Rasul 8 - O GIKIMOI AWI JAJI ma BUKU

¹ De o Saulus lo awi sininga yadahe ma ngale o dooma ma manara magena. So o wange magena o Stefanus witoomaka, de isolano o Yerusalem ma gogobu yasangisara datubuso, sidago ona ipipiricaya magena he yangodu itagi yodobiau o Yudea ma daeraka de o Samaria ma daeraka, de o Yerusalemka yomatolomu kawa, ka cawali o bi rasul ona ka igogogesi.

O Saulus o gogobu wasangisara

² O bi nyawa manga sigogise daloha o Gikimoika yamuruo naga itagi so o Stefanus wipoosu de idodora yaili-ilika.

³ Duma o Saulus una magena awi edekati waaka ma ngale o gogobu wasisa, so wotagi o tahu wageto, o nyawa ipipiricaya yanau eko lo o ngopedeka walilia la o bui ma tahuka wasingosa.

O Samariaka o habari qaloloha manga sininga yadahe

⁴ Mutuwade o bi nyawa ipipiricaya yododobiauka o orasi magena ona itagi o habari daloloha isihabari kiaka bato.

⁵ O Filipus una wotagi kagena o Samaria ma doku ilalamoka de wosihabari ma ngale o Salamati ma Kolano.

⁶ Ma orasi o bi nyawa yadadala yoiiseka o Filipus wobicara de ona yakokeleloka o nonako ihahairani waaaka, de o nyawa yadadala magena manga sininga yadahe o kia o Filipus wotetemo gena.

⁷ Sababu o bi nyawa yabikokitokano o toka idala wosisupu so iore-ore, de o bi nyawa ilulugu de lo ibicucuga-cuga yadala wasilohaka.

⁸ So o bi Samariaka ma nyawa ona magena imore de yanali.

O Simon womagogomahate

⁹ Duma kanaga o nyawa moi, awi ronga o Simon, o doku magenaka he itekaka o Samaria ma nyawa magena iwihairani icarawa, sababu una wasihaga onaka de to una awi gomahate. So una womasihie de wotemo o bi nyawa yangoduka una gena o nyawa wilalamo moi,

¹⁰ sidago o kawasa o doku magenaka ma nyawa yangodu yodupa wisigise unaka. Mutuwade ona itemo, “O nyawa una manena awi kuasa ma buturu o Gikimoino isironga lo o Kuasa Dapoputuru.”

¹¹ Komagena ma deka una wasihaga onaka de to una awi gomahate, so o nyawa ona magena wisigise unaka.

¹² Duma ona magena yopiricaya ma orasi o Filipus wasihabari o habari daloloha ma ngale o Gikimoi asa wopareta maro o kolano moi de lo o Yesus Kristus Una magena to ona manga Salamati ma Kolano, so yanau de lo o ngopedeka ona yangodu yaosika.

¹³ De o Simon una masirete lo wopiricaya. So wiosi dabolo, de gila-gila una o Filipus wimoteka. De ma orasi o Filipus o nonako ihahairani waaka so o Gikimoi Awi kuasa o Simon wakelelo, de una wohairani icarawa.

¹⁴ O bi rasul o Yerusalemka yogiise, ena gena o Samariaka ma nyawa o Gikimoi Awi habari daloloha yopiricayaka. So kagena de ona yasulo la o Petrus de o Yohanes itagi yakahika onaka.

¹⁵ Ma orasi o Petrus de o Yohanes imasidiadoka, de ona isumbayang igolo o Gikimoika ma ngale o Samaria ma nyawa ipipiricayaka o Gurumi Datetebi wouti ona magenaku,

¹⁶ sababu ona asa ka yasiosi de o Yesus Awi ronga la asa o Yesus wimote, duma o Gurumi Datetebi ona ka o nyawa moiku lo wowosa waasi.

¹⁷ So dabolo o Petrus de lo o Yohanes manga gia yahado ona magenaku, de o Gurumi Datetebi wowosa to ona manga siningaku.

¹⁸ Ma orasi o Simon wakelelo o rasul ona magena manga gia yahado so o Gurumi Datetebi wowosa onaku, de una o pipi wasibaja o Petrus de o Yohaneska,

¹⁹ de wotemo, “Nihike ngohika o buturu magena, la ngohi lo aku ai gia tahado nagoonaka bato, so o nyawa ona magenaku o Gurumi Datetebi wowosa.”

²⁰ Duma o Petrus wongamo so wosango wotemo, “Ce! De ani pipi magena ngona o narakaka nisingosa! Notemo nagala o Gikimoi Awi cocatu o Gurumi Datetebi gena aku nosifangu de o pipi.

²¹ Sababu ani sininga itiaiwa o Gikimoi Awi simaka, so ngohi toholu tosimote ani sininga ma dorou magena so tonihikewa.

²² Mutuwade ani edekati datotorou magena bilasu nomatoba de nomatoduba de nomagolo o Jouka, la Una asa wonisiapongu ani sininga datotorou magena.

²³ Sababu ngohi toninako ani sininga ma rabaka iwedo de o doosa ngomika, so naakuwa o dorou magena nadoha, koloko o gumi nipilikuka so nomasose lo naakuwa.”

²⁴ Kagena de o Simon wotemo o Petrus de o Yohaneska, “Nako daloha, niriwo ngohi de nigolo o Jouka, la tanu upa ngohi o narakaka isingosa, eko o kia nitetemo gena moi lo upa idadi ngohika.”

²⁵ So o Petrus de o Yohanes yadoto idodooha to ona manga piricaya o Yesuska de o Jou Awi habari lo isihabarika, dabolo de ona iliho o Yerusalemka, de ikahika itulu-tulu so o habari daloloha isihabari kali o Samaria ma bi doku idadalaka.

O Filipus de o Etiopiaka ma nyawa moi

²⁶ So kagena ma moiku de o Jou Awi malaikat moi itemo o Filipuska, “He! Hika nomasidailako de nomajobo o koresaraye nokahie de notagi o ngeko magena, kiaka o Gazaka de ikahika o Yerusalemka.” Nako o ngeko magena, o nyawa he yanonu kawa.

²⁷ So o Filipus womasidailako de womajoboka. Kanaga o Etiopiaka ma nyawa moi, una magena awi manara o Kandake o Etiopia ma kolanoka gena o Etiopiaka ma nyawa manga balastengi dangodu wacocoho. De ma dongoho magena una o Yerusalemka wosuba de wosumbayang o Gikimoika asa daboloku,

²⁸ so kagena de awi jara ma padatiku wopane de woliho. Kanaga awi dodagi ma rabaka de una ma nabi o Yesaya awi buku ma demo wababaca.

²⁹ So kagena de o Gurumi Datetebi wotemo o Filipuska, “Nahika awi padati ma dateka, de notagi nowimote-mote.”

³⁰ So o Filipus wotagi de wimote-mote awi padati magena, de woise o Yesaya awi buku ma demo wabaca. So o Filipus wisano, “Baba, o kia ngona nababaca gena, ma ngale ka nasahe, eko hiwa.”

³¹ De o Etiopia ma nyawa magena wosango, “Hiwa! Nakoso o nyawa moi lo isidotowa ngohika o demo ma ngale magena, idodooha ngohi aku tasahe.” So kagena de una o Filipus iwiaso awi padatiku wopane so wisitami awi dateku.

³² O Gikimoi Awi demo wababaca gena o gimina o Gikimoi Awi Jaji ma Buku ma rabaka komanena, “Una magena wituda koloko o duba yatola, koloko o duba ma ngopa ngaroko ma gogo yaguti lo iorewa. Komagena so ka o demo o dola moi lo wobicarawa.

³³ Una wigagaka wisimade, de ngaroko Awi dorou ihiwa, de wiaka maro ka o nyawa ma dorou. Una witoomaka so Awi ngopa de Awi dano lo ihiwa, so ka o nyawa moi lo yaakuwa isijarita ma ngale to Una Awi ngopa de Awi danoku.”

³⁴ De o Etiopia ma nyawa magena wotemo o Filipuska, “Hika noisingangasu ngohika, so ma nabi Yesaya awi demo manena ma ngale naguuna so wisitero maro o duba. Una masirete, eko o nyawa moili.”

³⁵ Kagena de o Filipus wobicara ma nonomaka o buku ma nabi Yesaya ma demo magegena de wosihabari unaka o habari daloloha ma ngale o Yesus.

³⁶ Ona itagi yamote o ngeko magena, de imasidiado o riho moika de ma akeka. La o Etiopia ma nyawa una magena wotemo, “He! O ake lo madahe! Hino pouti, la kagena de noiosi.” [

³⁷ De o Filipus wotemo unaka, “Ka daloha baba, nako nopiricaya de ani sininga igogou, ngohi aku toniosi.” De o Etiopia ma nyawa una magena wotemo, “Ngohi topiricaya o Yesus Kristus Una magena o Gikimoi ma Ngopa.”]

³⁸ Dabolo de wosulo awi padati magena imatogu, de ona yasinoto iuti itagi, la o Filipus o nyawa una magena iwiosi o ake magenaka.

³⁹ Ma orasi ona o akeye idola, de imatodoka o riho magenano o Jou Awi Gurumi o Filipus iwingahoka. De ngaroko o Etiopia ma nyawa una magena o Filipus wikelelo kawa, una asa awi dodagi wadofa kali de awi nali de awi moreka.

⁴⁰ De o Filipus womatodoka una he wahika kagena o Asdod ma kotaka, so to una awi dodagi wadofa kali, de wosihabari o habari daloloha o bi doku wageto-geto sidago waado o Kaisarea ma kotaka.