Yakobus 3 - O GIKIMOI AWI JAJI ma BUKU

To ona manga lade gena yojaga daloha

¹ Ai dodiao nipipiricaya, upa ngini nidadala gena niadupa nidadi o guru la o nyawa niadoto. Sababu ngini nianakoka done ma orasi o nyawa yangodu manga dorou ma sopo ma fanggali yamake o Gikimoino de nakoso ngone poguru la ngone de nanga dorouka gena, Una wonafanggali nanga dorou ma sopo foloisi datubuso.

² De ngone inangodu lo o sala idala paakaka. Duma o nyawa nakoso manga bicara ma rabaka o dorou moi lo ihiwa, de ona magena igogou maro o nyawa manga sininga dangodu itiai. Komagena lo nakoso manga bicara dangodu gena aku yapareta, de ona manga sininga dangodu lo aku yapareta.

³ So komagena to ngone nanga lade gena itimisi duma aku ipareta daputuru, maro o bobiliku ma ceceke moi duma o sapi ma ngunuka posipiliku la to ngone nanga dupa gena yamote, so o sapi ma rohe ilalamo gena aku lo papareta daloha.

⁴ Maro komagena lo o deru ilalamo moi ngaroko ma galema ma ceceke, duma o deru magena o rato dasosihilo de o moku-moku isipapaka lo ma galema magena aku yapareta, la imote o nyawa waaaho awi dupa kiaka wosikahika.

⁵ So komagena ngone nanga lade lo, ngaroko itimisi, duma ka o demo moi lo ma kuasa ilamo so ipareta daputuru. Maro idodooha lo o uku, ngaroko ma nonomaka daceke, duma kanaga o ponga ilalamo lo aku yatupu.

⁶ De lo maro o uku so ngone nanga lade lo aku o moi-moi yatupu. Sababu o Iblis una masirete asa nanga lade gena ma sigaro la pobicara datorou, so o nyawa la de manga lade manga sininga ma rabaka gena asa ifoloisi datorou. So o moi-moi manga sininga ma rabaka sidago lo o moi-moi dangodu yaaaka de yamamake manga oho ma rabaka gena, dangodu lo datorou.

⁷ Idodoma sidago lo o orasi manena o bi haiwani ilalago, de o bi namo isososo, de o bi haiwani itatase o dududuka de lo o bi moi-moi o teoka iooho gena moi-moi dangodu o nyawa aku yapalihara.

⁸ Duma o nyawa lo yaakuwa manga lade yapareta. Ngone nanga lade gena o dorou isibicara imatoguwa, komagena lo iholu ngone papareta. De lo o bicara datotorou gena iwedoka so o nyawa pasisangisara, maro o raci so o nyawa pasisone.

⁹ De to ngone nanga lade gena asa o Jou Una nanga Baba Awi ronga posilamo. De o nyawa lo Una wosidadika de manga jamani gena imatero de ka to Una, duma de to ngone nanga lade lo o nyawa manga ronga asa pogaka datorou.

¹⁰ So komagena lo to ngone nanga uru ka ngai moi, duma kanaga lo bai o ronga posilamo bai lo o ronga pogaka datorou. Ce! Magena itiaiwa. He! Ai dodiao nipipiricaya, o kia naga maro komagena, gena isala so bilasu paholu.

¹¹ Sababu o ake ma jobubu ngai moi nogenano yaakuwa o ake de o teo lo isupu.

¹² De lo o bole ma hutuno yaakuwa ma sopo o igo lo ioho, de lo o igo ma hutuno yaakuwa ma sopo o bole lo ioho. Komagena lo o sumu datotorou yaakuwa isupu o ake daloloha. Magena maro o goginano moi ngoneka, so ma orasi ngone posumbayang de o Gikimoi Awi ronga posilamo daboloka, de upa ngone gena asa o nyawa lo manga ronga paaka datorou.

O cawaro ma sihino o Gikimoino

¹³ Ai dodiao nipipiricaya, ngini kanaga nimuruo naga asa niacawaro daloha de lo nianako o loha moi-moi maro o kia la bilasu paaka de o dorou moi-moi maro o kia la upa paaka. So ngini bilasu o loha moi-moi niaaka de niasikelelo gena to ngini nia sininga damuudu o nyawaka so igogou ngini nicawaro.

¹⁴ Duma kanaga ngini nia sidongirabaka la nakoso o nyawa manga siningaka de o nyawa yalalago asa yaholu de yadoosa ifoloi, de manga dupa gena ma ngale ka ona masirete imasihie de foloisi imasilamo de o nyawa ma binuka, upa lo o nyawa ona magena yotemo, “Ngohi manena o nyawa tococawaro moi.” Nakoso manga bicara komagena, ona magena asa ka yokulai so yamotewa o dodoto itotiai.

¹⁵ So nako ngini la o moi-moi maro komagena niaaka, de o cawaro magegena upa nitemo isupu ma sihino o Gikimoino, duma magegena asa isupu ma sihino o nyawa manga sininga datotorouno de lo o tokano.

¹⁶ So ma orasi o nyawa la kanaga o nyawa yalalagoka yaholu de yatoosa, de lo manga ngale gena ka ona masirete imasihie de foloisi imasilamo de o nyawa ma binuka, de kanaga lo asa imarimoi kawa so imatekesikoholu de lo ka yaaka maro o moi-moi dangodu datotorou.

¹⁷ Duma nakoso o cawaro ma sihino o Gikimoino la wonahike ngoneka, de ngone nanga sininga ma rabaka asa ibolowo de o dorou moi lo ihiwa. So to ngone nanga oho o dame ma rabaka, sababu ngone asa o nyawa pagalusiri de nanga sininga asa damuudu la o nyawa manga dupa lo posigise daloha. De o nyawaka lo asa ngone o loha moi-moi idala paaka onaka. De lo ngone asa upa o nyawa pohihiri sidago moi pasitubuso de moi pasiguui, de lo nanga demo o nyawaka asa igogou de itiai.

¹⁸ So nakoso ngone la kanaga de nanga sininga damuudu o nyawaka la o dame de o sohi posigokoka, gena asa ma dodoguka o moi-moi paaka itotiai de daloha. So maro o goho moi la o doroka yadato asa ioho de ma dodoguka lo asa isopo daloha.