Yakobus 2 - O GIKIMOI AWI JAJI ma BUKU

Upa o nyawa moi iwisiguui de o nyawa moili iwisitubuso

¹ Ai dodiao nipipiricaya, nanga Jou Yesus Kristus Una o kolano moi de Awi kuasaka de Una magena ngini niwipiricayaka, so ngohi tinisulo la ngini upa he o nyawa moi niwisiguui de o nyawa moili niwisitubuso.

² Magena imatero maro ngini, sababu ngini gena nakoso o orasi moi nimatolomuno, de kanaga o nyawa wokakaya moi wowosa de awi baju daloloha de lo o ali-ali guraci awi gia ma raragaka, bolo de kanaga lo o nyawa moili wosususa wowosa so una asa de awi baju itotola-tola,

³ de ngini asa foloi niwihoromati o nyawa una magena awi baju dalolohaka. So nitemo unaka, “Baba, hino la ngona nomatami ma simaka,” duma asa o nyawa wosususa una magenaka nitemo, “He! Ngona kagena nomaokoye,” eko “He! Ngona nomatami ma duduka.”

⁴ Ngini niaaka komagena la o nyawa ikakaya lo paramoi de o nyawa isususa lo paramoi, de komagena so asa nia edekati datorou sidago moi niwisiguui de moi niwisitubuso.

⁵ Ai dodiao nipipiricaya de tinidododara, hika ngini niososininga o nyawa ona magena la kanaga o nyawa o Jou Yesus wipipiricaya waasi asa yasiceke sababu manga alamu idalawa. Ona magena o Gikimoi wahiri daboloka. To ona manga piricaya o Jou Yesuska magena idadi to ona manga kaya moi, imatero o nyawa moi la awi alamu idala magena idadi to una awi kaya. De ona maro o Gikimoi Awi ngopa so ona done asa yowosa de yogoge to Una Awi pareta ma rabaka. Magena maro Awi jaji moi o nyawa ona magenaka, nakoso igogou widodara Unaka.

⁶ Duma ngini gena dadoohaso o nyawa isususaka de niasiceke. Ce! Nianakoka o nyawa ikakaya gena manga dupa ngini lo inisidipito, so asa ona nisangisara, sidago lo ningaho la nisirisima o bobareta manga hakimka.

⁷ De o kia naga moili kanaga ifoloisi datorou gena, ona ma Kristus Awi ronga daloha de lo o ronga o kia nisiaso ma orasi niwipiricaya, kiaka to Una Awi ronga ma dorou ona masirete asa yogaka.

⁸ De o Gikimoi Awi dodoto ifoloi ilamo gena maro Awi Jaji ma Buku ma rabaka itemo, “Maro ngini nia rohe masirete niadodara, komagena nia dodiaoka lo bilasu niadodara.” De nakoso igogou ngini o demo ilamo magegena la niaaka, de ngini asa niaaka o moi-moi daloloha de itotiai.

⁹ Duma o demo ilamo magegena ngini asa inisisala, sababu ngini asa o nyawa moi niwisiguui de o nyawa moili niwitubuso, de komagena o Gikimoi Awi bobita gena niamotewa.

¹⁰ Sababu o nyawa la o Gikimoi Awi bobita dangodu de kanaga ngai moi yamotewa, ngaroko Una Awi bobita ma binuka yaaka daboloka, duma ona magena maro o nyawa ma somoa la o moi-moi dangodu gena yatilakuka.

¹¹ De lo o Gikimoi wotemo, “Upa ngini nisundali,” de asa wotemoli, “Upa ngini o nyawa niatooma.” De nakoso ngini niaakawa o sundali duma ngini o nyawa asa niatoomaka, ngini magena igogou asa o Gikimoi Awi bobita lo niamotewa de niaakawa.

¹² Komagena so o Gikimoi Awi dodoto itotiai gena ngone nanga dorouno inapalako de inasiputuru so aku Una powileleanika, so ngone gena igogou done asa nanga sopo ma dagali pamake Unano. Mutuwade bilasu ngini niabicaraka de niamanaraka lo maro o nyawa o Gikimoi Awi dagali moi-moi magegena yosininga daloha.

¹³ De lo nakoso ngone la poholu o nyawa pagalusiri, de o Gikimoi lo asa woholu wonagalusiri ngone, done ma orasika asa o nyawa yangodu manga laha de manga dorou ma sopo ma fanggali yamake. Duma igogou nakoso ngone la podupa o nyawa pagalusiri, de o Gikimoi lo asa wonagalusiri ngoneka, so tanu upa lo wonasisala. Magena maro o goginano moi ngoneka, so lebelaha nakoso ngone upa o nyawa pasisala duma podupa o nyawa pagalusiri.

Ona la o loha o nyawaka yaakawa gena manga piricaya o Jou Yesuska ma faida ihiwa

¹⁴ Ai dodiao nipipiricaya, nakoso ngini la o nyawa de yotemo, “Ngohi o Jou Yesus towipircaya dabolo,” duma ona asa o loha moi-moi o nyawaka yaakawa, de ona manga piricaya gena asa ma faida ihiwa so o Gikimoi lo woholu ona wasisalamati.

¹⁵ Komagena so nakoso o nyawa yanau moi eko ngopedeka moi la o Jou Yesus iwipiricayaka de kanaga manga baju eko manga ino asa ikurangi,

¹⁶ de ngini nitemo onaka, “Notagi nogila-gilaka, de tanu nomasisari daloha la aku o rijiki ngona masirete namake ma ngale nosanangi kali,” so manga oho ma kurangi lo niariwowa. Ce! Nia demo magena asa ma faida lo ihiwa.

¹⁷ Komagena nakoso ngone lo o Jou Yesus powipiricayaka duma o loha moi-moi o nyawaka paakawa, ngone nanga piricaya gena koloko imatetengoka de ma faida lo ihiwaka. Maro o nyawa moi la awi rohe isoneka so awi buturu ihiwaka, de o manara kia naga moi lo waaku kawa waaka.

¹⁸ Nagala ai demo idodomaka gena o nyawa ma somoa yaholu, so yotemo nginika, “O nyawa moi womasigocoho cawali awi piricaya o Jou Yesuska, de o nyawa moili asa womasigocoho cawali o loha waaka o nyawaka.” Duma ngohi asa totemo, “Sababu ngini nia loha o nyawaka ihiwa, so ngini lo akuwa nisikelelo nia piricaya magena ngohika. Duma ngohi gena o loha taaka o nyawaka, so komagena lo ai piricaya aku tinisikelelo nginika.

¹⁹ So daloha la kanaga ngini nipiricaya igogou o Gikimoi womatetengoka, duma maro o bi toka lo kanaga asa yopiricayaka sidago lo damodo de datirine.

²⁰ Ngini gena nifumaka. Nakoso o nyawa la ona o Jou Yesus wipiricayaka, duma ona la o loha moi-moi yaakawa, manga piricaya gena asa ma faida ihiwa. Maro o nyawa moi la awi rohe isone so awi buturu ihiwaka de o manara kia naga moi lo waaku kawa waaka. Maro komagena hika ngohi tinisikelelo nginika.

²¹ Ngini bilasu niososininga ma orasi ipapasaka nanga ete moi o Abraham awi manara gena, kanaga ma ngale awi ngopa Ishak gena o suba ma rihoka wihadoku. De ngaroko awi sininga isusa, duma una asa o kia o Gikimoi wotetemo gena wimote so wodupa awi ngopa witooma, la idadi awi suba moi o Gikimoika. De o Gikimoi asa wotemo, ‘Igogou! O Abraham una magena to Ngohi Ai dupa gena asa wamote de waaka, so una awi sininga itotiai Ngohika.’

²² Komagena ngini asa nianakoka o Abraham o Gikimoi wipiricayaka, so una asa o bi moi-moi kiaka o Gikimoi wodudupa gena ka waaka. De awi manara magegena so una asa awi piricaya o Gikimoika gena igogou wosikeleloka.

²³ Sababu maro komagena o Gikimoi Awi Jaji ma Bukuka itemo dabolo, ‘O Abraham una magena o Gikimoi wipiricayaka, so o Gikimoi wotemo o Abraham awi sininga gena itiai Unaka.’ De lo una asa wisiaso maro o Gikimoi Awi dodiao.”

²⁴ So ngone panako daboloka, kanaga o nyawa nakoso ona yotemo, “Igogou, o Gikimoi towipiricayaka,” duma o loha moi-moi yaakawa, de o Gikimoi asa wotemo, “Ona manga sininga gena itiai waasi.” Duma o nyawa nakoso yopiricayaka de ona lo asa yodupa o loha moi-moi yaaka, ma ngale ona magena o Gikimoi lo asa wotemo, “Ona manga sininga gena itotiai Ngohika.”

²⁵ Maro kanaga lo o ngopedeka moi ami ronga ongo Rahab, ngaroko muna gena o ngopedeka mosusundali de ami rohe momasiiija moi, duma o Gikimoi asa wotemo munaka, “Ngona ani sininga lo itotiai Ngohika.” Sababu muna asa o Yosua awi sosulo gena masidodogu ami tahuka de lo o ngeko masidumu onaka la aku ona iliho de yamote o ngeko ma somoa, la manga lawangi upa lo ona yatago.

²⁶ So komagena ngone lo nakoso o Jou Yesus powipiricayaka duma o loha moi-moi paakawa, ngone nanga piricaya gena asa ma faida lo ihiwa. Maro o nyawa moi la awi rohe isoneka so awi buturu ihiwaka, de o manara kia naga moi lo waaku kawa waaka.