Dodadi 50 - O GIKIMOI AWI JAJI ma BUKU

¹ Kagena de o dangi ma dokuka manga baba magena awi sone ma bakesa o Yusuf womasipaka, de woari, ma baba wikololono.

² Wikololo dabolo de una waaso o bi nyawa isosouka, de wasulo onaka wotemo, “Ai baba awi sone ma bake magena niasou ma ngale upa ibaka, mote to ngone nanga adati de nanga galepu.”

³ Komagena ma deka o wange moruha ona ma baba awi sone magena yasou, maro to ona manga adati de manga galepu. De o Mesir ma bi nyawa yangodu ma ngale o Yusuf ma baba gena ona idodora ma deka o wange moritumudingi.

⁴ Ma orasi idodora ma wange gena ipasaka, de o Yusuf wotagi ma Firaun awi nyawa yalalagoka, de wotemo, “Baba-baba, nako daloha de tanu ma Kolano Firaunka niwidedemo,

⁵ sababu ma orasi ai baba awi sone he idumuka de una ngohi woigolo la tojaji igogou done awi sone ma bake asa tapoosu o Kanaan ma tonaka. Kiaka kanaga o boosu yaaaka o teto ma aru ma rabaka de lo wosidailako de wosuloka la awi boosu ma riho yapuaweka. Kodo, tokahie ai baba towipoosu gena tanu ka woisimaha, dabolo de asa tokahino kali.”

⁶ Ma Firaun widedemoka, de wosango, “Ai wakil, notagi bato la ani baba nowipoosu, maro ngona nowijaji daboloka.”

^7-9 So komagena o Yusuf asa womajobo, wotagi wokahie la ma baba wipoosu. Una de awi tahu ma raba moi yangodu, awi gianongoru yangodu, de lo manga baba awi tahu ma rabaka yangodu. Kanaga manga pedeka, manga ngopa, de lo manga duba de manga kabi gena igogesi o Gosyen ma pidoka. Kagena o Yusuf wotagi gena o nyawa lo ka yadala o Yusuf iwimomote. O nyawa ona magena ma Firaun awi tahu ma leleani manga bi sahe yangodu de lo awi nyawa yalalago yangodu, ona manga padati-padati de manga jara lo yaaho so iwimote.

¹⁰ Yahie kadaku o Kanaan ma tona o Yordan ma Selera ma dateka, de o gandum yatututu ma riho o Goren-Haatad ma dokuka, kagena yododora foloi ilamo. Yododora komagena ma ngale o Yusuf ma baba awi sone so ma deka o wange tumudingi una gena bilasu ma kapalang eko o sone ma butu waaka.

¹¹ De o Kanaanka ma nyawa o Goren-Haatadka ona manga dodora yoise de yotemo, “Wewe! Ona o Mesir ma nyawa gena manga dodora ka ilamo bai.” Ma ngale komagena so o riho magegena isironga lo o Abel-Mizraim (magena ma ngale o Mesirka ma bi nyawa manga dodora).

¹² Bolo, o Yakub awi ngopa yanau yaaka maro o kia una wasulo onaka.

¹³ So awi sone ma bake gena o Kanaan ma tonaka yaahoka. Yaaho ma ngale yapoosu kadoka o Mamre ma doku ma dateka, kanaga o Makhpela ma tonaka kiaka o boosu magena yaaaka o teto ma aru ma rabaka. O tona magena o Abraham wamake ma orasi o Efron o Het ma nyawa moi to una awi doro gena waija la ma ngale o tona magenaku una womapoosu.

¹⁴ Awi baba wipoosu daboloka, de o Yusuf o Mesirka woliho kali. So una, de awi gianongoru de lo o nyawa ma binuka wimomote ma baba awi sone ma bake yapopoosu gena, ona yangodu iliho kali o Mesirno.

O Yusuf awi ria-ria manga sininga wasiputuru la aku iwipiricaya

¹⁵ Manga baba wosone so wipoosu ilihono, o Yusuf awi ria-ria imatekebicara moi de moika itemo, “Hika! Ma ngale idodoma o sangisara o Yusuf powigakaka, so nagala una wonadoosaka, so awi edekati nagala ngone asa wonafanggali de o sangisara.”

¹⁶ So manga gogolo moi asa o nyawa yasulo la iwidedemo o Yusufka, gena itemo, “Nanga baba wosone waasi de una wobeseso ngomika,

¹⁷ bilasu minigolo ngonaka la ngaroko mia sala de mia dorou idala ngonaka, duma upa nomisisala ngomika. Ngomi manena lo o Gikimoika miwisuba, so mia sala ngonaka gena tanu upa nomisisala kali.” O Yusuf gena woise ma ngale manga modo unaka, de asa ka woari.

¹⁸ Dabolo awi ria-ria ona magena yahino to una awi simaka imabukuku, de yotemo, “Kodo! Ngomi manena lo to ngona ani gilalo, so o manara kia datotubuso gena ka miaaka de o gaji upa lo miamake.”

¹⁹ Duma o Yusuf wotemo onaka, “We! Ai ria-ria, upa nimodo bai. Ngohi manena maro o Gikimoi gena komagenawa. So upa sidago lo to ngini nia dorou de nia loha tahiri so nia dorou de tafanggali.

²⁰ Ngini nia edekati gena ma ngale ngohi nisangisara. Duma o Gikimoi Awi edekati gena ngini winisimaha ngohi nisangisara ma ngale nginika done asa o loha waaka. Sababu ngohi dede Awi kuasa ngini de lo o nyawa yadadala tasisalamati la upa yosone, so komagena o loha taaka o nyawa yadadalaka.

²¹ So upa he nimodo. Sababu ngohi masirete asa tomasidailako so ngini de nia ngopa ningodu lo nia oho daloha de nisusa kawa.” So komagena una de awi demo damuudu asa awi ria-ria manga sininga wosiputuru.

O Yusuf awi sone

²² O Yusuf gena wogogogesi kagena o Mesir ma tonaka, una de awi gianongoru de manga tahu ma raba moi-moi. De una awi umuru ma dala o taungu 150-ka.

²³ Komagena so una wooho sidago o Efraim awi ngopaku to una awi dano manga ngopa-ngopa lo gena ka wakelelosi. De sidago lo awi dano o Makhir, ena gena o Manasye awi ngopaku, to una awi ngopa-ngopa ona magena lo wadehe de lo wasigoge awi tahu ma rabaka, maro ka to una awi gianongoru masirete.

²⁴ So una magena awi ria-riaka wasingangasu wotemo, “O orasi manena dabolo done asa ngohi tosone. Duma nanga Gikimoi Una magena asa ngini winiriwo bai, de o tona manenaka de asa winingaho o tona kiaka o Abraham, o Ishak, de o Yakub ona magena wajaji idomaka.

²⁵ So done winiriwo de winingaho, de ngohi ai sone ma bake bilasu ngini lo niatota la kagena niapoosu.”

²⁶ De o Yusuf awi umuru o taungu 150 de wosoneka. Awi sone ma bake magena yasou ma ngale upa ibaka, de kagena o Mesir ma tona kasi de o bakili ma rabaka yongado isidodiahika, duma wipoosu waasi.