1 YAHYA 5 - KITABI HABARI MOPIOHE

Ohohaamanto todunia

¹ Taa u palacaya deu̒ ti Isa yito Olongia Tamoo-poa̒ahua tapilo dantia mai lo Allahu Taa̒ala, tau boito walao̒ Allahu Taa̒ala. Taa u motolia̒ngo ngotaalio lotiyamo, motolia̒ngo walai̒o olo.

² Wolo dalalo botieelo otawaanto mao̒ deu̒ ito motolia̒ngo mongo walao̒ Allahu Taa̒ala: Ito motolia̒ngo to Allahu Taa̒ala wau modungohe totoonulalo palenta-Lio.

³ Sababu, motolia̒ngo to Allahu Taa̒ala boliilio mao̒ modungohe totoonulalo palentaa-Lio. Wau totoonulalo palenta-Lio diila mobuheeto olanto.

⁴ Sababu timii̒du walao̒ Allahu Taa̒ala mambo mopoo̒laahe dunia u moleeta botie. Wau ito mopoo̒laahe dunia wolo iimaninto.

⁵ Tatoonu tamowali mopoo̒laahe dunia? Bo taa palacaya deu̒ ti Isa yito Walao̒ Allahu Taa̒ala.

Ososakusi pasali li Isa Almasi

⁶ Ti Isa Almasilo tamei dungga mai ode dunia wolo taluhu popolihu-Lio wau wolo duhu lo opopate-Lio. Tio meidungga mai diila bo wolo taluhu wambao̒, bo wolo taluhu wau duhu. Wau Rohullah lohihilao tamongohi sakusi deu̒ uito otutu, sababu Rohu diila pee̒enta mao̒ mohimbulo.

^7-8 Mohelu totolu sakusi: Rohullah, taluhu wau duhu – toto-totoolulo boito mongohi sakusi u tutuuwauwa.

⁹ Ito palacaya to ososakusi lomanusia, bo ososakusi lo Allahu Taa̒ala lebe motoheeto. Wau uitolo ososakusi u mailohi mai lo Allahu Taa̒ala pasali lo Wala-I̒o.

¹⁰ Sababu uito, taa palacaya to Walao̒ Allahu Taa̒ala, malo lolimo ososakusi boito todelomo hilaalio; bo taa diila momalacaya to Allahu Taa̒ala, malo nganggapu tutuuwauwa tutu sua̒liilio wolo Allahu Taa̒ala tamoo-himbuloa, sababu tio diila palacaya tou̒ wolo upilo tahuda mai lo Allahu Taa̒ala pasali lo Wala-I̒o.

¹¹ Uti-utieelo ososakusi boito: Allahu Taa̒ala malongohi mai olanto tutumulo u tutuulio tutu wau ohiheo-hiheolo mao̒, wau Wala-I̒o yito pilobutua mai lo tutumulo boito.

¹² Taa o Walao̒ Allahu Taa̒ala, o tutumulo boito; wau taa diila o Walao̒ Allahu Taa̒ala, diila o tutumulo boito.

Tutumulo u tutuulio tutu wau ohiheo-hiheolo mao̒

¹³ Watia loluladei olimongoli tapalacaya to Walao̒ Allahu Taa̒ala, alihu otaawa limongoli deu̒ timongoli mai̒lo tutumulo u tutuulio tutu wau ohiheo-hiheolo mao̒.

¹⁴ Wau ito buheli motaalua wolo Allahu Taa̒ala sababu ito yakini Tio modungohe dua̒anto, wonu ito mohile penu boli wolo u motuuu̒de wolo kahandaki-Lio.

¹⁵ Sababu otaawanto deu̒ Tio modungohe olanto wonu ito momolohone o-Lio, yi otaawanto olo deu̒ Tio mongohi mai olanto wolo u polohonento mola o-Lio.

¹⁶ Wonu oontonga mao̒ limongoli tala ngota lo timongota Nasara mohutu dusa udiila moo̒sababu tau boito oolia lo tutumulo u tutuulio tutu wau ohiheo-hiheolo mao̒, mamusi timongoli modua̒ mola ode Allahu Taa̒ala; wau Allahu Taa̒ala mamongohi mai tutumulo boito olio. Utie motuhatawa woli mongolio u dusalio diila moo̒sababu olimongolio oolia lo tutumulo boito. Bo woluo dusa umoo̒ sababu tau oolia lo tutumulo boito. Pasali losua̒li boito watia diila moloi̒ya mai deu̒ timongoli musi modua̒ mola ode Allahu Taa̒ala.

¹⁷ Ngoa̒amila huhutu u talatala yito dusa, bo woluo dusa udiila moo̒sababu tau oolia lo tutumulo u tutuulio tutu wau ohiheo-hiheolo mao̒ boito.

¹⁸ Otaawanto deu̒ ngoa̒amila tau tamalowali mongo walao̒ Allahu Taa̒ala, diila molo-laalaaita hipohutua dusa, sababu Walao̒ Allahu Taa̒ala moduo̒lai olio, wau Taa Moleeto diila mowali mohutu wolo-wolo to olio.

¹⁹ Otaawanto deu̒ ito haku lo Allahu Taa̒ala, eleponu ngoilanggubu dunia botie to walungo kawasa lo Taa Moleeto.

²⁰ Otaawanto deu̒ Walao̒ Allahu Taa̒ala malei dungga mai wau malongohi pongotota to olanto, alihu ito motota lo Allahu Taa̒ala tao̒tutu. Ito tumutumulo motituwau wolo Allahu Taa̒ala tao̒tutu, wau tumutumulo motituwau wolo Wala-I̒o Isa Almasi. Utieelo Allahu Taa̒ala tao̒tutu, wau utieelo tutumulo u tutuulio tutu wau ohiheo-hiheolo mao̒.

²¹ Mongo walau̒, powalahe mao̒ batanga limongoli monto totoonulalo balaahala! 13