Dodadi 6 - O GIKIMOI AWI JAJI ma BUKU

O nyawa manga dorou ifoloisi idogo

¹ So o nyawa gena asa o ngopa yasibuo la ifoloi yadala de o ngopa ngopedeka ona magena o dunia ma raba yodobiau,

² kanaga yanau ona o sorogano yanano ona magena foloi yaloha. So ona yanau nakoso o ngopedeka moi gena womidupa de muna magena asa womikawi de womasipedeka.

³ Komagena so o Jou Awi sininga ma rabaka asa wotemo, “Komagena ona idadi ka o nyawa so Ngohi Ai Gurumi asa igoge kawa o nyawa manga sininga ma rabaka. Ona manga oho ma deka gena ma bati ka o taungu 120.”

⁴ O orasi magena de ma duuruka kanaga lo o duniaka o nyawa gena manga rohe foloisi ilamo maro ka o raksasa. Ona magena o sorogano de manga pedeka ona magena yasibuo to ona manga ngopa-ngopa. De ona magena lo o nyawa idodoma-domaka so kanaga manga kuasa ilamo ma ngale itagi isikokudoti la manga ronga lo isilamo.

⁵ So kagena de o Jou wanako o nyawa yodupa o dorou yaaka foloisi idala. Komagena so o orasi isigeto-geto manga sininga de manga edekati gena dangodu itiai kawa de lo datorouka.

⁶ So Una Awi sininga ma rabaka wotemo, “Ma ngale ma nonomaka o nyawa tasidadi gena asa tosanangi kawa sidago Ai sininga ma susa maro o diha Ai kusi-kusi yaogu.

⁷ Sababu ona tasidadika gena Ngohi tomatoduba so o bi moi-moi iooho bai o bi nyawa de o bi haiwani de lo o bi namo tosidadadika gena dangodu asa tasisa.”

⁸ Ka cawali o Nuh una magenaka asa o Jou Awi laha wosidumu.

O Nuh awi jarita

^9-10 O Nuh awi jarita gena kanaga una de awi ngopa yaruwange, ena gena o Sem de o Ham, de lo o Yafet, de o bi nyawa yangodu manga sidongirabaka ka cawali una magena o moi-moi o kia itotiai gena waaka o nyawaka, de o nyawa moi lo akuwa awi sala yamake. Una magegena o moi-moi waakaka imatero maro una dede o Gikimoi imarimoika.

¹¹ Kanaga lo o nyawa ma binuka de ona magena yangodu manga sininga datorou, maro o dunia yasiwaro, de iholu o Gikimoi wisigise so o doku isigeto-geto ka o dorou yaaka.

¹² Kagena o bi doku isigeto-getoka o nyawa la o dorou yaaaka gena o Gikimoi wakelelo,

¹³ so wotemo o Nuhka, “Ngohi tositatapuka, sababu ka o bi doku isigeto-getoka o dorou foloisi yaaka, so o bi nyawa yangodu asa Ngohi tasisa bai o nyawa, bai lo o bi moi-moi iooho dangodu.

¹⁴ Hika o orasi manena ngona o deru ilalamo-lamo moi nomagaka o gota datotogoino, de kagena ma rabaka gena bilasu lo de ma ngihi nabati-batika. Komagena o deru ma rabaka de ma duduno bilasu lo o aspal nosilape ma ifa nosiperesu.

¹⁵ De ani deru ma doduga gena bilasu ma gaku o meter 133, de kanaga ma ngoha gena o meter monahalo de sinoto, de lo ma guruye o meter mogiowo de saange.

¹⁶ De kanaga ma rabaka gena ma doku, de ma litimi, de lo ma dongirabaka o ngihi ma bati-bati gena, bilasu nosilape. De kanaga lo ma gumuruno gena bilasu naperesu de o ngora moi nogaka. Komagena o deru ma dokuno gena de ma katuka, ma katu de ma boberesu gena ma soa koloko o jangela o senti moruha de iha.

¹⁷ Igogou-gogou, Ngohi manena done asa o nguuhi ilalamo moi taaka sidago idadi o taufani ma ngale o bi moi-moi iooho o duniaka gena dangodu isone de tasisaka.

¹⁸ Ka cawali ngona gena asa Ngohi tonijaji, so hika ngona notagi o deru magenaka nowosa, ngona de ani pedeka de lo ani ngopa-ngopa de manga pedeka.

^19-20 De o bi haiwani moi-moi lo bilasu naaho de ma sabika, de o bi namo moi-moi lo de ma sabika, ena gena ma nau moi de ma bedeka, ma ngale ona magena napalihara la aku ioho.

²¹ De ma ngale ona de ngini lo bilasu o bi ino moi-moi nosidailako de noaho. Hika ngona naaka komagena.”

²² Bolo, de o nyawa yanau awi ronga o Nuh una magena wotagi so o bi moi-moi maro o Gikimoi wisusuloka gena waaka dangoduka.