1 YAHYA 2 - KITABI HABARI MOPIOHE

Ti Almasi tamoo-tulungia olanto

¹ Mongo walau̒! Watia moluladei utie ode limongoli alihu timongoli diila mao̒ mohutu dusa. Bo wonu woluo tamohutu dusa, yi ito o ngotaalio tamo poduulua, deu̒ito-yito ti Isa Almasi taa̒adili boito; Tio mamo molohone mola olanto totalu lo Allahu Taa̒ala.

² Lou̒ motimbulude li Isa Almasi boitolo duduu-saanto ilambungu-Lio. Wau diila bo duduu-saanto wambao̒, tumbao̒ dusa ngoilanggubu umati lomanusia olo.

³ Wonu ito modungohe papaa-lentawalo Allahu Taa̒ala, uito tuotio deu̒ ito motota lo Allahu Taa̒ala.

⁴ Taa umoloi̒ya deu̒, “Watia motota lo Allahu Taa̒ala,” bo diila modungohe to papaa-lentaa-Lio, tau boito mohimbuloa, wau Allahu Taa̒ala diaaluo todelomo hilaalio.

⁵ Bo taa u modungohe tahuda lo Allahu Taa̒ala, tau boito motolia̒ngo Allahu Taa̒ala lou̒ wimu-wimumuto tutu. Uitolo tuotio deu̒ ito tumutumulo motituwau wolo Allahu Taa̒ala.

⁶ Titaalo tita moloi̒ya deu̒ tio tumutumulo motituwau wolo Allahu Taa̒ala, tio musi tumumulo modudua̒ liyodu li Almasi.

Palenta u bohu

⁷ Mongo wutato tao̒tolia̒ngo! U tiluladei laatia botie diila odelo palenta u bohu. Utie palenta deedelo umapilo tunggulai olimongoli anggadu timongoli tumulalo mai palacaya li Almasi; uitolo habari monto Allahu Taa̒ala umaa ilodungohe limongoli tou̒ dipolulio mai.

⁸ Eleponu odito, palenta u tiluladei laatia botie bohu olo; sababu obanaliilio mowali oontonga tobatanga li Almasi wau tobatanga limongoli. Sababu u modio̒lomo helebe mooli wau tinelo u otutu malo tinelai.

⁹ Taa umoloi̒ya deu̒ tio woluo todelomo mobaango bo tau boito donggo molonuo̒ wutatio, tau boito donggo woluo todelomo u modio̒lomo dilumutu botia.

¹⁰ Taa u motolia̒ngo wutatio, tumutumulo todelomo mobaango tilinggula diaaluo penu boli hitua-tuawua to olio u mamoo̒ sababu taawewo modehu ode delomo dusa.

¹¹ Bo taa u molonuo̒ wutatio, woluo todelomo modio̒lomo. Tio monao̒ todelomo modio̒lomo, wau diila otaawalio ode utoonu ponao̒walio, sababu modio̒lomo boito mohutu olio diila mowali moo̒onto.

¹² Watia loluladei olimongoli, Mongo walao̒, sababu dusa limongoli maa ilambungu sababu ti Almasi.

¹³ Watia loluladei olimongoli, Mongo dulaa̒, sababu timongoli mototaa-Lio tamawoluo tumulalo mai bohulio daa̒. Watia loluladei olimongoli Taa himuudawa, sababu timongoli malo poo̒laaheo̒ Taa Moleeto.

¹⁴ Watia loluladei olimongoli Mongo walao̒, sababu timongoli motota lo Allahu Taa̒ala ti Paapa. Watia loluladei olimongoli, Mongo dulaa̒, sababu timongoli motota lo Tahuda umawoluo tumulalo mai bohulio daa̒. Watia loluladei olimongoli, taa himuudawa, sababu timongoli molotolo. Tahuda lo Allahu Taa̒ala woluo todelomo hilaa limongoli, wau maa ilolaaheo̒ limongoli Taa Moleeto.

¹⁵ Diila mao̒ potolia̒ngo dunia botie, meaalo penu boli wolo uwoluo todelomo dunia botie. Wonu timongoli motolia̒ngo dunia, timongoli diila motolia̒ngo Allahu Taa̒ala.

¹⁶ Totoonulalo hitua-tuawua uwoluo todelomo dunia botie – u otohilaa pii̒li lomanusia u odusa, u oontonga tulusi otohilao wau uhepo mangga-mangga – ngoa̒amilalo boito asalilio mai diila lonto Allahu Taa̒ala, bo lonto dunia.

¹⁷ Dunia wau totoonulalo hitua-tuawua todelomio u otohilaa lomanusia, mamooli. Bo tamodudua̒ u otohilaa lo Allahu Taa̒ala, debo tumutumulo dilumutu ohiheo-hiheolo mao̒.

Musu li Almasi

¹⁸ Mongo walau̒, pulito lojamani malembidei! Mapiloo̒taa olimongoli tou̒ dipolulio mai deu̒ Musu li Almasi mamei dungga mai; wau botia mailumeneto dadaata tau tahelo musu li Almasi. Uito tuotio deu̒ pulito lojamani malembidei.

¹⁹ Mumuu-suwaalo li Almasi boito yito tau-tauwalo tamaa lololaa mao̒ olanto, sababu timongolio otutuulio mao̒ memangi diila taunto. Wonu timongolio taunto, tantu timongolio debo pee̒-pee̒enta wolanto. Bo timongolio lololaa mao̒ olanto, alihu mopatatolo mai deu̒ diaaluo penu boli ngotaa mao̒ limongolio tatio̒otutua meituwoto to kaumunto.

²⁰ Bo timongoli malo lolimo Rohullah u tiluwatai̒ dadaata daa̒ li Isa Almasi wau uito sababuulio timongoli ngoa̒amilalo motota lo pongaajali u otutu.

²¹ Oditolio watia loluladei utie olimongoli diila kalana timongoli diila motota lo pongaajali u otutu; bo tumbao̒ sababu timongoli malotota mao̒, wau otaawa limongoli olo deu̒ diaaluo yimbulo todelomo pongaajali u otutu boito.

²² Tamohimbulo yito taa u moloi̒ya deu̒ ti Isa diila Olongia Tamoo-poa̒ahua tapilo danti mai lo Allahu Taa̒ala. Tau boito musu li Almasi; tio diila motolo akuo li Paapa meaalo to Walao̒.

²³ Taa diila motolo akuo to Walao̒, boliilio mao̒ diila mololimo li Paapa olo. Wau taa motolo akuo to Walao̒ boliilio mao̒ mololimo li Paapa olo.

²⁴ Sababu uito, habari umaa ilodungohe limongoli anggadu timongoli bohu-bohulio mai palacaya mamusi dahai limongoli tio̒otutua todelomo hilao. Wonu habari boito poo̒tuoto limongoli tio̒otutua, timongoli malaito tumumulo motituwau wolo Walao̒ wau woli Paapa.

²⁵ Wau utieelo upilo danti mai li Almasi lohihilao to olanto; tutumulo u tutuulio tutu wau ohiheo-hiheolo mao̒.

²⁶ Tiluladei laatia utie olimongoli tomimbihu tau-tauwalo tadonggo hipo tolopania mohimbulo olimongoli.

²⁷ Bo tomimbihu olimongoli lohihilao, ti Almasi malo luwatai dadaata daa̒ Rohu-Lio olimongoli. Wau ngotilonggadu Rohu-Lio woluo toli mongoli, diila palalu woluo taawewo mongaajali olimongoli. Sababu Rohu-Lio mongaajali olimongoli pasali lo totoonulalo u hitua-tuawua; wau wolo u pilo ngaajali-Lio boito otutu, diila bo yimbulo. Sababu uito, mamusi timongoli modungohe tou̒ wolo u pilo ngaajali mai lo Rohu boito, wau mamusi timongoli debo tumutumulo motituwau woli Almasi.

²⁸ Oditolio, mongo walau̒, poti tatapulo tumumulo motituwau woli Almasi, alihu de tou̒ Tio meidungga mai, ito motaalua wo-Lio wolo obobuheli u lealeaatu, wau diila motituuo̒ sababu moolito.

²⁹ Mai̒lotaawa limongoli deu̒ ti Almasi tilumumulo lodudua̒ u otohilaa lo Allahu Taa̒ala. Sababu uito musi otaawa mao̒ limongoli olo deu̒ timii̒du tatumumulo moduduo̒ otohilaa lo Allahu Taa̒ala yito walao̒ Allahu Taa̒ala.