Markus 10 - O GIKIMOI AWI JAJI ma BUKU

O Yesus Awi dodoto ma ngale o ngongolu

¹ Dabolo de o Yesus o riho magena wodongosa so wotagi o Yudea ma daeraka o Yordan ma sonongaka. O bi nyawa yadadala yahino Una widolomu noli. Kagena de maro Awi biasa moi Una wadoto kali.

² O Farisika ma nyawa yamuruo naga yahino kali, de manga edekati Una Awi sala yasari so itemo, “Mote nanga agama ma bobita, aku o nyawa manga pedeka yaholu?”

³ Kagena de Una wosango, “O Musa o bobita winihike nginika gena idodooha.”

⁴ De ona yosango, “O Musa womisimaha ngomi aku to ngomi mia pedeka miaholu, hitilahi ngomi o surati ngongolu ma surati migaka kasi.”

⁵ De Una wasitemo onaka, “Sababu to ngini nia sininga datogoi sidago o Musa o bobitaka wosilefo.

⁶ Duma ma solano ma orasi Una o nyawa waaka, gena Una Awi Jaji ma Buku ma rabaka itemo, ‘O Gikimoi o nyawa waaka yanau de o ngopedeka.

⁷ Ma sababu magegena yanau moi bilasu ma baba de ma awa wadongosa la una de awi pedekaka, so ona asa idadi ka ka moi,

⁸ so ona magena yasinoto kawa, duma ka ka moi.’

⁹ Ma ngale magegena so o kia igogou o Gikimoi wasirimoika, upa lo o nyawa pasiritinga.”

¹⁰ Daboloka de Una o tahuka wowosa de Awi muri-muri wimote la yosano o kia Una wosibobicaraka gena.

¹¹ Una wotemo onaka, “Naguuna ma pedeka womiholuka de wokawi de o ngopedeka ma somoali, una magena he wosundali ma ngale ma pedeka ma nonomaka.

¹² Komagena lo o ngopedeka moi ma roka mowiholuka de mokawi de yanau ma somoali, muna magena he mosundali ma ngale ma roka ma nonomaka.”

O Yesus wogolo tanu o Gikimoi Awi laha wasidumu o ngopaka

¹³ So o bi nyawa manga ngopa o Yesuska yaaho la wapada de wogolo tanu o Gikimoi Awi laha wasicatu onaka, duma Awi muri-muri yatoosa so yadogore ona magenaka, “Upa niahika!”

¹⁴ Ma orasi o Yesus wakelelo o hali magena, Una wongamo de wotemo onaka, “Niadohaka, la o bi ngopa ona magena yahino Ngohino. Upa lo niafati de lo niasimahawa. Sababu o bi nyawa imatero maro o ngopa ona manena asa yaaku iwosa o Gikimoi Awi paretaka.

¹⁵ So ngini tinisingangasu igogou, nakoso ngini niholu o Gikimoi ngini winipareta maro ka o ngopa, ngini magena akuwa niamake o Gikimoi Awi pareta.”

¹⁶ Kagena de Una o bi ngopa magena watoti de Awi gia wasipada manga sabiku, so wogolo tanu o Gikimoi Awi laha wasicatu onaka.

O nyawa ikakaya gena isusa manga arata yopalako de o Gikimoi wimote

¹⁷ Ma orasi o Yesus Awi dodagi wadofa kali, de o nyawa moi widogogora Unaka. De o nyawa una magena wobukuku de wosuba Unaka, de womasano, “Baba Guru, Ani sininga daloloha, ngohi bilasu o kia taaka la tamake o oho ikokakali.”

¹⁸ “Dadoohaso ngona notemo Ngohi Ai sininga daloha. Kanena moiwa manga sininga daloloha, cawali o Gikimoi masirete.

¹⁹ Ngona nanakoka o Gikimoi Awi bobita, ‘Upa ngona notooma, upa ngona nosundali, upa ngona notosi, upa de o galaki ani dodiaoka gena ikokulai, upa nosidarafa de lo nahoromati ani baba de ani awa.’ ”

²⁰ De una wosango wotemo, “Baba Guru, o bobita dangodu magena tamoteka ma orasi ngohi ka togogohiduuru kasi.”

²¹ O Yesus iwitailako o nyawa una magena, de wigalusiri so wotemo, “Cawali o ngai moisi naaka waasi. Notagi kasi la ani kia bato nosiija de ma pipi o nyawa isususaka nasitoku, la ngona asa namake o arata ma duhutu o sorogaka. Daboloka, de nahino la noimote Ngohi.”

²² Woise o Yesus wotemo komagena, so kagena de o nyawa una magena wituhudu, so wotagi o riho magena wodongosa de awi sininga ipeleso, sababu una magena foloi wokaya.

²³ La o Yesus womaginano Awi muri-murika, de wotemo onaka, “Igogou! Isusa icarawa o nyawa ikakaya o Gikimoi iwisigise la iwosa Awi pareta ma rabaka.”

²⁴ Awi muri-muri asa yohairani Una Awi demo magena. Duma Una wosidadu wotemo onaka, “Ai ngopa-ngopa, igogou isusa o nyawa asa iwosa o Gikimoi Awi paretaka!

²⁵ Lebelaha o unta moi asa iwosa o yaiti ma kupeka, nako positero o nyawa wokakaya moi wowosa o Gikimoi Awi pareta ma rabaka.”

²⁶ O Yesus Awi demo magena Awi muri-muri foloi yohairani, sidago imatekebicara moi de moika, “We! Nako igogou komagena, done nagoona asa aku isalamati la yamake o oho ka sidutu ikakali.”

²⁷ Kagena de Una wakeri-keri de wotemo, “Nakoso maha de o nyawa manga manara o duniaka, gena idadiwa. Duma nakoso maha de o Gikimoi Awi manara, de dangodu magena aku Una waaka.”

²⁸ De o Petrus wotemo, “He! Ngomi manena mia moi-moi lo dangodu miodongosaka so Ngona minimoteka, so o kia asa miamake.”

²⁹ O Yesus wotemo, “Nginika tinisingangasu igogou, o nyawa nagoona manga tahu yodongosaka, eko manga gianongoru de manga awabira, eko manga awa de manga baba, eko manga ngopa-ngopa eko lo manga doro sababu ma ngale Ngohi de o habari daloloha o Gikimoino,

³⁰ o orasi manena ona magena asa yamake foloi idala. Ona asa yamake ma giliho sidago ma para o ratu moi to ona manga tahu, manga gianongoru, manga awabira, manga awa, manga ngopa-ngopa, manga doro, de o moi-moi o duniaka de komagena lo o sangisara. De ma orasi ma simaka asa o nyawa ona magena yamake ma fanggali o oho daloloha de ikokakali.

³¹ Igogou, done o nyawa yadala o orasi manena idodoma gena done asa ka itotuuru, so o orasi manena o nyawa yadala ibitototuuru gena done asa idodoma kali.”

Ma para ma saangeka o Yesus wodedemo Awi sone ma ngeko

³² Dabolo de o Yesus de Awi muri-muri manga dodagi yadofa kali so ikahie o doku Yerusalemye. Una wotagi wododoma, de Awi muri-muri yototuuru de yamalo manga rohe datora. De o nyawa yadadala imomote gena yamalo yamodo. Kagena de Una de Awi muri-muri imatingaka so womasingangasu onaka done o kia asa idadi Una masireteka.

³³ So Una wotemo onaka, “Niise la nianako. Ngone manena pokahie nanga meta o Yerusalem ma dokuka. So kagena pahika de o Nyawa ma Duhutu Ngohi manena asa isidoa to Ngohi Ai saturuka, ena gena o imam ma bi saheka de o bi guru agamaka, la isitatapu Ngohi manena bilasu isosone. Dabolo de Ngohi asa isidoa kali o nyawa ona magena o Yahudika ma nyawa yasowo,

³⁴ la ona magena igagaka isiihe, de ihobi, de ingangapo de lo itooma. Duma o wange saangeka de Ngohi asa tooho kali.”

O nyawa yodupa yoleleani done yodadi yolamo o Gikimoi Awi simaka

³⁵ Dabolo de o Zebedeus awi ngopa yasinoto, o Yakobus de o Yohanes, yahino o Yesuska, de itemo, “Baba Guru, nako yaaku de o kia naga moi miodudupa mimagolo Ngonaka la tanu nomihike ngomika.”

³⁶ De Una wosano, “Awa, o kia nodupa Ngohi taaka nginika.”

³⁷ De ona yosango, “Ngomi mia dupa nakoso done ma orasi nopareta nimulia ma rabaka, tanu moi mimatami Ani girinaka de moi Ani gubalika la Ani horomati miamake.”

³⁸ Kagena de Una wotemo onaka, “Igogou! Ngini nianakowa o kia naga nigolo. Sababu nako nimode komagena, bilasu nimode niaudo o sangisara de o sone ma udo-udo maro Ngohi tauudo de lo nisimomoku o sangisara de o sone ma sasaru maro Ngohi isimomoku gena. So tinisano nginika, ka niaaku?”

³⁹ De ona yosango itemo, “Ngomi ka miaaku.” Mutuwade Una wotemo kali onaka, “Igogou! Ngini lo done asa niaudo o sangisara de o sone ma udo-udo, maro o kia Ngohi asa tauudo gena, de lo nimomoku maro o kia Ngohi asa tamomoku gena.

⁴⁰ Duma ma ngale nagoona asa imatami Ai girinaka eko Ai gubalika, magena Ngohi Ai hakuwa so tositatapuwa. Magena maha de o Gikimoi, sababu Una ka wanako de wositatapuka nagoona asa imatami o riho magegenaka.”

⁴¹ Ma orasi Awi muri yamogiowo yoise ma dodiao yasinoto magena manga gogolo komagena, de ona yatoosa so o Yakobus de o Yohanes yangamo.

⁴² So Una watolomu yangodu so yahino Unaka, de wotemo, “Ngini ningodu nianako o bobareta o Gikimoi wihoholu ona manga kawasa yasidipito so manga oho isangisara. De o bobareta yalalago lo asa yapoloso so manga oho itibalangu.

⁴³ Duma ngini upa komagena. So bilasu komanena: nagoona yodupa yolamo to ngini nia sidongirabano, ona magena bilasu yodadi lo yoleleani nginika.

⁴⁴ De nagoona yodupa yododoma to ngini nia sidongirabano, ona magena bilasu yogilalo ma ngale ngini ningoduka.

⁴⁵ Igogou, maro Ngohi o Nyawa ma Duhutu taaka, komagena ngini lo bilasu niaaka. Ngohi tahino la ma ngale Ngohi ileleani gena hiwa, duma Ngohi tahino ma ngale o nyawa taleleani. Komagena lo Ai oho tahike ma ngale o nyawa yadadala manga dorou ma ija, so manga dorou aku tatupu.”

O Yesus wopipilo o Bartimeus wisilohaka

⁴⁶ De o Yesus o Yerikhoka womasidiado. So o orasi magena dabolo de Una de Awi muri-muri de o nyawa yadadala o doku magena yodongosa so itagi yahika o doku ma ngoguka, de kagena naga o nyawa moi wopipilo awi ronga o Bartimeus, gena o Timeus ma ngopa, una magena o ngeko ma dateka wogogeku de wogogolo.

⁴⁷ De una wogiise o Yesus o Nazaret ma nyawa nogena wakahino, de una womatoore, “Ya, Yesus! O Daud awi ngopa de awi dano moiku, kodo! Noigalusiri ngohi!”

⁴⁸ So o nyawa yadadala ona magena iwingamo unaka itemo, “He! Nomapopongo!” Duma una lo ka foloisi womatotoore, “O Daud awi ngopa de awi dano moiku, kodo! Noigalusiri ngohi!”

⁴⁹ Kagena de o Yesus womatogu de wotemo, “Tagi la niwiaso una magena.” So ona iwiaso o nyawa wopipilo de itemo, “Nomarihi-rihi! To ngona ani ukuru ma loha sidago o Yesus woniaso, so nomaoko la notagi!”

⁵⁰ Kagena de o nyawa wopipilo magena awi baju wosipaka de tai-tai womaoko so wotagi o Yesuska.

⁵¹ O Yesus wisano una wopipiloka, “O kia nodupa Ngohi taaka ngonaka.” De una wopipilo gena wosango wotemo, “Baba Guru, ngohi todupa tomasigelelo.”

⁵² Kagena de o Yesus wotemo, “Notagi, sababu de to ngona ani piricaya Ngohika asa nisilohaka.” De o orasi magena dabolo wopipilo asa womasigeleloka, de una lo wotagi o Yesus iwimoteka.