Gogelelo 18 - O GIKIMOI AWI JAJI ma BUKU

O Babel o kota ilalamo gena ituraba

¹ Dabolo de takelelo o malaikat moili o sorogaku woutili. Una wikuasa ilamo, de to una awi nita ileto-leto sidago lo o duniaku yodisiwa.

² Woutiku de womatoore womaili-ilika wotemo, “He! O Babel o kota ilalamo magena ituraba de ibiau daboloka. Kagena naga o bi gurumi ma dorou de o bi namo maro o kawi de o kodoba yangodu yahino, kagena de o bi sone ma bake magena yaodo.

³ Sababu o bi soano o nyawa yangodu yahino la o kota ma nyawa magena manga nyafusu ma dorou ilalamo yodupa so yaaka maro o dalu dapoputuru gena yaudoka so yanali. De komagena lo o bi kolano o duniaka de o nyawa imasiiija la o kaya asa yamake, sababu manga sininga ma dupa o kaya yodesere so manga sininga yapareta he yaaku kawa.”

⁴ Kagena de ngohi asa toise o ili moili o sorogano ibicara kugena o Gikimoi Awi nyawa o Babel ma rabaka, gena itemo, “He! Hika ngini Ai nyawa taika nisupu. Upa sidago o Babel ma dorou niamote so ngini lo niaaka komagena, de niamake o dorou ma fanggali gena o bodito datotorou.

⁵ Sababu o Babel manga dorou magena ilamo, maro o teto patopu so itopu ifoloi sidago he yaado o dipaye. So o Gikimoi wososininga so bilasu manga dorou magena wosifanggali de o sangisara datotubuso.

⁶ Maro o Babel manga dorou o nyawaka, komagena lo hika o dorou paaka o Babelka, ma ngale manga manara ma dorou moi-moi dangodu hika onaka lo pafanggali ma para ma sinoto kali la ifoloisi datubuso. Maro o dalu dacucuka o udo-udoku posicapu, so o cuka posipara ma sinotoli posicapu la foloisi daputuru.

⁷ Maro to ona manga sininga ma nyafusu la manga kaya yamake de foloisi imasihoromatika, ma lamo komagena so hika pasisangisara sidago ona idodora imatogu-toguwa. Sababu ona manga sininga ma rabaka itemo, ‘Ngohi manena maro o kolano o ngopedeka o pareta ma kursika mopopareta moi. Ngohi tobabalowa de done o orasi moi lo ihiwa asa o dodora tajamewa.’

⁸ Manga sininga komagena so ato imatodoka de o bi bodito yatapadu onaka, ena gena o panyake, o sone so yododora, o bare eko o ino ihiwa de lo o uku yasidutupu so yaukuka. Sababu o Gikimoi asa o dorou wasifanggali, Una magena o Jou wipoputuru so aku ona wasisangisara.

⁹ O bi kolano de o Babel ma kota ma nyawa, ena gena o nyafusu ma dorou ilalamo yaaaka de lo manga sininga ma nyafusu ilamo so o kaya yododesere, ona magena asa manga kota yogari de yododora. Yoari sababu yakelelo manga kota yatupu de idopo de dasisaka.

¹⁰ Ma ngale o kota magena ma sangisara ifoloi so ona yamodo de yatirine, so ma soa ikakakuka imaokoye. De ona imatoore itemo, ‘O bodito! O bodito! Kodo! O Babel gena o kota ilalamo de dapoputuru. We! Dadoohaso ma orasi ka o orasi moi ma raba de o Gikimoi wafanggalika to ngini nia dorou so o sangisara ilalamo lo niadoka.’

¹¹ O nyawa imasiiija ona magena lo kanaga asa iari ma ngale o Babel, sababu to ona manga alamu o kia naga yosiiija gena o nyawa lo asa yaija, gena ihiwa.

¹² Ena gena, manga alamu yaaaka o guraci, o salaka, o paramata de lo o mutiarano, o baro lenan daloloha gena de o baro dauungu, sutera de lo dasosawala, o gota dabobou de daloloha ma rupa idala, de o arata yaaaka o gadingno ma rupa idala de lo o gota ihahali, o tembaga, o besi de lo o teto marmer,

¹³ o gota ma kahi damumuti, o rapa-rapa, o manyanyi, o gososo dabobou de lo o silo damumuti, o anggur, o gososo o zaitun ma hutu ma sopono, o terigu tepung ihahali de lo o gandum, o sapi, o duba, o jara, o padati de lo o bi gilalo o manara datotubuso yaaaka.

¹⁴ So ona imasiiija gena asa itemo kali o Babel ma nyawaka, ‘Awa kodo! O bi moi-moi daloloha nia sininga ma dodungo de ma nyafusu gena dangodu asa isisaka. De lo to ngini nia alamu de nia arata dangodu lo he damataka so akuwa niamake kali.’

¹⁵ Ona o arata isiiija o kota ma nyawaka sidago o kaya yamake gena asa yamodoka maro kiaka o kota magena manga sangisara komagena upa sidago ona lo asa yadahe. So ka ma gakuka imaokoye de ka yoari de yododora.

¹⁶ De imatoore itemo kali, ‘O bodito! O bodito! Kodo! O Babel gena o kota ilalamo de dapoputuru. Idodoma o baju o baro lenan daloloha, de lo o baro dauungu de dasosawala nimasipake, de lo nimasisao o bi jojora o guraci, o paramata, de lo o mutiara.

¹⁷ Duma ka o orasi moi ma deka de nimatodoka gena to ngini nia kaya gena dangodu isisaka de niamake kawa.’ O nyawa o deruka wopopareta, o deruku ipapane, o deruka imomanara de lo o deruka ma nyawa manga barang isiiija ona yangodu de o Babel gena ma soa ma gakuka kagena imaokoye,

¹⁸ o uku o kota Babel yatutupu ma dopo gena ona yakelelo, de imatoore itemo kali, ‘He! O kota moi lo ihiwa imatero maro o kota ilalamo manena.’

¹⁹ Magena de ona iari de idodora kali, de ma ngale manga sininga ma peleso ifoloi poli gena ona manga saheku o gaapo imasihaja, de lo imatoore kali itemo, ‘O bodito! O bodito! Kodo! O Babel o kota ilalamo de dapoputuru. Kagena o deru ma rabaka o nyawa yalalago asa o kaya yamake, sababu manga arata gena idala de ma ija lo ihali. Duma kanaga ma deka cawali o orasi moi de o kota magena lo iturabaka.

²⁰ We! Hika ngini o sorogaka nigogoge, o Gikimoi Awi sosulo-sosulo de lo Awi nabi-nabi ningodu tanu nia sininga foloi isanangi. Sababu ma ngale idomaka ngini nisisangisara gena o Gikimoi o Babelka manga dorou gena wafanggalika de o sangisara datotorou, sidago lo o kota magena yabiauka.’ ”

²¹ Kagena de o malaikat wipoputuru moi asa o teto datotubuso moi wadehe de wosipaka womapela-pelaka o ngoloto ma rabaku dalutu, de wotemo, “Maro o teto dalutu komagena lo o Babel o kota ilalamo manena dangodu asa yaturaba so ihiwaka, sidago lo o kota magenaka yamake kawa.

²² O kota magena asa isisaka so poise kawa o musik ma ili o kecapi, o bangseli, de o trompet, de lo o nyanyi ma ili de ma lugo lo paise kawa. De pamake kawa o gia ma jojobo moi-moi eko lo o gandum yotututu.

²³ De lo kanaga pakelelo kawa o silo ma sora, eko lo poise kawa o kawi ma rarame. Maro komagena imadadi sababu o kotaka imasiiija o dunia ma rabaka ona gena ifoloisi yolamo, de ona magena kanaga de manga alamu moi-moi daloloha ona yasihaga o nyawa yangodu o dunia ma bi dokuka so ona lo o Gikimoi he iwidupa kawa, duma ka o arata yodupa.

²⁴ De lo o kota magena ma rabaka kanaga o bi nabi-nabi de o Gikimoi Awi nyawa de lo o dunia ma bi nyawa yatotooma gena yangodu kagena yatoomaka sidago manga au lo yauhika.”