1 YAHYA 1 - KITABI HABARI MOPIOHE

Tahuda tumutumulo

¹ Tuango tulade botie tomimbihu tahuda u mongohi tutumulo, deu̒ito-yito tahuda u mawoluo anggadu bohulio mai daa̒. Amiaatia maloo̒ dungoheo̒, wau maloo̒onto mao̒ uito wolo mato lamiaatia lohihilao. Amiaatia malo miloheo̒ wau malodihu mao̒ wolo uluu̒ lamiaatia.

² Tou̒ tutumulo boito piloi̒laalo mai, amiaatia loo̒onto mao̒. Uitolo sababuulio amiaatia mongohi mai ososakusi tomimbihu olio. Amiaatia mopohabari mai olimongoli pasali lo tutumulo u tutuulio tutu wau ohiheo-hiheolo mao̒, uwoluo pee̒-pee̒enta wolo Allahu Taa̒ala, wau u mapilo ilaalo mai olamiaatia.

³ Wolo umaa iloontonga wau ilodungohe lamiaatia, uitolo olo u pohabario mai lamiaatia olimongoli, alihu timongoli pee̒-pee̒enta wolamiaatia modudua̒ molaasa hitua-tuawua todelomo hilao to tutumulo motituwau woli Paapa wau wolo Wala-I̒o Isa Almasi.

⁴ Amiaatia loluladei utie alihu hilaanto tio̒otutua meengahe.

Allahu Taa̒ala yito mobaango

⁵ Uti-utieelo habari umaa ilodungohe lamiaatia lonto Wala-I̒o wau u potunggulo mai lamiaatia olimongoli: Allahu Taa̒ala boito mobaango, wau to Allahu Taa̒ala diaaluo u modio̒lomo sama-samaata.

⁶ Wonu ito moloi̒ya deu̒ ito tumutumulo motituwau wo-Lio, lebe-lebe pomao̒ ito tumutumulo todelomo u modio̒lomo, yi ito mohimbulo mopio wolo loi̒ya meaalo wolo huhutu.

⁷ Bo wonu ito tumutumulo todelomo mobaango odelo woloolo mola Allahu Taa̒ala woluo todelomo mobaango, yi ito tumutumulo moa̒aita tutu, mopiohe wau dame ngota timongota, wau duhu li Isa, Wala-I̒o, mopobelesi olanto monto ngoa̒amila dusa.

⁸ Wonu ito moloi̒ya deu̒ ito diila odusa ito mohimbulo batanganto lohihilao; wau Allahu Taa̒ala diaaluo todelomo hilaanto.

⁹ Bo wonu ito motolo akuo duduu-saanto to Allahu Taa̒ala, Tio mamoe̒elai danti-Lio wau mohutu wolo u aadili. Tio mamo ngambungu duduu-saanto wau mopobelesi olanto monto totoonulalo huhutuunto utilala.

¹⁰ Bo wonu ito moloi̒ya deu̒ ito diila odusa, ito o anggapu tutuuwauwa tutu sua̒liilio wolo Allahu Taa̒la tamoo-himbuloa wau ito diila molahu tahuda lo Allahu Taa̒ala todelomo hilaanto.