Dodadi 49 - O GIKIMOI AWI JAJI ma BUKU

O Yakub ma ngale awi ngopa yanau gena wogolo tanu o Gikimoi Awi laha wasidumu

¹ So kagena de awi ngopa yanau yamogiowo de sinoto gena yangodu watolomuno. So ona imatamiye de una wobeseso kali, awi ngopa-ngopaka wotemo, “Ai ngopa-ngopa, o bi kia naga moi-moi done idadi de imaaka o orasi ma simaka gena, o orasi manena asa ngohi tinisingangasu de tinidedemo nginika.

² Ngohi Yakub nia baba. Ngini gena ai ngopa-ngopa, nimatolumu de nirisima. Ngohi Israel ai beseso tosibicara, niise gena o loha.

³ Ruben, ngona ai ngopa o ria, ngohi ai buturu ma sopo, nopareta itiai ani buturu nosikelelo.

⁴ Duma o nyafusu gena nibaja, maro o ake iruwahe komagena lo ani siningaka, sidago ai pedeka nomisiidu ai dangika o dorou naaka ai giliri naumo de nafaja.

⁵ Simeon de Lewi, nimarimote nitagi nikudoti la nimahie.

⁶ Nitoosa so o nyawa niatooma, manga sapi ma dedeli lo niaotoka. Nia edekati ngohi tamotewa, ngohi taholu de todupawa.

⁷ Nia doosa ilamo icarawa, nia ngamo ka datorou. Magena o Gikimoi wakutuku done nia ngopa de nia danoku wosibiau ai tona ma rabaka manga goge imakokitingaka.

⁸ Yehuda, ngona manena done ani gianongoru nigiliri. Ani lawangi ka nisuba ani gianongoru ka nihoromati.

⁹ Ai ngopa Yehuda, ani buturu maro o singa ngo ma nau, ma ino ngo yatago, yaodo de iliho. O talaka imasiwoma imaidu imawuli upa sidago lo patigi komagena ani lawangi nimodo ngonaka.

¹⁰ Ngona ani ngopa de ani dano done o nyawa yapareta, ipareta imatoguwa sidago o nyawa moi ngo wahino. Una magena wihiri de wisulo wahino wopareta so o bi doku yangodu lo wisigise ka ka una bai.

^11-12 Yehuda, ngona gena done asa nosanangi ani kia moi lo upa ikurangi. Ani haiwani napapalihara ani ino gena doroka done ma sopo ka ilamo, ani odo de ani udo lo ka daloha icarawa.

¹³ Zebulon, ngona done ani tona o teo ma date, o jiko isosohi so o deru ilalamo lo yodupa itulu. Komagena lo o Sidon ma kota isibati lo ani tona ma dudusa.

^14-15 Isakhar, done nanano ani tona o wange de o putu daloha so nodupa, gena sininga ma buturu. Sidago ani ngopa de ani dano ngaroko manga tuan yasidipito manga dupa yaaka o manara datubuso, upa sidago manga tona yodongosa. Maro o keledai dapoputuru ma gina datubuso ma soaka imaidu.

¹⁶ Dan, ngona maro gena o soa moika ma bobareta ani ngopa de ani dano manga dorou de manga loha nahiri itiai de itero.

¹⁷ Dan, ngona done noboditoli maro o ngihia o ngeko ma dateka, o jara ma tutuene yagoli o nyawa wopapane lo woturaka.

¹⁸ O Jou, ngohi masirete toningongano o sangisara ma rabano asa noisisalamati.

¹⁹ Gad, done ngona o nyawa ikokoora nikoora. Duma asa ngona nomakiliho so nanihi de nakoora kali.

²⁰ Asyer, done ani tona ma ino daloha de idala, damonge so yobaluka o bi kolano ka yadupa.

²¹ Naftali, done ngona, ani ngopa de ani dano o bobaretaka igogewa o nyawa ma somoa niparetawa. Maro o maijanga ma bedeka ipuo ma ngopa ka daloha yaparetawa de itagika.

²² Yusuf, done ngona manena ani ngopa de ani dano idala, sidago yodobiau o doku ma somoaka igoge o bi tona ma sigilolika. Maro o ake ma lako ma dateka kanaga maro o gumi o rarao moi, ma sago ka idala isangi ikiloli.

²³ Ngona gena ani gianongoru nidoosa de nisangisara maro o nyawa yongangami manga ngami ipidi daputuru.

²⁴ Duma ngona nidahewa inisisalamati de nisisupu maro o nyawa wongangami moi awi gia ka daputuru. Sababu ai Jou Gikimoi Wilalamo gena woijaga, Una maro o sowohi moi awi duba ka wojaga. Maro o tahu ma teto moi ma sosode dapoputuru, komagena ai Jou Gikimoi ai sininga ma buturu.

²⁵ Gikimoi Una gena wonijaga wonisisalamati ngona. O Jou Wilalamo wosidumu Awi laha. Gena o ake o dipaku de o tonaye, ani ngopa de ani dano done ka yadala.

²⁶ O tala ikukuruye ma rabano o moi-moi daloloha lo pamake, duma ani baba ai loha gena o Jou Gikimoino foloi ilamo ngo tadehe. Yusuf, tanu magena ngo dangodu lo ngona o Jou wonihike, ani gianongoru ma rabano ngona o Jou Gikimoi wonihihiri.

²⁷ Benyamin, done ngona ani ngopa de ani danoku manga nonau ka daputuru maro o haiwani boulamo dasapi de dabaulaco. O wange de o putu ma lawangi ngo yatago yagoli de yaodo.”

²⁸ So komagena manga baba wasingangasu awi ngopa moi de moika, idodooha done o orasi ma simaka manga ngopa de manga danoka o Gikimoi asa o laha wahike, mote Una Awi dupa masirete.

O Yakub awi sone

^29-30 Bolo manga baba wobeseso kali wotemo, “O orasi manena dabolo ngohi done asa tosone. So todupa ai sone gena ngini niapoosu ai baba de ai ete manga dateka, kadoka o Kanaan ma tonaka o Mamre ma dokuka, kiaka kanaga o Makhpela ma dokuka o boosu magena yaaka o teto ma aru ma rabaka. Magena ai ete Abraham wamake ma orasi o Efron o Het ma nyawa moi to una awi doro gena waijaka, la o tona magenaku una womapoosu.

^31-32 De kagena o teto magena ma rabaka o Abraham de ma pedeka ongo Sara yapoosuka, de ai baba o Ishak de ai awa ongo Ribka lo yapoosuka, de lo ngohi ai pedeka ongo Lea lo kagena tomipoosu kali. So komagena ngohi manena lo bilasu o teto ma aru magena ma rabaka ipoosu.”

³³ Kagena de to una awi singangasu de awi beseso wosiboloka, de womaidu awi dangisa, de o orasi magena dabolo una he wowoma kawa so wosoneka.