Dodadi 46 - O GIKIMOI AWI JAJI ma BUKU

Manga baba o Yakub wotagi wokahika o Mesirka

¹ Bolo, manga baba Yakub, una magena wisiaso lo o Israel, una awi alamu moi-moi dangodu wosidailakoka so womajobo o Mesirka. Kagena o Bersyeba ma dokuka awi gaso awi haiwani moi watola ma ngale awi suba moi watide o Gikimoika, maro idomaka awi baba o Ishak lo iwisubaka.

² Awi suba watide so o putu itongiraba de o gogelelo moi o Gikimoino wamake gena ma rabaka o Gikimoi wobicara unaka, de iwiaso-aso, “Yakub!” “Ya, Jou.”

³ De o Gikimoi wotemo, “Nakoso to ngona ani Gikimoi de lo to ngona ani baba awi Gikimoi gena Ngohi manena dabolo. So ma ngale nouti nakahuku o Mesir ma dokuku gena upa he ngona nimodo. Sababu kagena done asa Ngohi taaka so to ngona ani ngopa de ani dano manga ronga gena asa ilamo.

⁴ Ngona notagi o Mesirka gena tonimote de done asa ani ngopa de ani dano lo tasigiliho kali. De ma orasi ngona nosone gena ani ngopa o Yusuf asa kanaga ani dateka.”

⁵ Bolo, manga baba una magena awi ronga o Yakub womasidailako so o Bersyebaka de womajoboli o Mesirka. So awi ngopa yanau ona manga pedeka, de manga ngopa-ngopa, de lo manga baba gena yangodu o gorobaku ipane, o goroba magena idoma ma Firaun wahike de wosidingoka ma ngale ona yasikahino.

^6-7 O gorobaku yasibaneka, so de manga haiwani yapapalihara, de manga bi alamu moi-moi, komagena lo o Yakub de kanaga awi ngopa yanau de lo ngopedeka, bai lo awi dano yanau de lo ngopedeka, ona yangodu imajobo de itagi kudahu o Mesir ma tonaku ikahuku.

⁸ Ma duuruka o Yakub gena, wiaso lo o Israel, una awi ngopa de awi danoku yakahika o Mesirka, de ona yanau yangodu gena o baba moi duma o awa gena iregu so manga awa gena yaruha. So ona manga baba Yakub de una ma pedeka ma nonoma ami ronga ongo Lea gena manga ngopa yanau yabutangaka, ona magena: O Ruben, o Simeon, o Lewi, o Yehuda, o Isakhar de wononongoruku o Zebulon.

⁹ So woriria o Ruben gena una asa awi ngopa yanau o Henokh, o Palu, o Hezron de lo o Karmi.

¹⁰ De o Simeon una asa awi ngopa yanau o Yemuel, o Yamin, o Ohad, o Yakhin de lo o Zohar. Wononongoruku gena awi awa o Yahudika ma nyawa misowo duma o Kanaan ma nyawa.

¹¹ De o Lewi una asa awi ngopa yanau o Gerson, o Kehat, de lo o Merari.

¹² De o Yehuda una asa awi ngopa yanau o Er, o Onan, o Syela, o Peres de lo o Zerah. (Duma yasinoto o Er de o Onan gena idomaka o Kanaan ma tonaka de isoneka.) Awi ngopa o Peres gena awi ngopa yanau o Hezron de o Hamul.

¹³ De o Isakhar una asa awi ngopa yanau o Tola, o Pua, o Ayub de lo o Simron.

¹⁴ So wononongoruku o Zebulon gena una asa awi ngopa yanau o Sered, o Elon de o Yahleel.

¹⁵ Komagena o Yakub de ma pedeka ongo Lea manga ngopa yanau yabutanga, kagena o Padan-Aram ma dokuka mopuo, ona de lo o ngopa ngopedeka momatengo ongo Dina. So nako paeto manga ngopa de manga dano yanau gena he yamoruwange de yaruwange.

¹⁶ So manga baba Yakub de ma pedeka moili ami ronga ongo Zilpa gena manga ngopa yanau yasinotoka, ona magena: O Gad de wononongoruku o Asyer. So o Gad una asa awi ngopa yanau o Zifyon, o Hagi, o Syuni, o Ezbon, o Eri, o Arodi de lo o Ariel.

¹⁷ De wononongoruku o Asyer una asa awi ngopa yanau o Yimna, o Yiswa, o Yiswi de lo o Beria. Awi ngopa ngopedeka momatengo ongo Serah. Awi ngopa o Beria gena asa awi ngopa yanau o Heber de o Malkiel.

¹⁸ Komagena manga baba de ma pedeka ongo Zilpa manga ngopa yanau yasinoto. Ongo Zilpa gena idomaka o Laban awi ngopa ongo Leaka wahike. So nako paeto manga ngopa de manga dano gena yanau he yamogiowo de yabutanga.

¹⁹ Padofa kanaga una o Yakub ma pedeka moili ami ronga gena ongo Rahel, gena ami ngopa yanau yasinotoli, ona magena: O Yusuf de awi nongoru moi o Benyamin.

²⁰ O Yusuf awi ngopa yanau yasinoto gena o Manasye de o Efraim. Ona magena o Yusuf ma pedeka ongo Asnat o Mesirka mopuo. Muna gena o On ma kotano ma imam awi ronga o Potifera gena to una awi ngopa ngopedeka.

²¹ De wononongoruku o Benyamin gena asa awi ngopa o Bela, o Bekher, o Asybel, o Gera, o Naaman, o Ehi, o Rosh, o Mupim, o Hupim de lo o Ared.

²² Komagena manga baba de ma pedeka ongo Rahel manga ngopa yanau yasinoto. So nako paeto manga ngopa de manga dano yanau gena he yamogiowo de yaruha.

²³ So manga baba de ma pedeka moili gena ami ronga ongo Bilah gena yanau yasinotoli, ona magena: O Dan de wononongoruku o Naftali. So o Dan una asa awi ngopa yanau o Husim.

²⁴ De wononongoruku o Naftali una asa awi ngopa yanau o Yahzeel, o Guni, o Yezer de lo o Syilem.

²⁵ Komagena manga baba de ma pedeka ongo Bilah manga ngopa yanau yasinotoka. Ongo Bilah gena idomaka o Laban awi ngopa ongo Rahelka wahikeli. So nako paeto manga ngopa de manga dano yanau gena he yatumudingi.

²⁶ De ma dodoguka gena, ngo dangoduka isijarita o Yakub awi ngopa de awi dano yanauku awi tahu ma rabaka. Nako paeto gena yamoributanga de butanga awi tahu ma raba moi yakahuku kudahu o Mesirku.

²⁷ De lo nako padogo o Yusuf de awi ngopa yanau yasinoto o Mesirka isibuo la posideeto awi ngopa de awi dano yanauno kanaga o Mesir ma tonaka, gena ma dala he yamoritumudingika.

O Yakub de awi tahu ma raba moi o Mesir ma bi dokuka

²⁸ Yahika kadahu o Mesirka, de manga baba awi ngopa Yehuda gena wisulo la wotagi wodoma o Yusufka ma ngale wisingangasu unaka gena ona o Gosyen ma pido gena o Mesir ma daera ma rabaka iwosaka, so kagena ona igoge. So o Gosyenka yaadoka,

²⁹ de o Yusuf wosulo awi padati isidailako la wopane. So wopaneku de wotagi wakahika o Gosyenka, la de ma baba imakamake. So womasidiado de ma baba wikololono de womadodagariku.

³⁰ So manga baba o Yakub gena wotemo unaka, “Ai ngopa Yusuf, kodo! Ngona gena ngohi masirete aku tonikelelosi de tanako igogou ngona ka noohosi, so nakoso ngohi tosone gena asa tososanangi.”

³¹ Bolo, de o Yusuf wosibicara wotemo ona yangoduka, “Ai ria-ria de ngini ai gianongoru ningoduka. Ngohi asa totagi de towisingangasu ma Kolano Firaunka totemo, ‘Ai baba de awi tahu ma raba yangodu de lo kanaga ai gianongoru yangodu de manga tahu ma raba moi-moi gena o Kanaan ma tonano imasidiadoka.

³² Ona magena yososowohi yangodu so o duba yojojajaga de o bi haiwani yopapalihara, so to ona manga duba, manga kabi de manga sapi, de lo manga moi-moi o kia bato gena dangodu yaahoka.’

³³ So ma orasi moika ma Firaun ngini winiaso so niwirisima de asa winisano ngini nia manara gena o kia,

³⁴ de ngini gena bilasu nitemo, ‘Ngomi manena ka mimagohiduurusi de o duba miojajaga de o bi haiwani mipapalihara, maro ka mia ete de mia topora idodomaka.’ Nakoso nia demo komagena, de una asa winisimaha la o Gosyen ma pidoka nigoge. Sababu o Mesir ma daera ma somoaka ma nyawa gena o nyawa la o duba yososowohi ona magena yadanggutu.”