AMOS 1 - KITABI HABARI MOPIOHE

¹ Tei Amos yito ngotaalio diiti lohimba lonto kota Tekoa. Tio lowali nabi tou̒ lipu lo Yehuda pilalenta li Olongia Ujia, wau Isirai̒lu pilalenta li Olongia Yerobeam, walao̒ talolai̒ lei Yoahas. Dulo taunu mola tou̒ diipo lotoduo mai liluhu, Allahu Taa̒ala lopoi̒laalo odelei Amos susuu-aliyaalo tomimbihu Isirai̒lu.

² Uti-utieelo uiloi̒ya lei Amos, “Eeya loheuwanga lonto huludu lo Sion, sualaa-Lio lohulaube lonto Yerusalemu. Huhuu-tawaalo luasi u pilobutua lo huo̒yoto lowali lohengu, huo̒yoto to Hui̒dee Karmel lohengu-hengulo mao̒.”

Hukuumani lo Allahu Taa̒ala ode lilii-puwaalo tiheede lo Isirai̒lu Siria

³ Eeya lotahuda, “Ulipu lo Damusiki mapoo̒-poo̒daata ilodusa, sababu uito Wau̒ tantu mamo hukuumani mai olimongolio. Timongolio helo pohutu taulo Gilead wolo palangi daa̒,

⁴ sababu uito Wau̒ mamolao tulu ode bele biluloa̒ saaha li Olongia Hajael, wau momobu tunggula maahu bibii-ntengiyalo li Olongia Benhadad.

⁵ Huhuu-hebuwaalo hulubangi lo Damusiki maa̒ntuluwo-U̒, wau ulipu lo Lumbaya Aweni maloopuwo-U̒ mobelesi monto tambati biluloa̒ limongolio. Takawa-kawasa to Bet-Eden mapolaahu-U̒ monto tambati huhuloa̒lio, wau ulipu lo Siria matawaloolo wau bintao̒lo ode lipu lo Kir.”

Pilistin

⁶ Eeya lotahuda, “Ulipu lo Gasa mapoo̒-poo̒daata ilodusa, sababu uito Wau̒ tantu mamo hukuumani mai olimongolio. Timongolio malo mintaa̒ bangusa tuwau ngoa̒amilalo, wau helo potali odelo wato ode taulo Edom.

⁷ Sababu uito Wau̒ mamolao tulu ode didii-ngingaalo meeseli lo Gasa, wau momobu tunggula maahu bibii-ntengilio.

⁸ Ulipu wau takawa-kawasa kota Asdod wau Askelon mainggilo-U̒. Kota Ekron mahukuu-maniyo-U̒, wau ngoa̒amila labito taulo Pilistin mapo binasaa-U̒.”

Tirus

⁹ Eeya lotahuda, “Ulipu lo Tirus mapoo̒-poo̒daata ilodusa, sababu uito Wau̒ tantu mamo hukuumani mai olimongolio. Timongolio malo mintaa̒ bangusa tuwau ngoa̒amilalo ode polayahu, wau lohudu ode Edom; timongolio malo lambanga danti lo polo sahaabati.

¹⁰ Sababu uito Wau̒ mamolao tulu ode didii-ngingaalo meeseli lo Tirus wau momobu tunggula maahu bibii-ntengilio.”

Edom

¹¹ Eeya lotahuda, “Ulipu lo Edom mapoo̒-poo̒daata ilodusa, sababu uito Wau̒ tantu mamo hukuumani mai olimongolio. Lou̒ diila odehu hilao, timongolio maloluhu taulo Isirai̒lu, mongo wutati mongolio. Timongolio tulusi moingo, wau debo hemoniyati.

¹² Sababu uito, Wau̒ mamolao tulu ode kota Teman, wau momobu tunggula maahu bibii-ntengiyalo Bojra.”

Amon

¹³ Eeya lotahuda, “Bangusa lo Amon mapoo̒-poo̒daata ilodusa, sababu uito Wau̒ mamo hukuumani mai olimongolio. Tou̒ lopaatea u lopoluasi lipulio, timongolio helo mutaa̒a ombongo lo mongobua tahi ombodaa̒wa to Gilead.

¹⁴ Sababu uito, Wau̒ mamolao tulu ode didii-ngingaalo meeseli kota lo Raba, wau momobu tunggula maahu bibii-ntengilio. Tou̒ boito maa odungohe tolonggalo lo polotuhua, wau popaatea wali-walihuhu debo odelo dutalo.

¹⁵ Ti olongia limongolio wau tahidihima pantungo lo pamalentaalio mabintao̒lio mota ode polayahu. Wau̒, Eeya malo tahuda mai.”