Dodadi 5 - O GIKIMOI AWI JAJI ma BUKU

O Adamka de sidago lo o Nuh manga sihino

¹ Manena gena o lefo o Adam awi ngopa de awi danoku. Gena ma orasi o Gikimoi o nyawa wasidadi de o nyawa magena imatero de to Una Awi jamani.

² Komagena o nyawa yanau de o ngopedeka wosidadi. De o wange magena dabolo Awi laha wasidumu onaka de wotemo, “Ona manga ronga o bi nyawa.”

³ De o Adam una magena awi umuru o taungu 130-ka, de ma pedeka mosibuo o ngopa yanau moi una awi ronga o Set de awi jamani ma baba wisigoge (ma ngale gena o cocatu moi).

⁴ O Set wisibuoka, de o Adam awi umuru idogo o taungu 800-ka de asa ma pedeka mosibuo kali o ngopa yanau de o ngopedeka ona magena inonongoruku.

⁵ So awi umuru ma deka gena o taungu 930-ka, kagena de wosoneka.

⁶ De o Set una awi umuru o taungu 105-ka, de ma pedeka mosibuo o ngopa yanau moi awi ronga o Enos.

⁷ O Enos wisibuoka de o Set awi umuru idogo o taungu 807-ka, de asa ma pedeka mosibuo kali o ngopa yanau de o ngopedeka ona magena inonongoruku.

⁸ So awi umuru ma deka gena o taungu 912-ka, kagena de wosoneka.

⁹ De o Enos magena awi umuru o taungu 90-ka, de ma pedeka mosibuo o ngopa yanau moi awi ronga o Kenan.

¹⁰ O Kenan wisibuoka de o Enos awi umuru idogo o taungu 815-ka, de asa ma pedeka mosibuo kali o ngopa yanau de o ngopedeka ona magena inonongoruku.

¹¹ So awi umuru ma deka gena o taungu 905-ka, kagena de wosoneka.

¹² De o Kenan magena awi umuru o taungu 70-ka, de ma pedeka mosibuo o ngopa yanau moi awi ronga o Mahalaleel.

¹³ O Mahalaleel wisibuoka de o Kenan awi umuru idogo o taungu 840-ka, de asa ma pedeka mosibuo kali o ngopa yanau de o ngopedeka ona magena inonongoruku.

¹⁴ So awi umuru ma deka gena o taungu 910-ka, kagena de wosoneka.

¹⁵ De o Mahalaleel magena awi umuru o taungu 65-ka, de ma pedeka mosibuo o ngopa yanau moi awi ronga o Yared.

¹⁶ O Yared wisibuoka de o Mahalaleel awi umuru idogo kali o taungu 830-ka, de asa ma pedeka mosibuo kali o ngopa yanau de o ngopedeka ona magena inonongoruku.

¹⁷ So awi umuru ma deka gena o taungu 895-ka, kagena de wosoneka.

¹⁸ De o Yared magena awi umuru o taungu 162-ka, de ma pedeka mosibuo o ngopa yanau moi awi ronga o Henokh.

¹⁹ O Henokh wisibuoka de o Yared awi umuru idogo o taungu 800-ka, de asa ma pedeka mosibuo kali o ngopa yanau de o ngopedeka ona magena inonongoruku.

²⁰ So awi umuru ma deka gena o taungu 962-ka, kagena de wosoneka.

²¹ De o Henokh magena awi umuru o taungu 65-ka, de ma pedeka mosibuo o ngopa yanau moi awi ronga o Metusalah.

²² O Henokh una magena o moi-moi waakaka imatero de una dede o Gikimoi imarimoika. Awi ngopa o Metusalah wisibuoka de o Henokh awi umuru idogo o taungu 300-ka, de asa ma pedeka mosibuo kali o ngopa yanau de o ngopedeka ona magena inonongoruku.

²³ So awi umuru ma deka gena o taungu 365-ka.

²⁴ De una dede o Gikimoi imarimoika de una asa o duniaka iwihiwa, sababu una magena o Gikimoi asa witideka.

²⁵ De o Metusalah magena awi umuru o taungu 187-ka, de ma pedeka mosibuo o ngopa yanau moi awi ronga o Lamekh.

²⁶ O Lamekh wisibuoka de o Metusalah awi umuru idogo o taungu 782-ka, de asa ma pedeka mosibuo kali o ngopa yanau de o ngopedeka ona magena inonongoruku.

²⁷ So awi umuru ma deka gena o taungu 969-ka, kagena de wosoneka.

²⁸ De o Lamekh magena awi umuru o taungu 182-ka, de ma pedeka mosibuo o ngopa yanau moi

²⁹ de una asa wisironga o Nuh wotemo, “Towisironga komagena sababu una manena done asa wonagalusiri to ngone nanga sangisara ma rabaka. Gena idomaka o Gikimoi o tona wosibobetoka so ngone pomanara bilasu datubuso de nanga galasahu ma giliho asa aku ngone paodo.” (Nako o bahasa Ibrani ma demo “Nuh” gena ma beto he imatero de o demo moi de ma ngale gena o galusiri.)

³⁰ O Nuh wisibuoka de o Lamekh awi umuru idogo o taungu 595-ka, de asa ma pedeka mosibuo kali o ngopa yanau de o ngopedeka ona magena inonongoruku.

³¹ So awi umuru ma deka gena o taungu 777-ka, kagena de wosoneka.

³² De o Nuh una magena asa awi umuru o taungu 500-ka, de ma pedeka mosibuoka o ngopa yaruwange manga ronga o Sem, de o Ham, de lo wononongoruku o Yafet.