Matius 16 - O GIKIMOI AWI JAJI ma BUKU

O Farisika de o Sadukika manga gogolo o Yesus waaka o nonako ihahairani

¹ O Farisika de lo o Sadukika yamuruo naga yahino o Yesuska, de manga edekati Una Awi sala yasari. Ona igolo Unaka itemo, “Hika naaka o manara maro o nonako moi o dipaka gena igogou Ngona nisihino o Gikimoino.”

² Una wosango, [“Nako o wange he itumu de ma dipa kanaga dasosawala, de ngini nitemo, ‘O rato de o muura iogoka.’

³ De lo nako o goginitano, de ngini nitemo, ‘O wange manena asa imuura, niakelelo o lobi kogena idolaka de lo ma dipa dasosawalaka.’ Ngini nianako daloha idodooha de o dipa niatailako. Duma nianakowa idodooha nianano o kia naga o orasi manena o Gikimoi waaaka.]

⁴ Ce! Ngini o bi nyawa o orasi manena nia dorou ningodu gena o Gikimoi niwiholu. Ngini nigolo Ngohi taaka o nonako nginika? Toholu! Ngaroko nigolo nigegego lo Ngohi taakawa o nonako maro komagena ma meta o nyawa ngini manenaka, ka cawali o nonako moi maro idodoma ma nabi Yunuska gena idadadika.” Dabolo de Una womajoboka.

O Farisika de lo o Sadukika manga dodoto isitero maro o ragi

⁵ O Yesus Awi muri-muri imasidiado o talaga ma sonongaka, duma imariwosa so o maru imagahowa.

⁶ Una wotemo onaka, “Nimasitiari, ma ngale o Farisika de o Sadukika manga ragi bai!”

⁷ Kagena de o muri-muri imatekebicara moi de moika, de itemo, “Una wotemo komagena sababu to ngone nanga roti ihiwa.”

⁸ Una ka wanako Awi muri-muri manga sininga de o kia ona isibicara. So Una wotemo onaka, “Ce! Ngini nia sininga isusa ma ngale to ngini nia roti ihiwa. Kodo! Kiaso nia piricaya ikurangi maro komagena.

⁹ Dadodooha so ngini niasihoda waasi de niosininga waasi sidago o orasi manena. Ma orasi o roti ngai motoha tatepi-tepi, de o nyawa yacala motoha tahike so yaodoka. Sababu ngini masirete niatolomu so ma soohu o karaja muruo.

¹⁰ De ma orasi moili Ngohi o roti ngai tumudingi tatepi-tepi de tasiodoka o nyawa yacala iha. De kanaga ma soohu o karaja tumudingi, magena lo ngini masirete niatolomu.

¹¹ Ngohi ngini tinisitiari gena ma ngale o roti dasowo. So, idodooha nianakowa eko niasihoda waasi. Nimasitiari ma ngale o Farisika de o Sadukika manga ragi bai!”

¹² Asa ka yanako Una o sitiari wahike ma ngale o roti ma ragi dasowo, duma o Farisika de lo o Sadukika manga dodotoka.

O Petrus wotemo o Yesus o Salamati ma Kolano

¹³ O Yesus de Awi muri-muri itagi o Kaisarea Filipi ma soa de ma dokuka. Itagi so manga dodagi ma rabaka Una wasano onaka, “Nako o nyawa gena ona itemo, Ngohi o Nyawa ma Duhutu manena naguuna.”

¹⁴ De ona isango itemo, “Kanaga ma binuka itemo o Yohanes Wooosi, de ma binukali itemo ma nabi Elia, de o nyawa ma somoali itemo Ngona ma nabi Yeremia eko lo o nabi moili.”

¹⁵ So kagena de o Yesus wosano onaka, “Duma nako ngini masirete, Ngohi manena naguuna.”

¹⁶ O Petrus wotemo, “Baba, Ngona manena o Salamati ma Kolano, o Gikimoi woooho Awi Ngopa.”

¹⁷ La komagena de o Yesus wosibobita unaka, “Ngona, Simon o Yunus awi ngopa gena, igogou asa nosanangi, sababu magena o nyawa yasowo inisingangasu ngonaka, ka ka Ai Baba o sorogaka.

¹⁸ Komagena so ngona gena igogou Petrus, gena ma ngale o teto. De o teto o sosode gena ma dokuka Ngohi asa Ai tahu tosigoko, gena ma ngale o bi nyawa Ngohi ipipiricaya gena yangodu asa tatolomu. Ngaroko o Sone ma Riho ma buturu, ona gena yatura yaakuwa.

¹⁹ Ngohi asa tonihike ngonaka o Gikimoi Awi pareta ma kukuci, ena gena o kuasa la o Gikimoi Awi nyawa napareta. La o kia ngona o dunia ma dokuka nositatapuka, imatero de o sorogaka lo o Gikimoi wositatapu idomaka. De lo o kia o dunia ma dokuka notemo nosimahaka, imatero de lo o sorogaka o Gikimoi wotemo wosimaha idomaka.”

²⁰ La komagena de Una wapoma onaka, “Ma ngale Ngohi o Salamati ma Kolano gena upa lo nisingangasu o bi nyawaka.”

O Yesus wodedemo done wosone Ma ngeko idodooha so iwimote Una

²¹ Ma solano o orasi magena de o Yesus Awi muri-murika womadedemo wositotiaika, ena gena wotemo onaka, “Ngohi manena bilasu totagi o Yerusalemka. De done o Yahudika manga roriri, o imamka ma bi sahe, de o bi guru agama ona Ngohi iholu, so ona asa isangisara dasiri ma bati itooma de isosone. Ngaroko iaka komagena, duma o wange saangeka de Ngohi tooho kali.”

²² La o Petrus woise de o Yesus Awi giaka walia la imatingaka, gila-gila wisidapano wotemo, “Jou, tanu o Gikimoi wonisiraro la upa idadi komagena.”

²³ Duma womatodoka o Yesus womakiliho de o Petruska wisidapano wotemo, “He! Iblis, noloda! Ngona gena asa Ngohi noisifafati. Ani sininga magena imaterowa de o Gikimoi Awi sininga, duma ani sininga gena ka o nyawa ma sininga.”

²⁴ Dabolo de Una Awi muri-muri wasibicaraka wotemo, “O nyawa nagoona la imote Ngohi, bilasu imahadoku so manga dupa moi-moi manga sininga ma rabaka yapalako la imote-mote Ngohi, de dadoohawa nakoso o sangisara yamoku ma bati yosone.

²⁵ Sababu o nyawa nagoona la manga oho o dunia manenaka foloi yosininga sidago iholu isangisara, done ona dede o Gikimoi asa imakitingaka. Duma o nyawa nagoona ma ngale Ngohi imote de manga rohe ma salamati isidoohawa, la ngaroko isone, duma o oho ka sidutu ikakali done asa yamake.

²⁶ Ngaroko o nyawa moi o dunia de ma raba manena he dangodu ka to una, duma dangodu magena ma faida ihiwa, nakoso ma duuru una wamakewa o oho ka sidutu ikakali. Sababu o oho ka sidutu ikakali gena niamakewa de o guraci de o salaka nisitagali, eko lo akuwa niaija de o pipi.

²⁷ Sababu igogou ma orasi isitatapuka, Ngohi o Nyawa ma Duhutu done asa tahino kali o duniaku de Ai kuasa, kiaka isikokelelo maro Ai Baba Awi kuasa, de Awi malaikat yadadala. O orasi magenaka de igogou o nyawamoi-nyawamoi manga manara ma sopo Ngohi asa tafanggali de o loha eko o dorou.

²⁸ Ngini tinisingangasu igogou, yamuruo naga to ngini nia sidongirabano done isone waasi, nakoso yakelelo waasi Ngohi, o Nyawa ma Duhutu, tahino maro o Kolano moi.”