Dodadi 9 - O GIKIMOI AWI JAJI ma BUKU

O Gikimoi Awi jaji o Nuhka

¹ So o orasi magenaka de o Gikimoi Awi laha wosidumu o Nuhka de lo awi ngopaka, so ona magenaka wotemo, “O ngopa nisibuo la foloisi nidala de o dunia niawedo kali.

² De o bi haiwani itatagi o dududuka, de o bi namo o ngawa-ngawaka, de lo o bi nao o teoka gena dangodu asa nginika inimodo, de ngini lo tinihike o buturu la dangodu maena asa niapareta.

³ De lo o bi moi-moi iooho dangodu magegena ngini tinihike la aku niaoodo, maro idomaka Ngohi tinihike o bi gaahu de o bi gota ma sopo.

⁴ Duma o bi moi-moi magegena sababu de o au so asa ioho. So ma lake gena nakoso ma au la iuhi waasi, de magena upa niaodo.

^5-6 De Ngohi o nyawa taaka de manga jamani tositero maro Ngohi, so tinisimahawa ngini gena upa o nyawa moi lo niatooma. O nyawa moi nakoso o nyawa yatooma de ona magena lo bilasu o nyawa yatooma. Eko lo o haiwani moi nakoso o nyawa yatooma de o haiwani magena lo bilasu yatooma.

⁷ So ngini gena hika o ngopa nisibuo la foloisi nidala de o dunia niawedo kali, de lo o bi moi-moi dangodu niapareta.

^8-9 Igogou-gogou Ngohi manena tinijaji ngona Nuhka de ani ngopa de ani danoku,

¹⁰ de lo ma ngale o bi moi-moi iooho de inimomote ngona, gena o bi haiwani damomoroi, de o bi haiwani ifofufuru, de lo o bi namo, dangodu magena o deru ilalamono isupu bilasu ioho o duniaka.

¹¹ Ngohi tinijaji igogou la upa ma moili asa Ngohi o taufani taaka eko o ake tosidola la o bi moi-moi dangodu iooho gena o duniaka tasisali.

^12-13 De to Ngohi Ai jaji magenena tosinonako igogou gena ma bati sidago o orasi ma dodoguka so o ngawate tahado o lobi-lobika isora, maro Ai jaji ma nonako moi o duniaka.

¹⁴ So done ma orasi o bi lobi tosikahino o dunia ma dokuka de o ngawate magena ibaoka,

¹⁵ de Ngohi manena asa tosininga Ai jaji gena tagogou nginika de o bi moi-moi ioohoka, gena upa sidago ma moili asa Ngohi de o taufani taaka la o bi moi-moi iooho dangodu tasisa.

^16-17 Magena to Ngohi Ai jaji ma nonako moi o bi moi-moi iooho o duniaka ma bati o orasi ma dodoguka. So ma orasi o ngawate takelelo de Ai jaji gena asa tosiningaka. Sidago kanena.”

O Nuh de awi ngopa yanau moi awi dorou

¹⁸ O Nuh una magena awi ngopa yaruwangeka manga ronga o Sem, de o Ham, de lo o Yafet. O Ham ma ngopa gena awi ronga o Kanaan.

¹⁹ De o nyawa done o dunia ma bi dokuka igogoge gena yangodu manga sihino o Nuh awi ngopa yaruwange ona magenano.

²⁰ O Nuh gena wototoro moi de una magegena o nyawa ma nonoma o anggur wodato.

²¹ O wange moika kanaga o doroka o anggur dasasahu gena waudoka, sidago widalu de wotagi awi dadaruka womaidu gena ka womawatoka.

²² Itekawa, de o Ham una magena asa o dadaru ma rabaka wowosa de wikelelo manga baba gena ka womawatoka. Wigalerika de wosupu so wosingangasu o Sem de o Yafetka.

²³ So ona yasinoto gena o baro palekati moi yadehe de yaliko manga belekaku de itagi manga babaka. So kagena de itagi imadosu iwosa o dadaru ma rabaka de manga baba awi rohe yatalakeka. Ona manga lako yapiloka ma ngale manga baba awi made gena upa yakelelo.

²⁴ Kagena de ma baba magena asa widalu itoguka so womomika, de awi ngopa wototongiraba ma baba awi made wakokelelo gena wanako,

²⁵ de wosibicara wotemo, “Ilaha! Gikimoi, tanu Ngona o Ham awi ngopa-ngopa o Kanaanka asa nasibobeto. Ma ngale ona gena awi ria de awi nongoru manga ngopa-ngopaka yasigise. Awi manara igogilalo bato sidago o nyawa yangodu lo widuhudu unaka.

²⁶ O Jou Ani ronga tanu ngone posilamo. Ngona magena o Sem awi Gikimoi. Tanu o Kanaan gena idadi o gilalo so wisigise o Semka.

²⁷ Tanu Ngona naaka la o Yafet una magena o tona ifoloi ilamo wapareta, de wogoge lo o Semka. Tanu o Ham awi ngopa-ngopa o Kanaanka de awi tahu ma raba moi lo gena ka yasigise onaka.”

²⁸ O taufani gena ihiwaka, de o Nuh awi umuru idogo kali o taungu 350.

²⁹ So awi umuru ma deka gena o taungu 950-ka, kagena de wosoneka.