1 TIMOTIUS 1 - KITABI HABARI MOPIOHE

^1-2 Timotius, walau̒uu̒ utuutu todelomo Eeya! Tulade botie lonto olau̒, Paulus, rasulu li Isa Almasi topoa̒hu lo Allahu Taa̒ala, Tamoo-poa̒ahua olanto wau topoa̒hu li Isa Almasi, halapaninto. Pohileaala dua̒ Allahu Taa̒ala ti Paapanto wau ti Isa Almasi Eeyanto mongohi mai balakati, odehu hilao wau salamati olemu.

Poe̒ela pasali lo pongaajali umoo̒ lapalo

³ Otohilaau̒ alihu yio̒ debo motibiluloa̒ to Epesus debo odelo u mailoi̒yau̒ mai olemu tou̒ wau̒ lonao̒ ode Makedonia. Sababu, to Epesus woluo dengolo lota tahi pololade pongaajali udiila otutu, wau yio̒ musi mopo huheli mao̒ olimongolio.

⁴ Polelea mao̒ olimongolio alihu timongolio diilalo mopoo̒ tuoto tou̒ totoo-mbiluwalo wau wuwuu-ngguliyalo asalilio mai udiila obunto-buntolio. Ngoa̒amilalo boito bo mopotoodei polohaamawa wambai̒o, wau diila mopolaia̒ lanjana lo Allahu Taa̒ala u bo otaawa motimbulude palacaya to o-Lio.

⁵ Patuju lo naseehatiu̒ boito yito alihu tau mowali motolo miliki hilaa ubelesi wau hilaa u maloo̒tapu tenelo Eeya u mantali, wau tio̒otutua palacaya to Eeya, wau lou̒ odito timongolio mowali motolia̒nga timongotalio.

⁶ Woluo ngotayadu tau madiilalo hitumula debo odelo uito, wau yilapalo todelomo polo hahaamawa hamawa udiila ohunalio.

⁷ Timongolio motohilaa mowali guguu-ruwaalo lo agama, lebe-lebe pomao̒ timongolio lohihilao diila paahamu tataa-heyaalo u hepilomake limongolio meaalo susuu-aliyaalo u tiloo̒owoli limongolio lou̒ odito yakini.

⁸ Otaawanto deu̒ butoo̒ lo agama yito mopiohe, wonu pohunaalo tou̒ patutilio.

⁹ Tantulo mao̒ musi eelaalo deu̒ butoo̒ boito pilohutu diila ode taa mopiohe, bo ode tahipo lambangawa butoo̒, tahileeta, taa loluusa, ode taa odusa, taa diila o agama, taa osiipati dunia, ode taa momate tiilo wau tiyamolio mate-mateelo mao̒, tabiasaalio tahi pomatea mate-mateelo mao̒,

¹⁰ ode tau-tauwalo tahi hulotowa, homoseki, tamootao̒wa, tamoo himbulowa, mongo sakusi yimbulo, wau boli tatoonu wambai̒o tahipo hutua susuu-aliyaalo u bubuu-lemenga wolo pongaajali u otutu.

¹¹ Pongaajali boito woluo todelomo Habari Mopiohe upolo loladio pilo malacayalio olaatia, deu̒ito-yito Habari Mopiohe monto Allahu Taa̒ala tau̒daa̒ wau paatuti pujiolo.

Pongolaasa sukuru sababu odehu hilaa lo Allahu Taa̒ala

¹² Watia molapali mola oduo̒lo odeli Isa Almasi Eeyanto. Tio malongohi mai lotolo olaatia u lomaya o-Lio, wau Tio longanggapu olaatia lotuuu̒de ode tuugasi boito,

¹³ eleponu omoo̒omolu watia helo pitana wau longalinaya wau lohina o-Lio. Bo Allahu Taa̒ala lomonu mai olaatia, sababu tou̒ boito watia diipo palacaya, oditolio diila otaawa laatia wolo umusi pohutuo laatia.

¹⁴ Wau tumbao̒ watia hiluntua daa̒ odehu hilaa lo Eeyanto. Tio longohi mai owalia laatia u palacaya o-Lio wau motolia̒ngo ngota timongota. Owalia boito yilohi-Lio olanto ngoa̒amila tamalo tituwau woli Isa Almasi.

¹⁵ Otutu banari loi̒ya botie – sababu uito paatuti tolimoolo wau palacayalo tio̒otutua –: “Ti Isa Almasi leidungga mai ode dunia botie u lopoa̒ahu taa odusa.” Wau watiaalo taa odusa wau tamoleeta daa̒.

¹⁶ Bo tumbao̒ masababu uitolo Allahu Taa̒ala lomonu mai olaatia, alihu ti Isa Almasi mowali mopo bilohei ngoa̒amila osabali-Lio olaatia, taa odusa daa̒ botie. Wau utie mowali tuwaulio obaaya ode ngoa̒amila tau u demaa palacaya to o-Lio wau moo̒tapu tutumulo tutu wau ohiheo-hiheolo mao̒.

¹⁷ Allahu Taa̒ala, Olongia lo totoonulalo jamani, paatuti hurumatiolo wau pujiolo laito, sababu Tiolo tao̒ hiheo-hiheolo mao̒, tadiila oontonga wau tatuwa-tuwaulo! Amin.

¹⁸ Timotius, walau̒uu̒! Tuugasi botie pomalacayau̒ mai olemu, u moe̒ela mola tahuli lo Allahu Taa̒ala upilo tunggulai lomongo nabi todelomo jamaa̒ tomimbihu batangamu. Mamusi tahuli boito mowali tomeu̒ olemu todelomo polo hipate u mopiohe.

¹⁹ Pohipatelo lou̒ motidihu to opopalacaya u otutu wau wolo hilaa u maloo̒tapu tinelo Eeya umantali. Woluo tau-tauwalo tadiila hipo mandungia suala lohilaa u maloo̒tapu tinelo Eeya olio, tunggula loa̒antulu lomao̒ opopalacaya limongolio.

²⁰ To wolotalio yito tei Himeneus wolei Aleksander. Taduulota boito mahi lukuumaniu̒ lou̒ lohudu olio ode Ibilisi, alihu timongolio mobalajali mao̒ u mohuheli momuayo Allahu Taa̒ala.