Efesus 6 - O GIKIMOI AWI JAJI ma BUKU

O sitiari o ngopa-ngopa de lo manga dodihimoka

¹ Ngini o ngopa gena nako nia dodihimo hika niasigise, sababu ngini kanaga o Jou Yesus niwipiricayaka, so itiaika la magena bilasu niaaka.

^2-3 Nia baba de lo nia awa magena bilasu niahoromati la ma ngale ngini gena aku nioho daloha de nia umuru lo ikaku o dunia ma dokuka de nia taungu foloi ka idogo. Magegena o jaji daloloha moi ma nonomaka kanaga o Gikimoi Awi bobita ngai mogiowono.

⁴ De ngini nidadi o ngopa ma baba gena nako nia ngopa, hika upa niaaka so ona yatoosa, duma de o Jou Awi dodoto de Awi sitiari gena hika ona niasipalihara.

O sitiari o gilalo de manga tuangika

⁵ De lo ngini nako o gilalo gena, hika nia tuangika gena nia sininga itotiai de igogou niahoromati de lo niasigise, imatero maro ngini gena ma Kristus niwisigise.

⁶ Upa ka cawali ma orasi kanaga ona ininanano maro nia edekati gena nia giliri nisimane, duma nia manara gena niaaka foloisi nikaeli de daloha, maro ma Kristus Awi gilalo moi so o Gikimoi Awi dupa niamote.

⁷ Nia manara gena, hika niaaka de nia sininga igogou de danali, nimanara upa maro ka o nyawa nialeleani, duma nimanara maro ka o Jou niwileleani.

⁸ Sababu ngini nianako igogou nagoona la kanaga o loha o kia bato yaaaka, ngaroko o gilalo eko o gilalowa, gena asa o Jou Gikimoi wafanggali de o loha.

⁹ De ngini magena lo nakoso o gogilalo manga tuangi moi, upa niasimodo, duma hika nimasidiahi de niaaka daloha. Sababu nianakoka ngini lo kanaga de nia Tuangi moi kadaku o sorogaka, de lo Una gena upa o nyawa moi wasiguui de o nyawa moili wasitubuso, duma ona manga manara wafanggali ka itiai.

O nyawa ipipiricaya yasitero maro o bi prajurit ikudoti de manga daheka

¹⁰ Ma dodoguka, sababu ngini gena kanaga de o Jou nimarimoika de to Una Awi kuasa ma buturu lo niamamakeka, so bilasu nia piricaya magena hika nisiputuru.

¹¹ O kudoti ma bi dahe moi-moi, kekiaka o Gikimoi wosidodailakoka, gena dangodu-ngodu hika ngini niacoho la ma ngale o Iblis awi sihaga moi-moi gena akuwa niamote.

¹² Sababu ngone nanga kudoti ma rabaka gena o nyawa pasiholuwa. Duma ngone posiholu o kuasa moi-moi datotorou de ipopareta o ngawa-ngawaka gena o bi kuasa ma jako dangodu, koloko o toka, de o gurumi datotorou, de lo o kia bato o Gikimoi wihoholu.

¹³ Komagena so hika niacoho o kudoti ma bi dahe moi-moi kekiaka o Gikimoi gena dangodu-ngodu wosidodailakoka. La o kudoti ma orasi yaado la idadi, de ngini nia lawangi manga canga gena niorisima sidago o kudoti ma dodoguka de ngini gena nisiturawa.

¹⁴ So hika nia lawangi niorisima daputuru bai! De o Gikimoi Awi kudoti ma bi dahe moi-moi gena bilasu nimasidailako la nikudoti. So ngini bilasu o dodoto itotiai gena niacoho daputuru, magena maro nia doi ma bobiliku. Ngini bilasu o moi-moi o kia itotiai gena niaaka, magena maro nia baju besi la nimasijaga ma ngale upa nitura.

¹⁵ O habari daloloha, kekiaka o nyawa de o Gikimoi wasikadame, gena bilasu ngini niodupa de nisihabari, magena maro nia capato.

¹⁶ De lo ngini bilasu o Jou niwipiricaya daputuru, magena maro nia salawaku. Bilasu magena niocoho daputuru la o ngami ma doto dangodu lo aku niasone, kiaka o Iblis winisimemeta nginika.

¹⁷ De ngini bilasu niongongano daputuru gena igogou o Gikimoi winisalamatika, magena maro nia sarau besi nia saheku nisitotalake. De o Gikimoi Awi demo gena lo bilasu niacoho, maro nia sumarangi moi Awi Gurumi winihihikeka.

¹⁸ O moi-moi gena niaaka de magena ma rabaka ngini de Awi Gurumi ma buturu bilasu nia sumbayang o Gikimoika gena upa itogu, la salalu nimajaga de nimasidailako ma ngale Awi nyawa yangodu so aku nigolo Unaka.

¹⁹ De komagena hika ngohi lo nisisumbayang Unaka, la tanu Una asa o demo woihike, ma ngale ngohi aku tobarani tasingangasu o nyawaka o habari daloloha, kiaka ma orasi idodomaka o Gikimoi wosimane waasi.

²⁰ Sababu magena ma ngale ngohi maro Awi dagali moi so tosingangasu o nyawaka, sidago ngohi kanaga ipiliku o bui ma rabaka. So tanu ngohi nisisumbayang Unaka la igogou ngohi tasingangasu gena tomatoguwa.

O Paulus awi salam ma dodogu onaka

²¹ Ngohi asa o Tikhikus towisulo wahika nginika, la ai habari ma ngale ngohi de lo ai manara gena dangodu winisingangasu kasi nginika. Una gena nanga dodiao wopipiricaya de womomanara moi so ngohi towidodara ifoloi.

²² Una magena towisulo nginika gena ai edekati ngini winikurumi la ai habari winisiado so aku lo nia sininga wosiputuru.

²³ Ngohi tongongano o Baba Gikimoi de o Jou Yesus Kristus ngini ai dodiao nipipiricaya nia sininga yaaka so foloisi isanangi, de lo nia dodara de nia piricaya gena dangodu yosiputuru kali.

²⁴ Ngohi togolo tanu o Jou Awi laha ifoloi wodogo o nyawa yangoduka kekiaka to ona manga dodara nanga Jou Yesus Kristuska gena damatawa. Ngohi Paulus O Roma ma kotaka