1 TIMOTIUS 3 - KITABI HABARI MOPIOHE

Tamoo-ngimatoa jamaa̒

¹ Otutu banari loi̒ya botie, “Taa mohuto mowali tamoo-ngimatoa jamaa̒, ilohilaa tuwaulio lokalaja ulaba-labaalo ohalaga.”

² Ngotaalio tamoo-ngimatoa jamaa̒ mamusi taa diila oa̒aibu, bo ngota dilelio bua, motota mongotongo batanga, molinepo, wau taratibu; tio ohilaa mololimo tau to belelio, wau mowali mongaajali tau;

³ diila tahe huwoa̒alo, meaalo tamohuto moloohulua. Bolii̒o mao̒, tio musi molumboyoto hilao wau mohuto lou̒ dame. Tio diila mowali bo momilohe doi.

⁴ Tio musi motota mongatulu dileaalio lou̒ mopiohe, wau mongaajali mongo walai̒o u modunghe wau mohulumati olio.

⁵ Sababu wonu taa diila motota mongatulu dileaalio lohihilao, woloolo mola tio mowali mongatulu jamaa̒ lo Allahu Taa̒ala?

⁶ Ngotaalio tamoo-ngimatoa jamaa̒ diila mowali taa u boheli lowali Nasara, sababu de tio mowali sombongi lapatao̒ odungga lolaa̒anati debo odelo Ibilisi muloololio mai.

⁷ Tio mamusi taa otilanggula mopiohe todelomo ulipu; sababu wonu diila odito, yi tio mahinaa lotau, tilinggula modehu to uluu̒ lo Ibilisi.

Tamoo mantua jamaa̒

⁸ Tamoo mantua jamaa̒ mamusi olo taa u mopiohe wau tuulusi; diila bo momilohe doi wau diila mohuto mongilu angguru laba-labaalo daata.

⁹ Timongolio musi motidihu motoheeto wolo hilaa u maloo̒tapu tinelo Eeya belesi to pongaajali opopalacaya lo Nasara u mapilo ilaalo mai lo Allahu Taa̒ala.

¹⁰ Patutilio timongolio tesiyopo meemulo wau wonu loi̒laalo timongolio diila oa̒aibu, deu̒ito timongolio mowali momantu todelomo jamaa̒.

¹¹ Dile limongolio taabua olo mamusi taa mopiohu, diila taa motohilaa mopo loladu loi̒ya udiila ohunalio. Musi otaawa mao̒ limongolio mongotongo batanga wau juujulu todelomo ngoa̒amila sua̒li.

¹² Tamoo mantua jamaa̒ musi bo odile taabua ngota. Musi otaawalio mongatulu mongo walai̒o wau dileaalio lou̒ mopiohu.

¹³ Tau-tauwalo tahi pomantua lou̒ mopiohu todelomo jamaa̒, mahulumatiolo wau mowali helebe buheli mobisala tomimbihu opopalacaya limongolio toli Almasi.

Hitua-tuawua u milakusudu hetuuo̒ lo agamaanto

¹⁴ Wau̒ mohalapu diilalo mohiheo wau̒ mamobiilohe wolemu. Eleponu odito, wau̒ moluladei olo tulade botie olemu,

¹⁵ alihu wonu wau̒ langgali mai, mai̒lo taawamu woloolo mola ito musi tumumulo, odelo ngaalaa̒ lo Allahu Taa̒ala, deu̒ito-yito jamaa̒ lo Allahu Taa̒ala tatumu-tumulo. Jamaa̒ botieelo tadebo odelo wolihi potihulo wau pobowo pongaajali u otutu monto Allahu Taa̒ala.

¹⁶ Diaaluo penu boli ngotaa mao̒ mowali momaahu, malo odito udaa̒alio hitua-tuawua u milakusudu hetuuo̒ lo agamaanto; Tio lopo bilohei batanga todelomo rupa lomanusia, wau piloi̒laalo otutu lo Rohullah, wau iloontonga lo mamaa-lai̒katiyalo. Habarilio pilopo toliyongo towolota lo babaa-ngusawalo, wau Tio pilalacaya to ngoilanggubu dunia wau bilinta-I̒o mola ode sologa.