Dodadi 48 - O GIKIMOI AWI JAJI ma BUKU

O Yakub o loha wogolo ma ngale awi dano yasinoto o Manasye de o Efraim

¹ La o moi-moi magena ipasaka de kanaga o nyawa iwisingangasu o Yusufka itemo, “Tuan, ani baba gena wopanyake.” So o Yusuf wotagi awi ngopa yasinoto o Manasye de o Efraim wangoso de ona yaruwange gena ikahika ma baba o Yakubka.

² Yahika de manga babaka wisingangasu, “Ani ngopa Yusuf wahino wonikurumi bai.” De o Yakub gena womaputuru sidago awi dangika womaiduka, de womomi so womatamiye.

³ So kagena de wotemo awi ngopa o Yusufka, “Ai ngopa, idomaka o Gikimoi Wilalamo womasimane ngohika, kadoka o Lus (isironga lo o Betel) ma dokuka o Kanaan ma tonaka, de kagena Awi laha woisidumu ngohika.

⁴ De lo wotemo, ‘Ngohi done asa taaka so ani ngopa de ani dano gena done ifoloisi idogo de yadala. De lo taaka so ani ngopa de ani danoku done asa yobuo-buo sidago de ma sihino onano o bi bangsa o duniaka foloi idala. So ngini ningoduka asa o tona manena tinihikeka, la magena maro nia pusaka masirete so nigoge ka sidutu ikakali.’

⁵ So, ai ngopa Yusuf, ani ngopa yanau yasinoto o Manasye de o Efraim ma orasi ngohi o Mesirno tahino waasi de yasibuoka, ona magena o orasi manena imatero de to ngohi ai ngopa masirete. So maro ai ngopa o Ruben de o Simeon gena done ai pusaka magena yamake, so ona lo maro ai ngopa masirete so done ai pusaka lo yamake.

⁶ So nako ma duuruka, la kanaga de ani ngopa yanau ona magena maro ka to ngona masirete. So inonongoru ona magena to ona manga pusaka masirete gena upa he yamake, duma yamake gena maro ka yoriria o Manasye de o Efraim to ona manga ngopaku.

⁷ Komagena ngohi taaka ma ngale ani awa ongo Rahel. Muna tomisiboboso gena ma orasi o Padanka de mitagi o Kanaan ma tonaka so o Efrata ma doku he miadumuka, de kagena muna mosoneka. So o ngeko ikokahika o Betlehemka (isironga lo o Efrata) kagena ma soaka tomipoosu.”

^8-10 Kagena wipereki de awi lako he ipilo so o Yusuf awi ngopa yasinoto gena wanano, duma wotemo, “Ona manena naguuna awi ngopa.” De o Yusuf wotemo, “Ona manena to ngohi ai ngopa yanau kanena o Mesirka de o Gikimoi woihike ngohika.” So ma baba wosulo, “Nako komagena, de ona magena nangaho ngohino, la ngohi aku togolo o Gikimoi Awi laha wasidumu onaka.” So una o Yusuf awi ngopa yasinoto gena wangaho ma baba awi uguka wasidateku, de awi baba asa ona yasinoto magena wahame de wakololo.

¹¹ De awi baba wotemo unaka, “Idodoma asa ai sininga ma rabaka ngohi he toningongano kawa done aku ngona tonikelelo kali. Duma o Gikimoi woisimahasi la o orasi manena bai to ngona ani ngopa bai aku takelelosi.”

¹² Wakololoka, de o Yusuf awi ngopa ma baba awi ugu ma dateka gena wangoso de wobukuku de wisuba ma babaka.

¹³ Bolo, awi ngopa o Efraim wingaho ma baba awi gubalika, de o Manasye gena wingaho ma baba awi girinaka.

¹⁴ Wangahoka, de ngaroko o Efraim gena wononongoru, duma ma baba awi gia ma girina gena ka o Efraim awi saheku wahado. De awi gia ma gubali gena wahado woriria o Manasye awi saheku, so awi gia gena wositagalika.

¹⁵ Wahadoka, de o Yusuf de ma ngopa lo gena ma baba o Yakub, wiaso lo o Israel, una magena o Gikimoi Awi laha wogolo, de wotemo, “Baba Gikimoi to Ngona Ani simaka ai baba de ete idodomaka o Abraham de o Ishak o moi-moi yaakaka gena ona de Ngona nimarimoika. Ngona Jou Lahatala maro o duba ma jojaga komagena lo noipaliharaka o wange de o putuka.

¹⁶ Ya, Jou! Ya, Jou! Maro o Malaikat Ngona nomasimaneka o nyawa yodupa ngohi isosone ona moi-moi noisireseka. Ngohi ai gogolo moi Ngona Jouye tonibaja, tanu Ani loha ifoloi nahike ai ngopa manenaka. Tanu ai ngopa manga dala idogo foloi ka icala. O nyawa yangodu yanako ai ngopa lo ai dano ona manena ngohino, komagena lo o Abraham de o Ishakno.”

¹⁷ Ato o Yusuf womaginano kanaga ma baba awi gia ma girina gena ka o Efraim awi saheku wahado. Magena una wodupawa, so ma baba awi gia gena wacoho de watuluru so una woriria o Manasye awi sahe ma dokuku wahadoka.

¹⁸ De o Yusuf wotemo, “Ai baba, komagenawa! Una manena o ngopa woriria. Hika to una manena awi saheku ani gia ma girina nahado.”

¹⁹ Duma ma baba woholu de wotemo, “Ai ngopa, bai! Ngohi manena tanako de tosihoda foloi daloha. Una woriria magena lo awi ngopa de awi dano done asa manga doku ilamo. Duma awi nongoru manena done asa ifoloi wolamo, de lo awi ngopa de awi dano asa manga doku lo ifoloisi ilamo de idala.”

²⁰ De lo o wange magena wogolo kali o Gikimoika la Awi laha wosidumu onaka wotemo, “Tanu de to ngini nia ronga done o orasi ma simaka o Israel ma nyawa asa o Gikimoika la Awi laha yagolo de yotemo, ‘Tanu o Gikimoi Awi laha wosidumu ngonaka, maro Awi laha wasidumu o Efraim de o Manasyeka.’ ” So komagena wososininga o Efraim gena foloi wilamo de ma ria o Manasye.

²¹ Bolo, de asa wosibeseso o Yusufka wotemo, “Ai ngopa, ngohi ai sone ma orasi gena he idumuka, duma ngini gena nanga Gikimoi asa winidongosawa de lo waaka la done kadoka o Kanaan ma tonaka, to ngini nia baba de nia ete manga tonaka, kagena aku niliho kali.

²² Komagena so, upa he ani ria-riaka, duma ka ngonaka bato tonihike to ngohi ai tona masirete moi gena ma nonomaka to Amori ma nyawa manga tona duma tadeheka de ai sumarangi de lo ai ngami ma doto.”