Lukas 24 - O GIKIMOI AWI JAJI ma BUKU

O Yesus womomi de wooho kali

¹ O Nahadi ma wangeka so ka o goginita nosi o wange asa ibao, de o bi ngopedeka ona magena itagi o boosuka, o bi rapa isidadailakoka gena yaaho.

² Duma kagena imasidiado de yakelelo o teto ilalamo gena he iloloka.

³ So ona yowosa o boosu ma rabaka, we, yamakewa o Jou Yesus Awi sone ma bake.

⁴ Ona imaoko manga gamamu ma rabaka, de imatodoka kanaga manga dateka o nyawa yasinoto de manga baju ileleto-leto imasitibaku de imaokoye.

⁵ So ona yosawangi de foloi yomodo de yobukuku o tonaku, duma yasinoto magena yotemo onaka, “Awa, o kiaso ngini niwisari o nyawa woooho moi isosone manga sidongirabaka.

⁶ Kanena wihiwaka. Una wooho kali! Niososininga o kia Una winisingangasu dabolo nginika, ipapasaka ma orasi Una o Galileaka

⁷ wotemo, ‘O Nyawa ma Duhutu bilasu wisidoa o nyawa ma dorouka, so wisidasangahadika, de o wange saangeka Una asa wooho kali.’ ”

⁸ Kagena ona imasininga de igogou o Yesus Awi demo-demo magena.

⁹ So kagena o boosuka de ona yoliho so o kia naga idadadi dangodu magena isingangasu Awi muri-muri yamogiowo de moika de lo wimomote ma binukali.

¹⁰ O ngopedeka, kiaka isingongangasu, ona magena ongo Maria Magdalena, ongo Yohana, ongo Maria o Yakobus ma awa de lo o bi ngopedeka ma somoasi imakokomote dede ona.

¹¹ Ona isingangasuka, duma manga demo gena Awi muri-muri ona magena asa yopiricayawa, itemo manga demo gena cawali manga ade-ade masirete so itiaiwa.

¹² Duma nako o Petrus una magena woise de womagogora o boosuka. So kagena de una ka o boosu ma ngoraka, de womarukuku so ma rabaka womaginano. Eh? Kagena ka cawali o baro daaare ihadoku. Dabolo de una woliho awi tahuka de awi gamamuka, de womasosininga o kia idadadika.

O Yesus womasimane o nyawa wimomote yasinoto o Emaus ma ngekoka

¹³ O wange magena o Yesus wimomote yasinoto o Yerusalemno isupu yotagi yakahika o Emaus ma dokuka, ma gaku gena nagala o kilo mogiowo de moi.

¹⁴ Ona manga dodagi ma rabaka ma ngale o kia naga idadadika dangodu magena ona isibobicara.

¹⁵ Imabobicara de imakokasano moi de moika, de imatodoka o Yesus masirete wahino manga dateka de wotagi imakokomote dede ona.

¹⁶ Ona gena Una iwikelelo, duma kanaga o kia naga moi idadi onaka sidago yaakuwa Una iwinako.

¹⁷ Kagena de Una watemo, “O ngeko ma soaka kangano o kia ngini nisibicara.” De ona imatoguka, de manga sininga asa ipeleso.

¹⁸ Wimoi awi ronga o Kleopas wosano o Yesuska, “We! Ngona manena nagala o Yerusalemka asa nomasidiado, so o wange ipapasaka kanaga o kia idadadika gena ka nomatengo nanako waasi.”

¹⁹ O Yesus wotemo, “O kia idadadi.” So ona itemo, “Awadede! O kia idadadi gena o Yesus, o Nazaret ma nyawaka. Una o nabi moi de Awi demo de lo Awi manara gena ma rabaka kanaga de ma kuasa, bai o Gikimoi Awi simaka de lo o nyawa yangodu manga simaka.

²⁰ Duma o imamka ma bi sahe de lo nanga roriri Una wisidoa o bobaretaka la wisisala, so bilasu witooma. Dabolo de igogou ona Una iwisidasangahadika.

²¹ Ena momongo, ngomi miwingongano Una asa ngone o Israelka ma nyawa nanga saturuno wonapalako. O wange manena he o wange saange dabolo Una witoomaka.

²² O kiali, mia ngopedeka yamuruo naga imiaka so ngomi migamamuka, sababu kangano o goginita nosi de ona yotagi Awi boosuka,

²³ duma Awi sone ma bake yamake kawa. De ona imakiliho de imisingangasu ngomika, o malaikat yakelelo de lo o malaikat magena isingangasu o Yesus wooho kali.

²⁴ Kagena de mia dodiao yamuruo naga yahika o boosuka, de kagena yakelelo igogou imatero maro o kia o ngopedeka ona magena yodedemoka. Duma ona o Yesus wimakewa.”

²⁵ Dabolo de Una wotemo onaka, “Ngini igogou nifuma! Ngini nia sininga isidailako datemehe so niopiricayawa kiaka o bi nabi isingangasu idomaka.

²⁶ O Salamati ma Kolano Una magena bilasu idoma wingangapo de wisangisara, so dabolo asa wisioho kali de lo wisimulia so o bi moi-moi dangodu wapareta.”

²⁷ Kagena de o Yesus wadoto onaka o bi moi-moi o kia isilelefo o Gikimoi Awi Jaji ma Buku ma rabaka ma ngale Awi oho ma singangasu, ma solano o Musa awi lefoka de sidago o bi nabi manga lefo dangodu.

²⁸ So o doku kiaka ona ikokahikaka magena yadumu, de Una wodupa womaaka la wotagi wogila-gila,

²⁹ duma ona asa iwisimahawa, de yotemo Unaka, “Hino la kanena Ngona nomasidodogu kasi dede ngomi. Imada-madaka, so he daputu so.” So Una igogou womasidodogu kagena onaka.

³⁰ Ma orasi ona imatamiye la yoodo, de Una o roti wadehe Awi sukuru watide o Gikimoiye, de watepi-tepi, dabolo de wasitoku onaka.

³¹ Ato wasitokuka, de ona yanako Una gena o Yesus. De imatodoka Una wisisaka so ona iwikelelo kawa.

³² So ona imatekebicara yotemo, “We! So kangano o ngeko ma soaka de ngone nanga sininga maro isora, ma orasi Una wonabicara de lo o Gikimoi Awi Jaji ma Buku ma raba gena wonadoto itotiai ngoneka.”

³³ So o orasi magena dabolo de ona lo imajobo yoliho o Yerusalemka, de yamakeka o Yesus Awi muri yamogiowo de moi imatolomuno de o nyawa ma somoasi.

³⁴ Ona imatotolomu gena yotemo, “Igogou! Ma Jou wooho kali bai! Una womasimane o Simonka!”

³⁵ Kagena de ona yasinoto lo isihabari itotolomuka, kangano o ngeko ma soaka de o kia naga idadadi, ma orasi o roti watepi-tepi de ona yanako Una gena o Yesus.

O Yesus womasimane Awi muri-murika

³⁶ Ona ka imatekebobicarasi, de imatodokano o Yesus masirete lo asa womaoko to ona manga sidongirabaka, de wotemo, “Ai salam nginika! Tanu nia sininga ma rabaka igogou isosanangi.”

³⁷ Ona gena yatodoka de lo yamodo, sababu ona itemo nagala o toka yakelelo.

³⁸ De Una wotemo onaka, “Dadoohaso ngini nimodo de lo nidodato.

³⁹ Nianano kasi to Ngohi Ai gia de lo Ai dohu, sababu manena Ngohi masirete bai! Nisipada de nisitailako, sababu o toka ma lake de ma kobo gena ihiwa maro kanaga niakelelo Ngohika.”

⁴⁰ Dabolo de Una Awi gia de Awi dohu ma bi nabo wosikelelo onaka.

⁴¹ De ona gena maro yopiricaya waasi, ona yohairani icarawa so yanali. Komagena so Una wasano onaka wotemo, “Kanaga de nia ino?”

⁴² So o nao isosinanga o leta moi gena ona iwihike Unaka.

⁴³ De Una wadehe de waodo, la ona aku yakelelo igogou Una o toka wisowo.

⁴⁴ Dabolo de Una wotemo onaka, “Manena o kia naga tinisingangasu nginika, ma orasi idomaka de Ngohi kanaga dede nginisi. O bi moi-moi ma ngale Ngohi, kiaka o Jou Awi bobita o Musa de lo o bi nabi ma somoa isilelefo ma Buku ma rabaka de lo o Mazmur ma Bukuka gena, dangodu bilasu isiganapu.”

⁴⁵ Dabolo Una wasinako itiai, la ma ngale ona aku o Gikimoi Awi Jaji ma Buku ma ngale gena yosihoda daloha.

⁴⁶ So Una wotemo onaka, “O Gikimoi Awi Jaji ma Buku ma rabaka isilefo itemo, Ngohi o Salamati ma Kolano manena bilasu isususa de isangisara sidago itooma, dabolo de o wange saangeka asa tooho kali.

⁴⁷ De o habari daloloha gena bilasu de to Ngohi Ai ronga isihabari ma meta o bi nyawa yangoduka, la ma ngale ona manga dorouno imatoba de imatoduba de lo o Gikimoi waapongu. O habari magena bilasu isihabari ma meta o bi bangsa ma nyawa yangoduka, ma nonomaka o Yerusalemka.

⁴⁸ Ma ngale dangodu magegena ngini manena nidadi o saksi.

⁴⁹ Nimasosininga daloha, done Ngohi asa tosulo la o Gurumi Datetebi wouti kanena nginiku, maro Ai Baba wojajajika. Duma ngini bilasu niodamaha idoma o kota manenaka, sidago o Gikimoi winihike o kuasa nginika la ngini aku niputuru.”

O Yesus o sorogaye witide

⁵⁰ So de o Yesus wobicara dabolo de Una wangaho ona so wasisupu o kota ma duduka, sidago o Betania ma dateka. Kagena Awi gia watide la Awi laha wosidumu onaka.

⁵¹ Ato Awi laha wosidumuka asa Una witide de imakitinga so wakahika o sorogaye.

⁵² Kagena de ona yobukuku yosuba Unaka, dabolo de manga sininga gena foloi danali ona yoliho o Yerusalemka.

⁵³ De o wange isigeto-geto ona asa o Gikimoi Awi Tahuka igogeku de iwisigiliri Unaka.