilio, eleponu bololi boito bo ngohalaga wapidu oa̒ato ngopanggalo.

⁷ Timongolio helodeehe taa hiluupuhe tadiila olootolo, wau lopohinggi taa mosikini. Tiyamo wau walao̒ helo uu̒ulauwa wolo wato taabua u tutuuwauwa tilinggula lopokootolo tanggulu-U̒ u mantali.

⁸ To timii̒du tambati potabiyalo, tau-tauwalo hituluhe wolo boo̒ u hilama lomongolio odelo pongaku tobiloli lotaa himosikinia. To Bele lo Allahu Taa̒ala limongolio, timongolio helongilu angguru u hilama limongolio lonto taa u obiloli toli mongolio.

⁹ Eleponu odito, wuu umati-U̒, duo̒lo olimongolilo Wau̒ mopobinasa mai taulo Amori tahi langgata debo odelo bungo lowoohu wau motoheeto debo odelo bungo lo terpentin.

¹⁰ Timongoli madilelo-U̒ yilumualai lonto Masiri, wau dilelo-U̒ lolibaya huta ohungayo u luasi wau delita wopato pulu lotaunu mola hiheolio. Huta taulo Amori mailohi-U̒ mai olemu lowali lipumu lohihilao.

¹¹ Wau̒ malo lulaotao̒ dengolo lota lonto mongo walau̒mu lowali nabi, wau dengolo lota tahi mudaamu u lowali Najiri. Wolo uito diila otutu, wuu taulo Isirai̒lu? Wau̒, Eeya malo tahuda.

¹² Bo timongoli helongohi taulo Najiri minumani lo angguru, tilinggula helohutu olimongolio diila loe̒ela danti. Wau timongoli helodini mongonabi mopo tunggulao̒ tahulii-U̒.

¹³ Botia timongoli madehe-U̒ demola huta, tilinggula timongoli mopoi̒laalo suusa debo odelo kaleta u saarati deto-detohe pale.

¹⁴ Taa u tumeteo̒ u molonggahe olo diila tamoo̒ lopato; taa molotolo mao̒olia lo lotolio, wau taa molotolo boli buheli daa̒ diila tamoo̒ poa̒ahu batangalio lohihilao.

¹⁵ Tamoo-manawa diila tamoo̒ taahangi, taa u tumeteo̒ molinggahu diila tamoo̒ teteo̒ mopolahi batanga, wau tamootae̒ya wadala diila tamoo̒ lopato.

¹⁶ To dulahee boito pajule talaba-labaalo buheli olo mamololaa tingololio, lapatao̒ tumeteo̒. Wau̒ Eeya malo tahuda mai.”