Rasul 12 - O GIKIMOI AWI JAJI ma BUKU

O Herodes o Petrus witago

¹ Ma dongoho magena lo ma Kolano Herodes Agripa o gogobu yamuruo naga wasidipito de watagoka.

² De awi prajurit wasulo itagi de o sumarangi la o Yakobus, una magena o Yohanes ma nongoru gena, witooma.

³ Sababu o Herodes wanako o dooma gena o Yahudika manga roriri yodupa, so ma orasi o Roti ma Ragi Ihihiwa ma Rarame de una wasulo kali la o Petrus iwitago.

⁴ Iwitago dabolo de o Petrus o bui ma tahuka iwisingosaka, so kagena o prajurit o bolu iha yasulo iwijaga imateketotagali, so o bolu moi o prajurit yaruruha. Sababu awi edekati o Paskah ma Rarame dabolo de o Petrus iwingaho o hakimka, la o nyawa yadadala manga simaka kagena awi demo wahiri, nakoso isala de asa isulo iwitooma.

⁵ Komagena imaaka, so o Petrus o bui ma tahuka wijajagasi, duma o bi gogobu ona magena isumbayang de manga sininga daputuru igolo o Gikimoika ma ngale o Petrus awi oho.

O Petrus o bui ma tahuno wisisupu

⁶ O putu magena wijajaga la ma ginitano de o Petrus bilasu iwingaho la wisirisima o kawasa yadadalaka, una wisipiliku de o rate ngai sinoto de wikioloka o prajurit yasinoto manga risoaka, de kanaga lo o prajurit ma somoali yojajaga o bui ma ngoraka.

⁷ Imatodoka o Jou Awi malaikat moi imaokoye de o nita yodisiwa o bui ma ngihi ma rabaka. Kagena de o malaikat o Petrus iwisosihito sidago womomi, de itemo unaka, “He! Taika nomaoko!” Gila-gila awi rate awi giaka ipalako so ituraka.

⁸ Dabolo de o malaikat magena itemo unaka, “Ani baju nomasitiba de ani capato ma gumi napiliku.” Gila-gila o Petrus waaka, so dabolo de o malaikat magena itemo kali, “Ani juba nomasitiba la nahino ngohi noimote.”

⁹ So kagena de o Petrus o malaikat magena wamote so isupuka o bui ma tahuno. Duma una womanakowa o kia o malaikat yaaaka gena igogou dangodu idadika, de wotemo awi sininga ma rabaka, “Nagala manena ka o gogelelo o Gikimoino takelelo.”

¹⁰ Ma orasi ona yatiho o prajurit manga riho ma nonoma de ma sinotoka, so imasidiado o ngora o besika la yakahika o kotaka. O ngora magena ka maena ipelenga masirete, so ona isupu de itagi o ngeko moi yamoteka. De o Petrus womatodoka o malaikat magena ihiwaka so widongosaku.

¹¹ Magena de asa o Petrus womanako o kia idadi unaka, so wotemo, “O orasi manena asa ngohi tanako igogou o Jou Awi malaikat wasulo la ngohi woisiraro o Herodes awi pareta ma rabano de o Yahudika manga roriri manga edekati datotorou ma ngale ngohi tanu itooma.”

¹² So wanako dangoduka magena, de o Petrus wotagi ongo Mariaka o Yohanes, iwisiaso lo o Markus, ma awa ami tahuka. Kagena o nyawa yadala imatolomuno so isumbayang.

¹³ O Petrus manga ngora ma duduno waaso de watote, de o ngopedeka moleleleani moi ami ronga ongo Rode mosupu la o ngora mapelenga.

¹⁴ De gila-gila awi ili magena manako igogou o Petrus, duma minali poli so muna o ngora mapelenga waasi, de momatai-tai ma rabaka mokahika kali masingangasu motemo, “He! O Petrus gena kadoke naga ma duduka!”

¹⁵ De ona itemo, “Nitogosa nagala!” Duma ongo Rode mosigegego motemo, “Hiwa! Kadoke naga!” So ona itemo, “Magena ka awi malaikat!”

¹⁶ Duma o Petrus o ngora watote watoguwa. So kagena de ona o ngora yapelenga, de wikelelo igogou o Petrus so ona yohairani icarawa.

¹⁷ O Petrus wapoma de una wasingangasu onaka ma ngeko idodooha o Gikimoi wisisupuka o bui ma tahu ma rabano. So una wotemo, “Nitagi o Yakobuska la niwidedemo komagena lo to ngone nanga dodiao ipipiricaya ma somoaka.” So dabolo de o Petrus o tahu magena wodongosa de wotagi o riho ma somoaka.

¹⁸ So daginitano o bi prajurit iruwahe de ikalala, sababu yogamamu dadoohaso o Petrus o bui ma tahuka he wihiwaka.

¹⁹ So kagena de o Herodes wasulo una wisari, duma ona wimakewa. De o Herodes awi prajurit magena wasasano daboloka, de wasulo la o prajurit ona magena yatoomaka. Dabolo de o Herodes o Yudea ma kota wodongosa de wotagi wakahika o Kaisarea ma kotaka la kagena wogoge o wange muruo naga.

O Herodes awi sone

²⁰ Ma orasi ipapasaka gena ma Kolano Herodes wadoosa poli ma ngale o doku Sidon de o doku Tirus ma nyawaka. Duma o kota sinoto magena manga ino cawali ma sihino o Herodes awi dokuno, so ona itagi o Herodes awi kadato wapopareta o Blastuska, la una magena iwibaja ma ngale una wamote itagi o Herodeska idame. So kagena de o Blastus wangaho o nyawa ona magena itagi o Herodeska, de igolo la imakadame kasi.

²¹ Dabolo so o wange imatekekokajaji yaadoka, de o Herodes awi pareta ma juba womasipakeka, de awi pareta ma kursika womatamiye so wabobicara o kawasaka.

²² Ona awi demo yoise de ona iwigiliri, “Manena o nyawa dasowo, duma igogou o giki ma loha ibicara!”

²³ Gila-gila o Jou Awi malaikat o Herodes awi siri isitubuso, sababu una o Gikimoi iwisigiliriwa. So o orasi magena dabolo o Herodes o kulubati wiodo so wosoneka.

²⁴ So komagena o bi nyawa foloisi yadala yodupa isigise o Gikimoi Awi habari daloloha so yopiricayaka.

²⁵ Ma orasi o Barnabas de o Saulus o roriwo o pipi magena yatota dabolo o gogobu manga roriri o Yerusalemka, de ona iwiaso o Yohanes, iwisironga lo o Markus, so iliho imakangaho o Antiokhiaka.