1 YAHYA 3 - KITABI HABARI MOPIOHE

Mongo walao̒ Allahu Taa̒ala

¹ Bilohi mao̒ malo odito ponu lo Allahu Taa̒ala olanto, tilinggula ito ilaku-Lio odelo mongo wala-I̒o. Wau memangi ito yito mongo walao̒ Allahu Taa̒ala. Uitolo sababuulio dunia u moleeto botie diila motota olanto, sababu dunia diila motota lo Allahu Taa̒ala.

² Mongo wutato tao̒tolia̒ngo! Ito botia yito mongo walao̒ Allahu Taa̒ala, bo owowoluwonto de diipo mopatato. Bo otaawanto deu̒ wonu ti Almasi meidungga mai, ito mamowali debo odelo Tio, sababu mamoo̒onto o-Lio todelomo owowoluwoa-Lio u otutuulio mao̒.

³ Ngoa̒amila tau u ohalapani utie toli Almasi, modaha batangalio alihu otu-otutuulo mao̒ mantali, belesi monto dusa odelo woloolo mola ti Almasi mantali olo.

⁴ Taa u mohutu dusa, molambanga butoo̒ Allahu Taa̒ala; sababu dusa yito totala tobutoo̒ Allahu Taa̒ala.

⁵ Otaawa limongoli deu̒ ti Almasi meidungga mai moluluta dusa lomanusia, wau deu̒ diaaluo dusa todelomo batanga-Lio.

⁶ Ngoa̒amila tau tatumu-tumulo motituwau woli Almasi, diila mololaalaaita mohutu dusa. Taa u mohutu dusa mololaalaaita, diila pee̒enta mao̒ moo̒onto li Almasi meaalo mototaa-Lio.

⁷ Mongo walau̒, diila mao̒ polulia penu boli tatoonu tamopo lapalo olimongoli. Taa u mohutu kahandaki lo Allahu Taa̒ala yito walao̒ Allahu Taa̒ala debo odelo ti Almasi yito Walao̒ Allahu Taa̒ala.

⁸ Bo taa u mohutu dusa mololaalaaita yito walao̒ Ibilisi, sababu Ibilisi odusa tumulalo mai bohulio. Masababu uitolo Walao̒ Allahu Taa̒ala meidungga, deu̒ito-yito mai mongantulu kalaja lo Ibilisi.

⁹ Taa u malowali Walao̒ Allahu Taa̒ala, diila mololaalaaita mohutu dusa, sababu pii̒li lo Allahu Taa̒ala lohihilao woluo to olio. Wau sababu Allahu Taa̒ala boito ti Paapalio, yi tio diila mowali mololaalaaita mohutu dusa.

¹⁰ Utieelo hiheedio towolota lomongo walao̒ Allahu Taa̒ala wolo mongo walao̒ Ibilisi; titaalo tita diila mohutu kahandaki lo Allahu Taa̒ala, meaalo diila motolia̒ngo wutatio, yi tio diila walao̒ Allahu Taa̒ala.

Motolia̒nga ngota timongota

¹¹ Tumulalo mai bohulio mapilo tunggulio mai habari botie olimongoli; Ito musi motolia̒nga ngota timongota.

¹² Diila mao̒ potihutu ito debo odelo tei Kain, tamalowali walao̒ Ibilisi wau lomate wutatio lohihilao yila-yilateelo mao̒. Wolo sababuulio tei Kain lomate wutatio yila-yilateelo mao̒? Sababu susuu-aliyaalo u pilohutulio yito tilala, bo susuu-aliyaalo u pilohutu lowutatio boito otutu.

¹³ Sababu uito, mongo wutatuu̒, diila mao̒ polinggolabu wonu taulo dunia botie molonuo̒ olimongoli.

¹⁴ Otaawanto deu̒ ito mailumualo lonto opopate, wau lolimbata ode tutumulo. Otaawanto uito, sababu ito motolia̒ngo timongota lo wutatonto. Taa u diila motolia̒ngo, boliilio mao̒ donggo ilokawasa lo opopate.

¹⁵ Taa u molonuo̒ wutatio yito tamoomatea mate-mateelo mao̒, wau otaawa limongoli deu̒ ngotaalio lo tamoomatea mate-mateelo mao̒ diila otutumulo u otutuulio tutu wau ohiheo-hiheolo mao̒.

¹⁶ Wolo dalalo botieelo otaawanto dudelo lou̒ motolia̒ngo ngota timongota: Ti Almasi malohudu mai tutumu-Lio olanto. Sababu uito, ito olo musi mohudu tutumulonto ode mongo wutatonto!

¹⁷ Wonu ngotaalio talebe-lebe moo̒onto wutatio u ilodiaa̒a, bo diila mohuto motulungi wutatio boito, woloolo mola tau boito mowali moloi̒ya deu̒ tio motolia̒ngo Allahu Taa̒ala?

¹⁸ Mongo walau̒! Ito diila mao̒ potolia̒ngo bo totunggilo meaalo bo toloi̒ya wambao̒. Mamusi ito motolia̒ngo wolo tolia̒ngo u tutuulio tutu, u pobukutiolo wolo huhutuunto.

Obobuheli totalu lo Allahu Taa̒ala

¹⁹ Odieelo mola dudelolio ito motota deu̒ ito tuwo-tuwoto mongo walao̒ Allahu Taa̒ala tao̒tutu, wau hilaanto mowali moduo̒oto totalu lo Allahu Taa̒ala.

²⁰ Otaawanto, deu̒ wonu ito potaala lo hilaanto, pongotota lo Allahu Taa̒ala lebe udaa̒ wolo pongotota lo hilaanto, wau deu̒ otaawa-Lio totoonulalo u hitua-tuawua.

²¹ Oditolio, mongo wutatuu̒, tao̒tolia̒ngo, wonu hilaanto diila mopotala olanto, ito mowali motaalua lo Allahu Taa̒ala wolo obobuheli.

²² Wau wolo u pohilento monto o-Lio, mamo tapunto, sababu ito modungohe papaa-lentaa-Lio wau mohutu wolo umoo̒ sanangi hilaa-Lio.

²³ U pilomalenta-Lio mai to olanto yito: Ito musi palacaya to Wala-I̒o, deu̒ito-yito ti Isa Almasi, wau ito musi mototoo-lia̒nga, debo odelo umaa pilomalentai li Almasi to olanto.

²⁴ Ngoa̒amila taa u modungohe totoonulalo palenta lo Allahu Taa̒ala, tumumulo motituwau wolo Allahu Taa̒ala, wau Allahu Taa̒ala motituwau woli mongolio. Wau otaawanto deu̒ Allahu Taa̒ala tumutumulo lotituwau wolanto, sababu Tio malongohi mai Rohu-Lio to olanto.