Dodadi 47 - O GIKIMOI AWI JAJI ma BUKU

¹ Bolo, o Yusuf wotagi ma Firaunka, de wotemo, “Baba Firaun, ai baba, de awi tahu ma raba, de lo awi ngopa de manga tahu ma raba moi-moi ona yangodu o Kanaan ma tonano gena imasidiadoka, de manena naga o Gosyen ma pidoka yogoge.”

² So o Yusuf awi ria yamotoha wahirika de wasirisima ma Firaunka.

³ Yahika awi simaka, de ma Firaun wotemo onaka, “So o Kanaanka nia manara gena o kia.” “Baba Firaun, ngomi manena ka migohiduurusi de o bi duba miojajaga de o bi haiwani mipapalihara, maro idodoma mia ete de mia toporasi.

⁴ So, baba, ngomi nonena gena o Mesirno mikahino la kanena migoge, sababu kadoka o Kanaan ma dokuka mia ino damataka, sidago lo o dumule dangodu isoneka de ihiwaka. So mia duba de mia kabi gena he iodo kawa. So nako yaaku, tanu ngona nomisayangi de ani sininga ma loha la aku nomisimaha ngomi kagena o Gosyen ma pidoka migoge.”

⁵ So kagena de ma Firaun wotemo o Yusufka, “Ngona ani baba de ani gianongoru gena yaadoka,

⁶ so tonihike o Mesir ma tona dangodu la ma ngale o tona kiaka foloisi daloha gena nahiri la idadi maro ka to ona manga tona de manga goge masirete. So nakoso ona yahiri o Gosyen ma pidoka, gena komagenaka bato. De lo nakoso onaka la kanaga o manara o haiwani yojajaga gena yanako daloha, de tanu o nyawa ona magena natide la idadi to ngohi ai nyawa o haiwani yojajaga gena yapareta.”

⁷ Kagena de o Yusuf asa ma baba o Yakub gena wingoso de wisirisima ma Kolano Firaunka. Wahika awi simaka, de manga baba o Yakub wotemo, “Ngohi togolo to ngomi mia Jou Gikimoika tanu Una Awi laha moi-moi wonisidumu ngonaka.”

⁸ De ma Firaun wotemo, “Baba, so ngona manena ani umuru he o taungu muruoka.”

⁹ “Baba, ngohi manena o dunia ma bi dokuka totagi-tagi ma deka he o taungu 160-ka. O taungu ma dala magena ma rabaka kanaga ai susa de ai sangisara la ka idala, duma ai taungu ma dala gena yaado waasi dede to ngohi ai ete de ai topora manga oho ma deka.”

¹⁰ Bolo, manga baba magena o Gikimoi Awi laha moi-moi wogolo kali la wisidumu ma Kolano Firaunka, so dabolo de awi simano gena wosupuka.

¹¹ Yahika de una o Yusuf wasiaturu la awi baba de awi gianongoru gena yogoge o Mesir ma tona daloha-lohaka, kagena o Gosyen done isironga lo o Rameses ma pido ma rabaka, maro ma Firaun awi dupa.

¹² De lo wasiaturu so o ino isitoku manga tahu moi-moika isieto, mote o tahu de manga ngopa ma dala. So isanangi yogoge o Gosyen ma pidoka o Mesir ma tona ma rabaka.

Ma orasi o Yusuf awi aturu o ino ihiwa gena he ma dodoguka

¹³ Kanaga de o Mesir ma bi doku de lo o Kanaan ma bi dokuka ona yangodu manga ino gena ihiwa-hiwaka.

¹⁴ Sidago lo ma ngale ka o ino ma ija gena to ona manga pipi he dangodu gena o Yusuf watolomuka, de asa wahike ma Firaunka.

¹⁵ So manga pipi lo damataka. Damataka, so o Mesir ma nyawa ona yahino o Yusufka itemo, “Kodo, baba! To ngomi mia pipi lo ihiwaka. Tanu o ino sutu nomihike bai. Upa sidago ngomi mingodu asa misone.”

¹⁶ So una o Yusuf wotemo, “Nako komagena de hika nia haiwani niapapalihara gena niaaho ngohino. Nakoso niaahoka, de asa ngohi tositagali de o ino.”

¹⁷ Bolo, ona magena manga haiwani yapapalihara gena yaaho de una wositagali de o ino. Komagena so to ona manga duba, manga kabi, manga sapi, manga keledai de lo manga jara magena una wositagali de o ino so ona o taungu magena lo aku ona de manga ino so ka iohosi.

¹⁸ So de o taungu magena ipasaka de ona o Yusufka yahika kali itemo, “Baba, kodo! Ngomi manena mia pipi damataka, de mia haiwani miapapalihara lo dangodu he ngona natolomuka, de magena miaihu idadiwa. So mia kia naga moi lo ihiwaka, ka cawali to ngomi mia rohe masirete de lo mia tona lo o ino misitagali kali.

¹⁹ Tanu upa misone bai de upa mia tona lo miatoro kawa. So tuan, tanu ngomi masirete de lo mia tona moi-moi gena naijaka ma ngale o ino mimasitagali. Komagena lo ngomi asa midadi ma Kolano Firaun awi gilalo de o manara o kia datotubuso gena ka miaaka de mia tona lo idadi ka to una masirete awi tona. Komagena so tanu o ino nomihike kali, la aku mioho de upa misone de upa lo mia tona miatoro kawa.”

^20-21 Bolo, so kagena de o Yusuf gena o Mesir ma nyawa manga tona dangodu wadehe de wosiija ma Firaunka. So komagena o Mesir ma bi nyawa ona yangodu manga tona isiija ma Firaunka, so o tona dangodu idadi ka to una awi tona masirete. De lo o Yusuf waaturu so ona o Mesir ma nyawa yangodu maro ma Firaun awi gilalo so o manara datotubuso lo ka yaaka. Sababu manga ino foloisi isusa, so nakoso manga tona la isiijawa, done asa isone.

²² Ka cawali o Mesir ma bi imam manga tona gena isiijawa, sababu ma biasa ona gena manga ino ka ma Firaunno wahike de wasitoku.

²³ So o Yusuf waijaka de waaturu kali wotemo, “Baba-baba, ngini o Mesirka ma nyawa ningodu. To ngini nia tona moi-moi tosiijaka ma Kolano Firaunka so o tona dangodu gena idadi ka to una awi tona masireteka. De lo taaturu so ngini ningodu gena maro ka ma Firaun awi gilalo so o manara datotubuso bilasu ka niaaka. So o gisisi manena tinihike so hika nitagi la nia doroka niodato.

²⁴ So done ma orasi o gugutu yaado la niauutuka, de o gimina motoha gena o regu moi ma Firaunka niwihike. De ma ino ma binuka gena ma ngale nia doro ma gisisi de lo nia odo masirete, bai ngini de nia tahu ma nyawa de lo nia ngopa yangodu.”

²⁵ De ona itemo, “Ya, tuan! Ngona ani aturu gena daloha, maro o kia ngone paaka magena ma rabaka ma ngale to ngone nanga oho, la upa posangisara de posone. Komagena so tanu ma ngale ngomi manena upa ngona ani sininga ikurangi de lo o loha nomisidumu gena upa nomatogu. De ngomi mingodu, ngaroko ma Firaun awi manara datotubuso miaaka gena, upa lo he womibangu bai.”

²⁶ Komagena so asa o Yusuf o bobita moi wositatapuka, la o Mesir ma nyawa yangodu nakoso o gugutu ma orasika la manga ino yauutuka, de o gimina motoha gena o regu moi to ma Firaun awi gimina. Ka cawali o Mesir ma bi imam manga gugutu upa ma Firaunka wihike.

²⁷ So o Yakub awi nyawa (yasiaso o Israel ma nyawa lo), ona igogoge o Gosyen ma pidoka gena, o tona yamake de manga ngopa de manga dano lo idogo foloisi yadala.

²⁸ Mutuwade o Yakub una magena o Mesir ma tonaka wogoge o taungu mogiowo de tumudingika, sidago una awi umuru gena o taungu 147.

²⁹ So awi sone ma orasi he idumuka, de una ma ngopa o Yusuf wiaso de wotemo unaka, “Ai ngopa, nako daloha de tanu ani gia nahado ai ugu ma litimika. Nahadoka de nojaji ngohika, igogou done asa o loha naaka ifoloi de nosiganapu ngohika. So ma orasi ngohi tosone de upa lo kanena o Mesirka noipoosu,

³⁰ duma togolo ai sone ma bake natota kadoka ai baba de ai ete manga boosu ma dateka, la kagena ngohi noipoosu.” De una wotemo, “Ya baba, maro o kia notemoka, done taaka komagena.”

³¹ Duma ma baba wotemo, “Wade! Bilasu nosasi kasi bai.” So awi ngopa o Yusuf gena wosasi kasi ma baba awi simaka. De ma baba wipopereki gena womasidorifa awi dangi ma dateka de wosuba awi Jou Gikimoika.