Ibrani 9 - O GIKIMOI AWI JAJI ma BUKU

O Gikimoi Awi Suba ma Dadaru idodomaka gena ka o nyawa yaaka

¹ Nako o Gikimoi Awi jaji idodomaka magena, kanaga de ma bobita ma ngale o suba ma ngeko de lo o suba ma tahu kiaka o nyawa yaaaka.

² Komagena o dadaru ilalamo moi isigoko de o baro isiperesuka, de ma rabaka lo kanaga o ngihi ngai sinoto magena lo de o baro isiperesu kali. O ngihi ma nonoma gena isironga o Ngihi Datetebi. Kagena ma rabaka kanaga o silo ma dadami de lo ma meja kiaka ma dokuka manga suba o roti yahado la isisuba o Gikimoika.

³ O ngihi magena ma rabaka kanaga o ngihi ma sinotoka lo de o baro isipoperesu, gena isironga o Ngihi Foloi Datetebi.

⁴ O ngihi magena ma rabaka kanaga o manyanyi yatutupu ma riho o guracino de lo o Gikimoi Awi jaji ma borua isilape de o guraci. De o borua magena ma rabaka kanaga o momolo moi o guracino ma ngale o ino manna kagena yadiahi, de o Harum awi didiki idodoma itotoorika, de lo o teto o leta sinoto ma dokuku yalefo o sulo ngai mogiowo o Gikimoino.

⁵ De lo o borua ma dokuku gena kanaga o kia naga ngai sinoto de o malaikat ma jamani, isironga o kerub. O kerub magena manga golupupu yodososeka o borua ma dadanu isitaru, sababu ma dadanu magena ma dokuka o Gikimoi Awi siru ma leto asa isimane. Ma dadanu magena isironga o dorou ma ija ma dadanu. Duma magena moi-moi dangodu o orasi manena upa he podedemo.

⁶ Komagena idodomaka o sidailako ma ngale o Jou Awi suba ma dadaruka. Dangodu isidailako daboloka, de o wange isigeto-geto o bi imam ona magena o ngihi ma nonomaka yowosa la manga manara yaaka.

⁷ Duma nako o ngihi ma sinotoka, kiaka isironga o Ngihi Foloi Datetebi, kagena cawali ka o taungu moi gena ka ma moi ma Imam Wilalamo womatengo kagena aku wowosa. De una wowosa, hitilahi o au waaho ma ngale wosisuba o Gikimoika la idadi awi dorou masirete ma ija de lo ma ija kiaka o nyawa manga dorou yananakowa.

⁸ De o bi bobita komagena o Gurumi Datetebi ngone wonadoto, nakoso o ngihi ma nonoma de maenasi, gena ma ngale o ngeko moi ihiwasi la o nyawa aku o ngihi ma sinotoka, ena gena o Ngihi Foloi Datetebika, kagena aku yowosa ma ngale o Gikimoi iwidate.

⁹ O orasi manena magena maro ka o nonako moi. Nakoso ngone nanga gaso o haiwani de lo nanga suba ma somoa gena posisuba o Gikimoika, maro o jaji idodoma ma bobitaka, gena yaakuwa nanga sininga isitiai la idadi pomasidate Unaka.

¹⁰ Ena gena, o bi bobita magena ka ma ngale o odo, o udo, de lo o nyawa manga adati de manga galepu ma bio idala gena yatebi. O bi bobita la ma ngale cawali nanga rohe, magena de ma faida sidago ma orasi yaado o Gikimoi Awi jaji damomuane gena waaka.

O Yesus manga Imam Wilalamo la womanara o Suba ma Dadaru foloisi daloloha

¹¹ Duma o orasi manenaka de ma Kristus womasidiadoka wodadi o jaji damomuane ma Imam Wilalamo la kanaga womanara o bi moi-moi kiaka daloloha. Una wowosa o Suba ma Dadaru o sorogaka, kiaka foloisi daloha de foloi datebi de o Suba ma Dadaru idodoma o Musa wosigogokoka. Sababu o suba ma dadaru ma Kristus wowowosaka gena o nyawa yaakawa, ena gena o dunia manena nowa.

¹² Una o dadaru magenaka wowosa wakahika o Ngihi Foloi Datetebi ma rabaka o Gikimoika womasidateka. De o au la kanaga wowosa waaho, gena o kabi ma nau eko o sapi ma ngopa ma au gena hiwa. Una asa ka Awi au masirete waaho. Ka ma moi wowosa, de upa he wosidadu kali, sababu Una de Awi au gena ma ngale ngone nanga dorouno wonapalako ka sidutu ikakali.

¹³ Maro o jaji idodomaka o bi bobita o Musa wosilelefo gena, nakoso o nyawa la kanaga o kia naga datotorouka yatigi sidago yasisalaka, de ona magenaku bilasu o kabi ma nau eko o sapi ma nau yatotola la ma au ikopola. De onaku lo bilasu o sapi ma ngopa yatutupu gena ma gaapo yasihaja. So nakoso o au de o gaapo magena aku o nyawa isasala manga rohe yatiodo so datebika,

¹⁴ de ma boboloili ma Kristus Awi au bai! De o Gurumi Datetebi wokokakali gena Awi buturu, ma Kristus Awi rohe wahike o Gikimoika maro o suba moi de ma kurangi moi lo ihiwa. De Una Awi au gena ngone nanga sininga watiodo so asa datebi sidago lo nanga manara de ma faida ihiwa, gena asa isisaka la ma ngale ngone aku o Gikimoi woooho gena powisuba de Awi manara paaka.

¹⁵ Komagena so ma Kristus gena asa wodadi maro o Gikimoi Awi dagali moi o jaji damomuane waaturu, la ma ngale o nyawa o Gikimoi waaasoka, ona magena aku yamake o moi-moi wojojajajika magena dangodu, kiaka Awi warisi ikokakali wosidailako onaka. Sababu ma Kristus asa wosoneka ma ngale ona manga dorou, kiaka o jaji idodomaka yatilakuka, so magenano aku wapalako.

¹⁶ Nako o pusaka ma surati, igogou o nyawa o surati yaaaka gena bilasu yosone kasi, dabolo de o pusaka magena aku isiregu.

¹⁷ Sababu nakoso o nyawa la kanaga o pusaka ma surati waaka la woohosi, de idadi waasi o pusaka ma surati akuwa itagali la iregu. Duma ma orasi wosoneka, de asa ka idadi o pusaka ma surati magena itagali la isikeregu.

¹⁸ So maro o pusaka ma surati moi, komagena lo o jaji idodomaka gena idadi waasi, nakoso o au o haiwani yatotola gena ikopola waasi.

¹⁹ Ma nonomaka, o Musa o bi sulo moi-moi dangodu kiaka o Gikimoi Awi bobita ma rabaka gena wasingangasu o bi Yahudi ma nyawaka. Dabolo de o kabi de o sapi ma ngopa yatolaka la ma au magena una wadehe de o ake wosicapu. Dabolo de una o ngangaru ma bi uma ma ronga o hisop isipopilikuka de o duba ma gogo dasosawala gena wadehe, so o au magenaku watono de wakopola o Bobita ma Bukuka de lo o nyawa yadala ona magenaka.

²⁰ De una onaka wotemo, “Manena o au la kanaga o Gikimoi Awi Jaji isiputuru nginika, ma ngale ngini niamote.”

²¹ De komagena lo una o au gena wakopolali o Gikimoi Awi Suba ma Dadaruka de lo o suba ma moi-moi dangoduka.

²² Igogou, maro o bi bobita o Musa wosilelefo gena o bi moi-moi he dangodu bilasu de o au isitebi. Nakoso o au ikopolawa, de idadiwa ngone nanga dorou gena akuwa isiapongu.

²³ So nako o Suba ma Dadaru o dunia manenaka de lo o suba ma moi-moi gena, dangodu maro ka o nonako o kia naga o sorogaka. O dadaru magena yatebi kasi bilasu komagena. Duma nako o Suba ma Dadaru o sorogaka gena, bilasu ma suba foloisi daloha.

²⁴ Sababu o Suba ma Dadaru kiaka ma Kristus wowowosaka magena, upa o nyawa manga gia siaaka gena isinonako o Suba ma Dadaru ma duhutu o sorogaka. Ka igogou Una wowosa o sorogaka de kagena o orasi manena wirisima o Gikimoika ma ngale ngone wonasigolo.

²⁵ So ma Kristus Una magena Awi rohe asa upa he o Gikimoi wihike wosidadu-dadu, gena imaterowa de o Yahudika manga Imam Wilalamo la kanaga o taungu moi ma moi o Ngihi Foloi Datetebi ma rabaka wowosa cawali ka o haiwani ma au waaho.

²⁶ Sababu nako komagena, de igogou ma solanoka o Gikimoi o dunia wasidadiku de kanaga he ma para ma dalaka Una bilasu wisangisara sidago lo wosone. Duma igogou o orasi manena he yadangade o dunia ma dodoguka de bilasu ka ma moi Una wahino womasimaneka, so Awi rohe wahike wosone la ma ngale ngone o nyawa nanga dorou gena wapiki.

²⁷ O Gikimoi wositatapuka bilasu o nyawa yosone ka ma moi, dabolo de ona manga loha de manga dorou ma sopo wahiri.

²⁸ So komagena lo ma Kristus. Ka ma moi wosone Awi rohe wahike o Gikimoika la o nyawa manga dorou wamoku. De o orasi moi done asa imasidiado de Una asa wahinoli ma sinotoka, upa ma ngale o dorou wamokuli, duma o nyawa Awi hino yododamaha ma ngale ona magena asa wasisalamati.