Gogelelo 21 - O GIKIMOI AWI JAJI ma BUKU

O bi moi-moi dangodu gena damomuane

¹ Kagena de asa ngohi takelelo he kanaga o soroga damomuane moi de lo o dunia damomuane moi. Sababu o soroga de o dunia idodoma gena ihiwaka, komagena lo o ngoloto.

² De kanaga lo o kota moi de o bi dorou datotorou moi lo ihiwaka so datetebi, de takelelo gena o kota damomuane moi, ena gena o Yerusalem asa iuti o sorogaku. Magena isidailako maro o ngopedeka moi mokakawi ma ngale ami roka gena o baju daloloha-loha imihike la momasitiba. O kota magena o Gikimoi kagena o sorogaka de asa wosigutiku.

³ De lo asa toise o pareta ma kursino o ili ilalamo moi itemo, “He! O Gikimoi Awi goge o orasi manena asa kanaga o nyawa manga sidongirabaka. Komagena so o nyawa ona magena asa yodadi to Una Awi nyawa de Una masirete lo asa wogoge dede ona, imatero maro to ona manga Gikimoi masirete.

⁴ So Una asa to ona manga sininga ma susa eko to ona manga o kongo gena, dangodu wapiki so wasisaka. De ona nagoona lo asa yosone kawa, yododora kawa, yoari kawa eko lo yasangisara kawa. Sababu o bi moi-moi idodoma dangodu asa isisaka.”

⁵ Magena de Una o pareta ma kursika womatatami gena asa wotemo, “He! Ngohi asa taaka so o bi moi-moi dangodu damuaneka. Hika o demo moi-moi magena nalefo idoma, sababu o demo-demo dangodu magena igogou so aku popiricaya.

⁶ De Ngohi lo tonidedemo o bi moi-moi taaaka dangodu itiai de daboloka. Ngohi manena Ai kuasa ma bati lo ihiwa, de Ngohi lo kanaga ma nonomaka, de lo ma dodoguka de lo asa tooho ma dodogu lo ihiwa. So Ngohi o oho ma gola gena asa taaka, so nakoso o nyawa la Ngohi gena idupa, de Ai dateka ona magena asa ioho ka sidutu ikakali. Maro o nyawa la kanaga manga kiri dadudu done tahike la o ake youdo, de o ake ma jobubuno magena yahike ma ngale upa he ona yafangu.

⁷ De lo o nyawa nakoso ona o dodoto ikokulai yaholu de Ngohi ipiricaya daputuru maro o prajurit moi imakudubu sidago lo watura, de ona magena asa Ngohi o bi moi-moi dangodu tahike onaka. De lo Ngohi asa todadi to ona manga Gikimoi, de ona asa yodadi to Ngohi Ai ngopaka.

⁸ Duma nakoso o bi nyawa ma dorou, ona magena asa yaumo o uku ma talaga ma rabaku la kagena asa yasidutupu de o walira, de komagena ona magena asa yosone ma sinotoka. O bi nyawa ma dorou ona yaumo gena, nakoso yobaraniwa, duma yoholu o Yesus Kristus wipiricaya daputuru. Ona magena manga manara dangodu datorou, ena gena ona yototooma, ona manga nyafusu datotorou yaaaka, ona igogomahate, ona o kia naga de manga gia isiakaka gena yasuba, de lo ona yatotodamato de hitilahi o manara datotorou yaaaka.”

O Yerusalem ma kota qamomuane

⁹ Dabolo de o malaikat yatumudingi ona idomaka o udo-udo de o bodito ma dodogu tumudingi iaaho, ona magena manga sidongirabano wimoi wahino ngohino, de wotemo, “Nahinosi, la ngohi tonisikelelo ngonaka mokakawi muna magena o Duba ma Goho to Una Awi pedeka.”

¹⁰ Kagena de o Gikimoi Awi Gurumi idahe ngohika ai sininga wapareta kali, so o malaikat una magena woingaho o tala ma doku ikukuru-kuruye. De kagena woisidumu o kota ilalamo moi de kagena o dorou moi lo ihiwa, ena gena o Yerusalem ma kota o sorogaka de o Gikimoi wosigutiku.

¹¹ Iutiku, de kanaga de to Una Awi kuasa ma mulia so ma nita gena maro o paramata dabobole ma soka moi ifoloisi daloha, gena o yaspis ma pudaki, de ma dodo koloko o kaca so ileto-leto.

¹² O kota magena kanaga ma sigilolino ma boberesu foloisi ikukuruye de ma ngora lo ngai mogiowo de sinoto. De ma ngoramoi-ngoramoika magena lo kanaga o malaikat yamogiowo de sinoto yojajaga. Kagena ma ngoramoi-ngoramoika lo isilefo o Israelka manga soa yamogiowo de sinoto ma ronga, so o ngora moika gena isilefo o ronga moi.

¹³ Ma boberesu o wange ma siwako kanaga o ngora saange de lo ma koremiaku o ngora saange, ma koresaraye o ngora saange de lo o wange ma dumusa o ngora saange.

¹⁴ O boberesu magena imaoko ma sosode o teto ngai mogiowo de sinoto ma dokuka. O sosode ma teto moi-moi magenaka kanaga o Duba ma Goho Awi sosulo yamogiowo de sinoto manga ronga moi-moi gena isilefoka.

¹⁵ O malaikat una magena to una awi giaka wacohono o didiki moi o guracino, la o kota magena watuga wakiloli, bai ma boberesu bai lo ma bi ngora-ngora.

¹⁶ So wotagi de o didiki o kota magena watugaka. O kota magena ipasagi iha so ma doduga gena ma gaku imatero lo de ma ngoha. Watugaka, de waeto ma gaku o stadia 12,000 (eko o kilo 2,400), de komagena lo ma ngoha bai lo ma gaku gena ka imaketero.

¹⁷ De lo watuga kali, ma boberesu waeto so ma gakuye o meter moributangaka, o malaikat ma doduga gena kanaga lo o nyawa ma biasa yapapake.

¹⁸ Ma boberesu magena isiaka de o teto paramata dabobole ma soka, o yaspis ma pudaki, o kota magena isiaka de o guraci ma duhutu, so isiru de idodo imatero de o kaca.

¹⁹ Ma boberesu magena ma sosode ma teto isiporomu de o paramata ma bio idala gena he dangodu. O sosode ma teto ma nonoma gena o paramata dabobole ma soka, o yaspis pudaki isiaka. Ma sinotoka o paramata foloi ihali de dabisi ma duhutu koloko o nao lidanga, ena gena o nilam. Ma saangeka o paramata daaare de datataro yatuo-tuo maro o kumo, gena o mirah. Ma ihaka o paramata dabobole ma sokali gena o zamrud.

²⁰ Ma motohaka o paramata yaliri-liri maro o karianga, duma daaare de dasosawala, gena o baiduri sepah. Ma butangaka o paramata dasosawala maro o dowora ma ake, gena o delima. Ma tumudingika o paramata dakokurati gena o ratna cempaka, ma tupaangeka o paramata dabibisili gena o pirus, ma siwoka o paramata dakokuratili gena o topas, ma mogiowoka o paramata idodo maro o marigapi gena o krisopras, ma mogiowo de moika o paramata dabibisi kali gena o lazuardi, de lo o teto ma mogiowo de sinotoka o paramata dauungu gena o kecubung.

²¹ Ma boberesu ma ngora mogiowo de sinoto magena gena o mutiara ngai mogiowo de sinoto so o ngora moi o mutiara ngai moika. O kota magena ma ngeko isiaka de o guraci ma duhutu, gena ma dodo maro o kaca ileleto-leto.

²² Kagena o kotaka asa ngohi tamakewa o Gikimoi Awi Tahu, sababu o Jou Wokokuasa de lo o Duba ma Goho Ona igogoge o kota ma rabaka.

²³ De o kota magenaka ngaroko upa he o wange eko o ngoosa ma siwa, sababu o Gikimoi gena Awi mulia ilamo so de to Una Awi nita ma siwa magena sidago lo o kotaka yodisiwa, komagena lo o Duba ma Goho Awi nita ma siwa.

²⁴ De o kota magena maro o nita yadisiwa o bi moi-moi dangoduka, so o bi nyawa yangodu o bi moi-moi itotiai gena aku yaaka. De lo o bi kolano yangodu asa yahino la iwosa, to ona manga horomati de manga kaya masirete magena yaaho de yatide isuba o Gikimoika de lo o Duba ma Gohoka.

²⁵ Sababu ngaroko o puputu kanaga idomaka so kota ma ngora-ngora ma boberesu asa iperesuka, duma o riho magenaka asa he dapuputu kawa so o ngora magena he yaperesu kawa.

²⁶ So komagena asa o nyawa o bi doku dangodu yahino la to ona manga horomati de manga kaya masirete gena yaaho de yatide isisuba o Gikimoika de lo o Duba ma Gohoka.

²⁷ So ka o nyawa nagoona lo yahiwa la kanaga manga sininga ma rabaka de o dorou, eko manga manara maro o Gikimoi waleleki, eko lo yatodamatoko. Duma kanaga ona magena ka cawali manga ronga isilefo kugena o buku ma rabaku, kiaka o nyawa ona magena yooho ka sidutu ikakali.