Dodadi 7 - O GIKIMOI AWI JAJI ma BUKU

O nguuhi ilamo sidago idadi o taufani

¹ De o Jou wotemo kali o Nuhka, “Hika ngona de ani tahu ma raba moi ningodu nowosa o deru ma rabaka. Sababu o nyawa yangodu manga sidongirabaka ka cawali ngona gena o moi-moi o kia itotiai gena naaka o nyawaka.

² So naaho lo o bi haiwani o moi-moi de ma sabika gena tahirika asa idadi ani suba moi Ngohika, ena gena ma nau ngai tumudingi de ma bedeka ngai tumudingi, cawali o bi haiwani ma binuka de ma sabika gena ka ma nau moi de ma bedeka moi.

³ De naaho lo o bi namo moi-moi dangodu de ma sabika gena ma nau ngai tumudingi de ma bedeka ngai tumudingi. La ma ngale done itaufani kawa so o ake daduduka, de o bi moi-moi iooho gena dangodu asa aku ipuo kali.

⁴ Sababu o wange tumudingi ma simaka de Ngohi asa taaka so o duniaku imuura ma deka o wange moruha de o putu moruha. O bi moi-moi iooho de tosidadadika gena dangodu asa Ngohi tasisa.”

⁵ So o Nuh una magena wotagi o bi moi-moi kiaka o Gikimoi wisusuloka gena dangodu waaka kasi.

⁶ De ma orasi o taufani magena imasidiado de o Nuh una magena awi umuru o taungu ratu butangaka.

⁷ So kagena de o Nuh de ma pedeka de lo ma ngopa de manga pedeka ona yangodu o deru ilalamo magenaku yopaneka ma ngale upa sidago o taufani de yalutu.

⁸ O bi haiwani o moi-moi gena o Gikimoi wahirika ma ngale o suba moi Unaka, de o bi haiwani moi-moi ma binuka de ma sabika, de lo o bi namo moi-moi o dipaka lo de ma sabika,

⁹ maena gena dangodu ma nau de ma bedeka o Nuhno yahino de ipane o deru ilalamo ma rabaku. Idadi maro o kia Gikimoi o Nuhka wisulo.

^10-12 So o wange tumudingi ipasaka o Nuh awi umuru o taungu ratu butanga de o ngoosa ma sinotoka de ma wange mogiowo de tumudingika, de o lobi-lobi dakokipiri o dipaka so o muura ilamo poli, de lo o ake ma bi jobubu iluluku-lukuku gena dangodu asa ikopola de lo iwedo ma deka o wange moruha de o putu moruha.

¹³ Ngaroko komagena, o wange magegenaka una o Nuh o deru ilalamoku wopane daboloka, una de ma pedeka de lo awi ngopa yaruwange manga ronga o Sem, o Ham, de o Yafet, de lo manga pedeka.

^14-15 De kanaga o deru ilalamo ma rabaka lo o bi haiwani de ma sabika moi-moi dangodu ma nau moi de ma bedeka moi, ena gena o haiwani damomoroi, de o haiwani ifofufuru, de lo o haiwani o dududuka itatase, de kanaga lo o bi namo de ma sabika moi-moi dangodu ma nau moi de ma bedeka moi.

¹⁶ So magena dangodu o deru ma rabaka iwosaka, maro o kia o bi moi-moi o Gikimoi wosusuloka. O Nuh de ona yangodu ma rabaka yowosaka, de ma ngora magena o Jou waperesuka.

¹⁷ So kagena ma deka o wange moruha de o taufani magena itogu-toguwa, so o ake magena idola ifoloi ilamo, sidago lo o deru ilalamo magena lo aku yatide ikuruye.

¹⁸ Gila-gila o ake magena asa ifoloi idola de iwedo, so o deru ilalamo magena asa ka dadasi-dasi o ake ma dokuka.

¹⁹ O ake asa idola ifoloisi ilamo so o bi tala ibikukuruye lo dangodu dalutuka,

²⁰ sidago o tala ma doku magena dalutu o meter tumudingiku.

^21-23 So o bi moi-moi iooho o dunia ma dokuka asa isoneka. Komagena o haiwani damomoroi, de o haiwani ifofufuru, de o haiwani itatase o dududuka, de o bi namo, de o bi nyawa ona moi-moi o dududuka iooho magena dangodu lo isoneka. O bi moi-moi dangodu o Gikimoi wasisaka. Ka cawali o Nuh una magena woohosi de ona ma binuka o deru ilalamo magena ma rabaka.

²⁴ So o taufani o dunia ma dokuka magegena ma deka o wange 150.