Lukas 22 - O GIKIMOI AWI JAJI ma BUKU

O Yudas awi edekati o Yesus Awi saturuka wisiija

¹ O Roti ma Ragi Ihihiwa ma Rarame he idumu, gena isironga lo o Paskah ma Wange ma Rarame.

² O imamka ma bi sahe de o bi guru agama, sababu yamodo o nyawa yadadalaka, so ona manga edekati o ngeko isisari ma ngale o Yesus witago de witooma.

³ Kagena de o Yudas wisironga lo o Iskariot, o muri moi o Yesus Awi muri yamogiowo de sinoto manga dongirabano, una magenaka o Iblis asa wingosa de iwipareta.

⁴ So wotagi de imatekebicara de o imamka ma bi sahe de lo o Gikimoi Awi Tahu yojojajaga ma ngale ma ngeko idodooha o Yesus iwisiija.

⁵ So ona magena manga sininga imore de danali de wisijaji asa o pipi wihike unaka.

⁶ Una wosimote so kagena de wosolano o ngeko wosisari la o Yesus wisiija, de o nyawa yadadala ona magena moiwa yanako.

O Yesus de Awi muri-muri o Paskah ma ino yaodo

⁷ O orasi o Roti ma Ragi Ihihiwa ma Rarame imasidiadoka, de o wange ma nonomaka magena o Paskah ma duba-duba ma goho yatola.

⁸ O Yesus waaso o Petrus de o Yohanes, de wasulo onaka, “Nitagi la to ngone nanga Paskah ma ino nisidailako.”

⁹ De ona yosano Unaka, “Baba, kiaka nodupa ngomi misidailako.”

¹⁰ So wotemo onaka, “Ma orasi ngini kadoka niwosa o dokuka, done o nyawa moi niwimake o rube de ma akeka waaho. Una magena niwimote-mote sidago o tahu kiaka wowosa,

¹¹ de nitemo o tahu ma duhutu magenaka, ‘Baba Guru wosano, o ngihi kiaka Una de Awi muri-muri asa iodo o Paskah ma ino.’

¹² So o nyawa una magena asa wasidumu kadaku ma dokuka o ngihi moi ilalamo. Nako ma ngihi magena isidiahi de isidailako daboloka, ma meja de ma bako lo isifatoka. Kagena o ino nisidailako ma ngale ngone inangodu.”

¹³ Kagena de ona yotagi de kadoka ona yamake maro o kia Una wotetemo. So ona asa isidailako o Paskah ma ino magena.

O Jou Awi odo datetebi

¹⁴ La daputuku o tahu magenaka o Yesus de Awi muri yamogiowo de sinoto yogogeku yoodo.

¹⁵ De Una wotemo onaka, “O susa de o sangisara tamake waasi de Ngohi foloi todupa toodo o Paskah ma ino manena dede ngini.

¹⁶ Sababu Ngohi totemo, igogou Ngohi asa toodo kawa o Paskah ma ino manena sidago idadi la poodoli done o orasi ma simaka, nakoso o Gikimoi wopareta maro o kolano moi o duniaka.”

¹⁷ Kagena de Una o anggur ma udo-udo wadehe de Awi sukuru idola o Gikimoiye, de wotemo Awi muri-murika, “Manena niadehe de nisitoku,

¹⁸ sababu o orasi manena Ngohi totemo nginika, o orasi manena bato Ngohi done o anggur manena taudo kawa, sidago ma orasi imasidiadoka o Gikimoi wodadi o kolano o dunia damomuane ma raba kasi.”

¹⁹ Dabolo de Una magena kanaga o roti wadehe so Awi sukuru watide o Gikimoiye. Dabolo de o roti magena watepi-tepi de to Una Awi gia, de gila-gila Awi muri-murika wasitoku de wotemo, “Manena to Ngohi Ai rohe ((ma ngale ngini gena tinihikeka. Magena niaaka maro o sosininga moi Ngohika.”

²⁰ De komagena lo yoodo dabolo, de Una magena kanaga o anggur ma udo-udo wadehe de wotemo, “O udo-udo manena ma ngale to Ngohi Ai au ikokopola gena ma meta nginika, inisinako igogou o Gikimoi Awi jaji damomuane.))

²¹ Duma nianano! Naguuna done asa woisiiija Ngohi, una magena kanaga Ai dateka de woodo dede Ngohi bai!

²² Igogou, Ngohi o Nyawa ma Duhutu manena asa tosone maro o kia o Gikimoi wositatapuka. Duma naguuna woisiiija Ngohi, kodo, o nyawa una magena awi bodito datubuso!”

²³ O demo magena yoise, so Awi muri-muri imakokasano manga sidongirabano naguuna sidago asa waaka komagena.

O Yesus Awi muri-muri imasikoholu ma ngale nagoona yolamo

²⁴ Kagena de o Yesus Awi muri-muri imatekesikoholu moi de moika, ma ngale to ona manga sidongirabaka naguuna wieto ifoloi wolamo.

²⁵ So Una wotemo onaka, “Ngini ningodu nianako o Yahudika ma nyawa yasowo manga bobareta to ona manga kawasa yasidipito so manga oho isangisara. De o bobareta ngaroko yosidipito, duma ona magena yodupa ka yaaso ‘ona la kanaga de manga sininga ma loha o kawasaka’.

²⁶ Duma ngini upa komagena. Kanaga o ngeko moili, nagoona yodupa yolamo to ngini nia sidongirabaka ona magena bilasu imahadoku. De nagoona yopopareta ona magena bilasu ileleleani nginika.

²⁷ Upa ngini nitemo o nyawa nagoona ifoloi yolamo gena, ona magena la kanaga o nyawa yaleleani, duma igogou ona la yogogogeku o mejaka de yoodo. Ngaroko komagena, duma Ngohi kanaga to ngini nia sidongirabaka maro ka o nyawa ileleleani moi nginika.

²⁸ Ngini manena, to Ngohi Ai susa dangodu ma rabaka ngini salalu dede Ngohi.

²⁹ So maro Ai Baba Awi kuasa woihike Ngohika la Ngohi topareta, komagena lo Ngohi Ai kuasa asa tinihike nginika la ngini lo aku nipareta.

³⁰ Komagena so done ma orasi Ngohi todadi o Kolano to Ngohi Ai pareta ma rabaka, de ngini lo asa nikoro la niodo de porarame dede Ngohi, de lo asa nimatamiye o bi pareta ma kursika ma ngale o Israelka manga soa yamogiowo de sinoto gena niapareta.”

O Yesus wosingangasu o Petrus asa womanosu Unaka

³¹ Dabolo de o Jou Yesus wobicara o Simon Petruska wotemo, “Simon, Ngohi tonisingangasu, o Iblis wogolo de o Gikimoi iwisimaha unaka la ngini ningodu winibaja, maro wotototoro moi o tamo watado de o tamo ma soora gena asa waumo.

³² Duma Ngohi manena tosumbayang ma ngale ngona, la ani piricaya asa upa isisa. So done ani piricaya gena daputuru kali, de ngona bilasu ani dodiao manga sininga gena nosiputuru.”

³³ De o Petrus wotemo, “Jou, ngaroko ngohi bilasu ibui eko lo itooma, duma ngohi igogou ka tonimote Ngona bai!”

³⁴ So kagena de o Yesus wotemo, “Petrus, Ngohi tonisingangasu ngonaka, sutusi daputuka o toko isore waasi, de igogou ngona asa o nyawa manga simaka nomanosu notemo Ngohi noinakowa sidago lo ma para ma saange.”

O Yesus witago ma orasi gena he idumu so wasulo Awi muri-muri manga sininga isiputuru

³⁵ Dabolo de o Yesus watemo onaka, “Kangano ma orasi Ngohi tinisulo ngini la nitagi o habari daloloha nisihabari, de Ngohi asa tinisimahawa ngini nimagaho o pipi, eko lo o baro, eko o tarupa o sabi sinoto. Idodooha ngini kanaga niakurangi.” Ona yosango, “Hiwa!”

³⁶ Kagena de Una wotemo, “Ngaroko komagena, o orasi manena la nagoona kanaga de nia pipi, eko lo o baro de o maru bilasu nimagaho. De lo nagoona la kanaga nia sumarangi ihiwa, hika nia baju nisiija la o sumarangi moi nimaija.

³⁷ Sababu kanaga isilelefo o Gikimoi Awi Jaji ma Buku ma rabaka itemo, ‘Asa o Salamati ma Kolano wieto maro o nyawa ma dorou moi.’ De o kia naga isilelefo gena bilasu idadi Ngohika, sababu o kia naga ma ngale Ngohi manena isingangasu idomaka isilelefo o Gikimoi Awi Jaji ma Buku ma rabaka, magena o orasi manena he idadi.”

³⁸ De ona itemo, “Jou, nonano kanena naga ngomika o sumarangi ngai sinoto.” Una wotemo, “Dalohaka!”

O Yesus wosumbayang o Zaitun ma Talaka

³⁹ So dabolo de o Yesus o dokuka womahoika, de maro Awi biasa moi so wotagi kali o Zaitun ma Talaka, de lo Awi muri-muri wimote.

⁴⁰ So kagena imasidiadoka, de Una wotemo onaka, “Nisumbayang la nigolo upa sidago o babajaku nitura.”

⁴¹ La Una womatinga sutu ikuruka, de o tonaku wobukuku de wosumbayang,

⁴² de wotemo, “Ya Baba, nako yaaku, tanu natide la noisitilaku o sangisara ma ngeko manena. Duma upa namote to Ngohi Ai sininga ma dupa manena, la tanu idadi de imaaka ka to Ngona Ani sininga ma dupa.” [

⁴³ Kagena de o malaikat moi o sorogano wahino Unaka de iwisiputuru.

⁴⁴ Una Awi siningaka wamalo datubuso de isangisara sidago lo Una bilasu wosumbayang. Una Awi galasahu imatero maro o au itutu-tutu o tonaku.]

⁴⁵ Wosumbayang daboloka, de Una womaokoye de wokahino Awi muri-murino, de wamake ona yakioloka, sababu ma ngale manga sininga foloi ipeleso so ona ikakadu poli.

⁴⁶ So kagena de Una wotemo onaka, “He! Kiaso ngini nikiolo. Boloka! Nimomi, la nisumbayang de nigolo upa sidago o babajaku nitura.”

O Yesus iwitago

⁴⁷ Ma orasi o Yesus wobobicarasi, de imatodoka o nyawa yadadala imasidiado. De lo o Yudas, Awi muri moi yamogiowo de sinoto manga sidongirabano, una magena ona wangaho. Ona imasidiadoka, de o Yudas wotagi o Yesuska, wodupa witabea de wihame.

⁴⁸ Duma o Yesus wotemo unaka, “He, Yudas! So de ani hame gena ngona nodupa noisiija Ngohi, o Nyawa ma Duhutu!”

⁴⁹ Ma orasi Awi muri-muri ona magena yakelelo o kia naga asa idadi, de ona itemo, “Jou, to ngomi kanaga de mia sumarangi!”

⁵⁰ Ato iwitago, de kagena o nyawa moi wisioto ma Imam Wilalamo awi gilalo moika, so awi ngau ma girinaka lo waturaka.

⁵¹ De o Yesus wotemo, “Boloka!” So Una wapada o nyawa una magena awi ngauka so wosiloha kali.

⁵² Dabolo de o imamka ma bi sahe de lo o Gikimoi Awi Tahu yojajagaka nonena yahino la o Yesus iwitago, de Una wotemo onaka, “Dadoohaso ngini niaka maro Ngohi o nyawa ma dorou, sidago niahino o gogipongo de o sumarangi nigaho la Ngohi nitago.

⁵³ O wange isigeto-geto Ngohi todoto o Gikimoi Awi Tahuka de to ngini nia simaka, de dadoohaso Ngohi nitagowa. Duma o orasi manena idadi nginika de o bubutu ma kuasa so o dorou niaaka.”

O Petrus womanosu o Yesus

⁵⁴ So o nyawa ona magena o Yesus iwitago de iwingaho ma Imam Wilalamo awi tahuka. O Petrus manga duduno wototuuru o Yesus iwimote.

⁵⁵ O loloha magena ma sidongirabaka o uku itatahu la ma dateka imarahu isigilolino, de o Petrus lo kagena wogogeku dede ona.

⁵⁶ Kanaga o ngopedeka moi moleleleani ma Imam Wilalamoka mowikelelo o Petrus kagena womararahu, de mowinako so motemo, “O nyawa una magena o Yesus wimomote moi!”

⁵⁷ Duma una womanosu de wotemo moleleleanika, “Ngohi towinakowa o nyawa Una magena!”

⁵⁸ Itekawa, de o nyawa moili wikelelo de itemo, “He! Nagala ngona manena lo Una nowimomote.” Duma o Petrus wotemo kali, “Hiwa!”

⁵⁹ Done nagala o orasi moi ipasaka, de o nyawa moili wotemo, “Igogou, una manena to Yesus Awi dodiao moi, sababu una lo o Galilea ma nyawa.”

⁶⁰ Kagena de o Petrus wotemo, “Ngohi tanakowa o kia ngona notetemo gena!” O orasi magena dabolo una ka wobicarasi, de o toko isore,

⁶¹ de o Jou womabulutu de winano o Petruska. De o Petrus gena womasininga igogou ma nonomasi o Jou asa wisitemo dabolo unaka, “O toko isore waasi, de ngona he nomanosu nosipara ma saange.”

⁶² La una wosupu de woari wosodu-sodu.

O Yesus wisiihe de lo wingangapo

⁶³ O bi nyawa o Yesus witatago ona magena iwisiihe de iwingangapo,

⁶⁴ de to Una Awi lako yapokuka, de yotemo, “Hika, nakoso Ngona o nabi moi, nomisingangasu naguuna woningapo!”

⁶⁵ De kanagali o bi demo ma dorou idala wisiceke Unaka.

O Yesus o Mahkamah Agama manga simaka

⁶⁶ Ma orasi o goginita nosi, o Mahkamah Agama ena gena o imamka ma bi sahe, de o bi guru agama, de lo o Yahudika manga roriri ma binukasi, ona yangodu imatolomuno de o Yesus iwingaho kagena ona manga simaka.

⁶⁷ Ona magena wisano Unaka, “Nomisingangasu ngomika, igogou Ngona manena o Salamati ma Kolano?” Una wosango, “Ngaroko lo Ngohi tinisingangasu nginika, duma ngini asa nipiricayawa.

⁶⁸ De lo nakoso Ngohi tinisano nginika, de igogou ngini asa nisangowa.

⁶⁹ Duma ma orasi magena yaadoka, Ngohi o Nyawa ma Duhutu asa tomatamiye o Gikimoi Wokokuasa Awi girinaka.”

⁷⁰ De ona yangodu yotemo kali, “Nako komagena, de Ngona manena igogou o Gikimoi ma Ngopa?” Kagena de Una wosango wotemo, “Iya! Komagena maro kia ngini nitetemo.”

⁷¹ De ona yotemo, “Upa he o saksi posari kali bai! Ngone inangodu poise Awi sala Awi uruno masirete isupu.”