Lukas 9 - O GIKIMOI AWI JAJI ma BUKU

O Yesus Awi muri-muri wasulo la itagi o habari qaloloha isihabari

¹ O Yesus Awi muri yamogiowo de sinoto watolomuno, la o kuasa wahikeka, ma ngale o toka dangodu yodusu de lo ibipopanyake yasiloha.

² So Una wasulo la itagi o nyawa manga panyake yasiloha de lo yosihabari itemo, “Ma orasi yaadoka ma ngale o Gikimoi asa wopareta maro o kolano moi.”

³ De ona imajobo waasi, de wotemo onaka, “Nia dodagi ma rabaka upa lo o kia naga nimagaho. Upa nimagaho o didiki, o karong, o maru eko lo o pipi, de nia baju gena ka nia roheka.

⁴ Nakoso o doku moika niwosa de ka o tahu moika nimasidodogu, de upa nimatotuluru ma bati o doku magena niodongosa.

⁵ De lo nakoso o riho moika la nitulu, de ona ngini iniholu sidago o habari daloloha magena lo yoise iholu, o riho magena niodongosa. Duma nia dohu ma gaapo niapari kasi la imaaka o nonako moi onaka, igogou ona magena de manga fajaka o Gikimoi Awi simaka.”

⁶ Kagena de ona imajoboka, itagi o bi dokuka yageto de isihabari o habari daloloha de lo ibipopanyake yasiloha.

Ma Kolano Herodes wogamamu

⁷ Ma orasi magena o Galilea ma kolano gena o Herodes Antipas de una magena woise ma ngale o Yesus Awi manara dangodu de asa wogamamu, sababu kanaga o nyawa itemo, “O Yesus gena o Yohanes Wooosi de Una asa wooho kali!”

⁸ Kanaga lo o bi nyawa ma somoa itemo, “Una magena idodoma ma nabi Elia de womasimane kali.” De ma binukali itemo, “Una manena o nabi moi o orasi idodomaka de kanaga wooho kali.”

⁹ So kagena de ma Kolano Herodes wogiise komagena, de una wotemo, “Nako o Yohanes Wooosi gena idomaka tasulo so awi sahe yatolaka, duma o Yesus Una manena igogou naguuna. Kanaga o habari ma ngale Una gena idala toiseka.” So o Herodes o ngeko wosidailako la tanu o Yesus gena iwimake.

Yanau yacala motoha o Yesus wasioqo

¹⁰ La o Yesus Awi sosulo yamogiowo de sinoto asa iliho ikahino kali, so Unaka imatolomu de ona o manara yaaaka dangodu isingangasu Unaka. Dabolo de Una ona wangaho la itagi imatinga o tona ibobeleu moika o Betsaida ma doku gena he idumuka.

¹¹ Ngaroko komagena, o nyawa yadadala gena yoise Una womajoboka, so ona itagi Una iwisiduuru. So ona yaado Unaka, de Una asa ona wadehe daloha, dabolo de wadoto onaka ma ngale o Gikimoi asa wopareta maro o kolano moi, de lo ibipopanyake nagoona bato wasiloha.

¹² O wange he itumu de Awi muri yamogiowo de sinoto yahino itemo Unaka, “Baba! Sababu o riho manena imatingano, so nakoso daloha, lebelaha o nyawa yadadala manena nasulo itagi o doku de o soa imakokadateka, la ona o ino imasari de lo o tahu la imasidodogu.”

¹³ Duma Una wotemo, “Ngaroko he upa! La ngini bato niasiodo.” De ona yotemo, “Ngomi gena ka cawali kanaga o roti ngai motoha de lo o nao ngai sinoto. Nagala ngomi bilasu mitagi o ino miaija ma ngale o nyawa yadadala ona manenaka.”

¹⁴ Manga dala kanaga ka yanau gena yacala motoha (o ngopedeka de o ngopa gena yaeto waasi). So Una wosulo Awi muri-murika, “Hika o nyawa yadadala magena niatotolomuno de niasigogeku, so kanaga o dolomu moi-moi gena yamomoritoha.”

¹⁵ De Awi muri-muri gena yaaka maro o kia Una wasulo onaka, de o nyawa yadadala gena yangodu imagoge.

¹⁶ So kagena de Una o roti ngai motoha de o nao ngai sinoto wadehe de womamataga o dipaye de Awi sukuru watide o Gikimoiye. Dabolo de Una o roti magena watepi-tepi de Awi muri-murika wahike la ona yasitoku o nyawa yadadala ona magenaka.

¹⁷ La o nyawa yadadala magena yaodo sidago yapunu. So kagena ona iodo dabolo de Awi muri-muri o ino ma soohu yatolomu so ma boloi yamake o karaja mogiowo de sinoto.

O Petrus wotemo o Yesus o Salamati ma Kolano O Yesus wodedemo done wosone

¹⁸ Ma moiku o Yesus kanaga wosumbayang womatengoka, de Awi muri-muri yahino Unaka, de Una wasano onaka, “Nako o nyawa gena ona itemo, Ngohi manena naguuna.”

¹⁹ De ona isango itemo, “Kanaga ma binuka itemo o Yohanes Wooosi, de ma binukali itemo o ma nabi Elia, de o nyawa ma somoali itemo Ngona o nabi idodoma moi so kanaga wooho kali.”

²⁰ So kagena de o Yesus wosano onaka, “Duma nako ngini masirete, Ngohi manena naguuna.” O Petrus wotemo, “Baba, Ngona manena o Salamati ma Kolano, kiaka o Gikimoi wojajika.”

²¹ La komagena de Una wapoma onaka, “Ma ngale Ngohi o Salamati ma Kolano gena upa lo nisingangasu o bi nyawaka.”

²² De lo wotemo, “Ngohi manena, o Nyawa ma Duhutu, done o Yahudika manga roriri, o imamka ma bi sahe, de o bi guru agama ona Ngohi iholu, so ona asa isangisara dasiri ma bati itooma de isosone. Ngaroko iaka komagena, duma o wange saangeka de Ngohi tooho kali.”

²³ Kagena de Una wasibicara o nyawa yangoduka wotemo, “O nyawa nagoona la imote Ngohi, bilasu imahadoku so manga dupa moi-moi manga sininga ma rabaka yapalako la imote-mote Ngohi, de dadoohawa nakoso o sangisara yamoku ma bati yosone.

²⁴ Sababu o nyawa nagoona la manga oho o dunia manenaka foloi yosininga sidago iholu isangisara, done ona dede o Gikimoi asa imakitingaka. Duma o nyawa nagoona ma ngale Ngohi imote de manga rohe ma salamati isidoohawa, la ngaroko isone, duma o oho ka sidutu ikakali done asa yamake.

²⁵ Ngaroko o nyawa moi o dunia de ma raba manena he dangodu ka to una, duma dangodu magena ma faida ihiwa, nakoso ma duuru una wisisa sababu wamakewa o oho ka sidutu ikakali.

²⁶ Upa o nyawa yamade isihabari ma ngale Ngohi de lo Ai dodoto. Sababu nagoona yamade isihabari, done Ngohi o Nyawa ma Duhutu lo asa ona toholu tanako, ma orasi Ngohi tahino kali o duniaku dede to Ngohi Ai kuasa, kiaka isikokelelo maro Ai Baba Awi kuasa, de Awi malaikat yadadala.

²⁷ Ngini tinisingangasu igogou, yamuruo naga to ngini nia sidongirabano done isone waasi, nakoso yanako waasi o Gikimoi Awi pareta igogou imasidiadoka.”

O Yesus o tala moika Awi mulia wasikelelo Awi muri-murika

²⁸ O Yesus wodoto komagena so o nahadi moi ipasaka, de wangaho Awi muri yaruwange, ena gena o Petrus, de o Yohanes, de o Yakobus itagi imatinga o tala moi ikukuruye, la kagena wosumbayang.

²⁹ To Una Awi sumbayang ma rabaka Una Awi jamani ingali, de Awi baju idadi daare de isiru.

³⁰ Imatodoka kanaga o nyawa yasinoto imatekebobicara de Una. Ona magena o nabi yasinoto o Musa de o Elia.

³¹ Ona yasinoto lo manga jamani isiru. De yobicara gena ma ngale o Yesus Awi sone kiaka itekawa asa wosiganapu o Yerusalem ma kotaka.

³² O orasi magena o Petrus de awi dodiao magena ona yakioloka. Ato yomomi, de asa yakelelo o Yesus Awi mulia isiru de ileto komagena lo o nyawa yasinoto Awi dateka.

³³ Ma orasi o nyawa yasinoto magena imasidailako imajobo, de o Petrus wotemo o Yesuska, “Baba Guru, daloha bai nakoso ngone lo ngo kanena, so o dadaru ngai saange miaaka, ngai moi to Ngona, ngai moi to Musa, de ngai moi lo to Elia.” (Patotiai gena o Petrus wanakowa o kia bilasu una wosibicara.)

³⁴ O Petrus ka wobicarasi, de o lobi-lobi o bolu moi iuti so yasaoka, sidago una de awi dodiao kagena lo yamodo.

³⁵ De o lobi-lobi ma rabano o ili moi iise itemo, “Una manena to Ngohi Ai Ngopa towihihirika. Ka Unaka bilasu niwisigise!”

³⁶ O ili magena imatogu, so ato imatodoka so yanano cawali o Yesus womatengoka. So ma orasi done iuti o talaku de ona yaruwange asa imasipongoka, o nyawa moi lo yasingangasuwa maro o kia ona yakokeleloka.

O Yesus o ngopa moi o toka wingongosa wisiloha

³⁷ Ma langika, ona iuti o talaku, de o nyawa yadadala yahino la iwimake o Yesus.

³⁸ Magena de o nyawa yadadala manga sidongirabano o nyawa moi womatoore wotemo, “Ya Baba Guru, kodo! Nowitailako ai ngopa. Una manena ai ngopa womatetengoka.

³⁹ Nakoso o toka wingosa iwisitodokano imatoore imaili-ilika, de iwisiwawako yapoputuruka, sidago awi uruno lo o geko isupu. O toka magena kanaga iwisangisara de lo iholu isupu unano.

⁴⁰ So ngohi togolo Ani muri-murika la yodusu o toka magena, duma ona yaakuwa.”

⁴¹ So kagena de Una wotemo onaka, “Idodooha ngini o bi nyawa o orasi manena! Igogou-gogou ngini manena o nyawa o Gikimoi Awi dupa niaholu de lo nia piricaya ihihiwa. Sidago o orasi muruosi Ngohi togoge dede ngini la tinisisabari nginika. Ce! Nako komagena o ngopa magena niwingahono kanena.” So ona o ngopa magena iwingaho Unaka.

⁴² Ma orasi o ngopa magena wotagi wimeta o Yesuska, de una wikokitoka magena awi rohe wosipapaka o tonaku, so awi rohe lo iira-iraka. De Una wodusu o toka magena de o ngopa magena wisilohaka. Dabolo de wotemo awi babaka, “Ani ngopa manena nowidehe. Una wilohaka.”

⁴³ So o nyawa yangodu yakelelo de yohairani o Gikimoi Awi kuasa ilalamo magena. Ma orasi o nyawa ka yohairanisi o moi-moi dangodu waaaka gena yakelelo de o Gikimoi Awi kuasa, de Una watemo Awi muri-murika,

Ma moili o Yesus Awi sone ma ngeko wodedemo

⁴⁴ “Niosininga de nimadiahi to Ngohi Ai demo manena: Ngohi o Nyawa ma Duhutu manena done asa isidoa Ai saturu manga gia ma sohaka.”

⁴⁵ Magena de Una Awi demo de Awi simodoto ma ngale gena kanaga isingangasu waasi so ona yanakowa, duma ona yamodo so yododato imasano Unaka.

Nagoona ifoloi ilamo o Gikimoi Awi simaka

⁴⁶ O Yesus Awi muri-muri imatekesikokoholu ma ngale nagoona foloi ilamo to ona manga sidongirabaka.

⁴⁷ Kagena de manga sininga ma takasiri Una wanako, so o ngopa wiceceke moi wingahono de wisigokono to Una Awi dateka,

⁴⁸ de wotemo onaka, “O nyawa nagoona la o ngopa manenaka iwidehe daloha sababu ona imote Ngohi, magena imatero de ona lo Ngohi idehe daloha. So o nyawa nagoona la Ngohi idehe daloha, ona manga manara magena lo ma meta Ai Babaka, sababu Ngohi Una woisulo so tahino. Nagoona so yasiceke to ngini nia sidongirabaka, ona magena foloi yolamo.”

Nagoona nanga dodiao de nanga saturu

⁴⁹ De o Yohanes wotemo o Yesuska, “Baba Guru, ngomi miwikelelo o nyawa moi o toka wodusu de to Ngona Ani ronga bai! So ngomi miwisimahawa, sababu una gena to ngomi mia dodiaowa.”

⁵⁰ Duma o Yesus wotemo, “Upa niwisimahawa una magena, sababu o nyawa la inalalawangiwa, ona magena to ngone nanga dodiao.”

O doku moi o Samaria ma daeraka o Yesus wiholu

⁵¹ Ma orasi he idumu o Yesus wodola witide o sorogaye, de Una wositatapu bilasu wokahika o Yerusalemka.

⁵² So Una Awi nyawa wimomote yamuruo naga wasulo la ona itagi idoma, de Una wotuuru. So idodoma ona magena o doku moi o Samaria ma daeraka iwosa la Awi sidailako yaaka kasi.

⁵³ Duma o doku magena asa yoholu Una iwidehe, sababu ona yanakoka Una Awi memeta o Yerusalemka.

⁵⁴ Ma orasi o Yakobus de o Yohanes yoise o doku magena ka iwiholu, so ona yotemo o Yesuska, “Jou, nako daloha de ngomi migolo o dipaka de o uku iuti la o doku magena yatupu bai!”

⁵⁵ Duma o Yesus womabulutu de ona wangamoka.

⁵⁶ Dabolo de ona yogila-gila yakahika o doku ma somoaka.

O nyawa lo itemo ona yodupa o Yesus wimote-mote

⁵⁷ Kagena manga dodagi ma rabaka, de o nyawa moi wahino Unano de wotemo, “Baba, ngohi todupa kekiaka bato notagi Ngona tonimote bai!”

⁵⁸ Duma o Yesus wosango wotemo, “O boulamo o pongaka de ma aru de lo o namo de ma igu, duma Ngohi o Nyawa ma Duhutu Ai ngihi ihiwa la ma ngale tomasidodogu.”

⁵⁹ Dabolo de Una witemo o nyawa moili, “Noimote Ngohi.” Duma una magena wotemo, “Baba, tanu noisimaha toliho kasi ma ngale ai baba wosone so towipoosu kasi, de ngohi asa Ngona tonimote.”

⁶⁰ Duma o Yesus wosangoli de ka woade-ade wotemo, “Dohaka, la o nyawa isosoneka ona masirete manga dodiao isosone gena asa yapoosu. Duma ngona gena notagi o habari, ma ngale o Gikimoi asa wopareta maro o kolano moi gena, nosihabari.”

⁶¹ Komagena lo kanaga o nyawa moili wotemo o Yesuska, “Baba, ngohi todupa tonimote, duma tanu noisimaha toliho kasi la ai tahu ma raba moika tomasingangasu kasi.”

⁶² O Yesus wotemo o nyawa una magenaka, “O nyawa la kanaga ipajeko gena, dalohawa nakoso imaginano manga duduka isidadu-dadu. O nyawa maro komagena manga manara asa itiaiwa, so idadiwa yomomanara o Gikimoi Awi pareta ma rabaka.”