Matius 14 - O GIKIMOI AWI JAJI ma BUKU

O Yohanes Wooosi awi sone ma jarita

¹ Ma orasi magena o Galilea ma kolano gena o Herodes Antipas de una magena woise ma ngale o Yesus de Awi nonako ihahairani.

² So kagena de una wotemo awi nyawa ileleleani o tahu ma rabaka, “O Yesus gena o Yohanes Wooosi de Una asa wooho kali! Ma sababu magegena Una wamake o buturu la waaka o nonako ihahairani.”

^3-4 Ma sababu komagena ma Kolano Herodes womasininga, ena gena ma orasi idomaka de una womasipedeka ongo Herodias, muna magena o Herodes ma nongoru masirete, awi ronga o Filipus, ma pedeka. De o Yohanes he ma para ma dala wisidapano de wingamo o Herodeska, “Ce! Dalohawa, nako ngona nomikawi ani nongoru ma pedeka sababu muna magena ani modoka.” So o Herodes wasulo awi prajuritka o Yohanes iwitago, so ona witagoka de lo wipiliku de o bui ma rabaka wisingosaka.

⁵ Igogou, o Herodes wodupa o Yohanes gena witooma, duma o nyawa yadadala gena wamodo, sababu ona itemo o Yohanes gena o nabi moi.

⁶ Dabolo de ma Kolano Herodes awi sibuo ma wangeka, o rarame magena ma rabaka ongo Herodias ami ngopa moselo so una magena womidupa icarawa.

⁷ So kagena de una wojaji o jojaru muna magenaka, ma bati wosasi de wotemo, “Ngona o kia nodupa. Nogolo bato! Ngohi asa tonihike ngonaka.”

⁸ Magena de ma awa momigegego ami ngopaka la magolo o Yohanes Wooosi awi sahe, so o jojaru muna magena motemo ma Kolano Herodeska, “Ngohi tomagolo o Yohanes Wooosi awi sahe so o orasi manena dabolo o pigaku nongado la noihike ngohika!”

⁹ Ma Kolano Herodes woise ami gogolo magena de to una awi sininga ipeleso. Ngaroko komagena, sababu wosasika awi nyawa wakokoro manga simaka, so wosulo bilasu ami gogolo gena isimote.

¹⁰ So wosulo de o prajurit moi wotagi o bui ma tahuka, la o Yohanes Wooosi asa witolaka.

¹¹ So de witola dabolo de o sahe magena o pigaku wongado de wotagi wahike o jojaru magenaka. De o jojaru magena mahike kali ma awaka.

¹² O hali magena o Yohanes Wooosi awi muri-muri yogiise de yanako, gila-gila ona itagi o Yohanes Wooosi awi sone ma bake yadehe so yapoosuka. Dabolo de ona yotagi isihabari o Yesuska.

Yanau yacala motoha o Yesus wasiodo

¹³ Ma orasi o Yesus o habari magena woise, de womajobo o deruku wopane so wahika o riho moi imatitingano ma ngale Una ka womatengoka. Duma o nyawa yadadala gena yoise Una womajoboka, de ona o bi doku ma sigilolino magena itagi itowongi so Una iwisiduuru.

¹⁴ Ma orasi o deruku wouti, Una wamake o nyawa yadala icarawa. De Una wasayangi onaka, so ipopanyake gena Una wasilohaka.

¹⁵ So de damada-madaka, de Awi muri-muri yahino itemo Unaka, “Baba! Upa sidago daputu sababu o riho manena imatingano. Nakoso daloha, lebelaha o nyawa yadadala manena nasulo itagi la ona o ino imaija kadoke o bi dokuka.”

¹⁶ Duma Una wotemo, “Ngaroko ona upa he yotagi, la ngini bato niasiodo.”

¹⁷ Ona yotemo, “Ngomi gena ka cawali kanaga o roti ngai motoha de lo o nao ngai sinoto.”

¹⁸ Kagena de wotemo, “O ino eko nia maru magena niaahono kanena.”

¹⁹ Dabolo de o nyawa yadadala gena wasulo la igogeku o dumule ma dokuka. So ona yadadala o dumuleka imagogeku, kagena de Una o roti ngai motoha de o nao ngai sinoto magena wadehe de womamataga o dipaye, de Awi sukuru watide o Gikimoiye. Dabolo de Una o roti magena watepi-tepi de Awi muri-murika wahike la ona yasitoku o nyawa yadadala ona magenaka.

²⁰ La o nyawa yadadala magena yaodo sidago yapunu. So kagena ona iodo dabolo de Awi muri-muri o ino ma soohu yatolomu so ma boloi yamake o karaja mogiowo de sinoto.

²¹ O ino yaoodo magena ka yanau gena yacala motoha, o ngopedeka de o ngopa gena yaeto waasi.

O Yesus o ake ma dokuko wotagi

²² La magena dabolo de o Yesus wotemo Awi muri-murika, “Nitagi o deruku nipane la niside kadoka o talaga ma sonongaka. Ngohi asa o nyawa yadadala ona magena tasulo iliho kasi.”

²³ So de o nyawa yadadala magena ilihoka, de Una womatengoka o pido moika wakahika la wosumbayang. So dapuputuka gena, Una ka kagenasi.

²⁴ O orasi magena o deru Awi muri-muri yopapane gena he o talaga ma dongirabaka yahika ma soa he ikuruka. De o deru magena o moku-moku isipapaka, sababu o orasi magena o paro manga simano so yatomo.

²⁵ So he daginita Una asa wakahika onaka, de ka o ake ma dokuko wotagi.

²⁶ So de Awi muri-muri wikelelo Una o ake ma dokuko watagi, de ona isawangi so imatoore, “Wewe! O toka! O toka!” So yamodo imasidotirineku.

²⁷ Duma gila-gila Una waaso de wotemo, “Eh, hika nia sininga niapoputuru! Ngohi manena o Yesus so upa nimodo!”

²⁸ Kagena de o Petrus wotemo, “Ya Jou! Nako igogou Ngona o Yesus, noisisulo la ngohi lo o ake ma dokuko totagi takahika Ngonaka.”

²⁹ De o Yesus wosango de wiaso, “Nahino!” De o Petrus o deruku wouti, so o ake ma dokuko wotagi wakahika o Yesuska.

³⁰ Duma ma orasi una o moku-moku ilalago wakelelo, de una wimodo so he wilutu, de woore womasigaso, “Jou, noiriwo!”

³¹ Kagena de o Yesus Awi gia watoa so wicoho o Petrus, de wotemo unaka, “Ngona ani piricaya ikurangi. Dadoohaso ani sininga daceke.”

³² La ona yasinoto o deruku yopane de o paro magena lo itogu de iogoka.

³³ So kagena o deruka Awi muri-muri manga suba yatide Unaka de lo itemo, “Igogou, Ngona manena o Gikimoi Awi Ngopa!”

Yasisiri o Genesaretka o Yesus wasiloha

³⁴ Ma orasi o Yesus de Awi muri-muri imasidiado o talaga ma sonongaka, de o Genesaret ma bobanesa itahu.

³⁵ Kagena de o nyawa Una wikelelo, de gila-gila winako, so isihabari o bi doku o daera magena ma sigilolino. So o nyawa yasisiri asa yangaho Unaka

³⁶ de lo igolo, “Baba, nako nomisimaha, hitilahi Ani juba ma ngoguka sutu miacoho!” La o nyawa nagoona yacocoho gena yangodu manga siri itoguka.