Dodadi 44 - O GIKIMOI AWI JAJI ma BUKU

O Yusuf wakulai o Benyamin maro wototosi moi

¹ So awi gianongoru yamogiowo de moi ona magena asa imajobo iliho kali. So ma wakil Yusuf gena wasulo kasi awi tahu ma leleani wapoparetaka wotemo, “O nyawa ona manena manga karongku nosiaturu la o ino nongado nawedo-wedo kali, ma lamo gena hitilahi manga keledai aku yamoku de yaaho. De lo nomapongo-pongo la manga ino ma ija moi-moi gena manga karongku nongado kali la isigilihoka.

² De ai udo-udo daloloha gena wononongoru de awi ino ma ija gena awi karongku nongado kali.” Dabolo de awi tahu wapopareta magena wotagi manga karongku wongado gena maro o kia ma wakil wosiaturu.

³ So ma goginitano, de ona imajobo kali yoliho ona de manga keledai moi-moi manga gina gena yamoku so imajoboka.

⁴ O kota magena yodongosa duma ma soa ikuru waasi, de kanaga o kota ma rabaka o Yusuf wosulo kali awi tahu ma leleani wopoparetaka, “Hika cai-cai o nyawa ona magena nanihi la nadahe, de notemo onaka, dadoohaso manga sininga imaaka komagena, o nyawa o loha yaaka onaka, duma ona o dorou isifanggali.

⁵ Idodooha so to ngohi ai udo-udo daloloha masirete gena yatosika. Wewe! Ai udo-udo ma rabaka gena todupa tanano ma ngale nakoso o nyawa manga sininga daloloha de datorou, gena aku ka tanako. So nakoso magena la igogou, gena o dorou ilalamo moi asa ona yaakaka.”

⁶ Bolo, so awi tahu wapopareta magena wanihi de wadaheka, so wotemo onaka, “He, baba-baba! Idodooha so ngaroko o nyawa o loha yaaka nginika, duma ma dagali o dorou niaaka onaka. Idodooha so ai tuan awi udo-udo daloloha gena niatosika. Wewe! Awi udo-udo ma rabaka gena wodupa wananano ma ngale nakoso o nyawa manga sininga daloloha de datorou, gena aku ka wanako. So magena igogou ngini o dorou ilalamo moi niaakaka bai.”

⁷ Duma ona magena yotemo unaka, “Ya baba, o kiaso nanga tuan awi bicara gena maro komagena. Ngomi manena ngaroko upa o moi-moi maro magegena miaakaka.

⁸ Ngona gena nanakoka, idodooha ngomi o ino ma ija mia karong ma rabaka miamake gena, o Kanaan ma tonano miaaho kali de misigiliho. De idodooha mitahe ngomi manena asa o guraci eko o salaka ani tuan awi tahuno gena miatosi.

⁹ So, baba, igogou nakoso ngomi manena mia sidongirabaka kanaga o nyawa moika de o udo-udo magegena namake, una magena bilasu wosone. De lo ngomi ma binuka lo midadi ma tuan awi gilalo la o manara datotubuso miaaka.”

¹⁰ So una wotemo, “Ya, komagenaka bato. Duma o nyawa naguuna la kanaga o udo-udo magena unaka gena, una magena bato asa wodadi o gilalo o manara datotubuso waaaka. De ngini ma binuka gena nia sala moi maro komagena asa ihiwa.”

¹¹ Bolo, ona yangodu tai-tai to ona manga karong o keledaiku isiguti de yahoika.

¹² De o tahu wapopareta una magena watailako ma noma-noma woririaka sidago lo ma dodogu una wononongoruka, o udo-udo magena wasari moi-moi manga karong ma rabaka. De kanaga o Benyamin awi karong ma rabaka o ino ma dokuka ma tuan awi udo-udo magena wamakeka.

¹³ Wamakeka, so ona yangodu manga baju moi-moi yaracaka, sababu manga sininga isusa. So manga karong o keledaiye yasibane kali de ka itagi yakahino kali o kotano.

¹⁴ So kagena de o kota magena yaadoka, de o Yusuf awi tahu ma rabaka una lo kagena nagasi. Yaadoka, so o Yusuf awi simaka yahino kali de ka ibukuku. Manga edekati gena o kia bato awi dupa magena ka yaaka.

¹⁵ Imabukuku de una wotemo, “Ce! Dadoohaso sidago o manara komagena niaaka. Ngohi manena, nakoso o nyawa manga sininga daloloha de datorou gena, aku ka tanako. Idodooha de igogou magena ngini nianakowa.”

¹⁶ De ma ria o Yehuda wobicara wotemo, “Kodo, baba! Done mimadodooha la ngomi misikelelo mia sala maro komagenawa. Igogou, ngomi manena o Gikimoi to ngomi mia sala gena wosikeleloka. So o orasi manena ngomi mingodu midadi to ngona ani gilalo o manara o kia datotubuso gena ka miaaka, bai una awi karongka de kanaga o udo-udo magena niamake, bai ngomi ma binuka lo komagena.”

¹⁷ De o Yusuf gena wotemo, “Upa! De upa sidago ngini ningodu bai. Ka ka una bato de ai udo-udo la kanaga awi karongka yamake gena asa wodadi ai gilalo o manara datubuso moi waaaka. Ngini ma binuka gena de nia sininga isosanangi la nitagi niliho nia baba una magenaka.”

¹⁸ De kagena de o Yehuda gena womaokoye, de ma wakil awi simaka wahika so wobicara kali wotemo unaka, “Kodo, baba! Nako ka daloha, de tanu noisimaha la sutu ai bicara tonidedemo ngonaka. Ngaroko, ngona gena ma Firaun awi wakil masirete so ani kuasa imatero de ka una, de tanu upa ngona noidoosa.

¹⁹ Tuan, ngona idomaka ngomi nomisano ma ngale to ngomi mia baba de to ngomi mia nongoru moili.

²⁰ De ngomi minisangoka mitemo, ‘Mia baba una wiperekika de kadoka o Kanaan ma dokuka wogoge. De mia nongoru moi lo ma orasi mia baba wiperekika, de asa una wisibuo so kadoka wogogoge de to ngomi mia baba. Una awi ria moi gena to ngomi mia nongoru moili una gena wosoneka. So nakoso ona o awa moi ma ngopa, gena cawali una womatengo ka woohosi. So mia baba gena cawali una womatengo gena foloi wisayangi.’

²¹ So ngomi nomisulo notemo, ‘Bilasu niakahino kali de nia nongoru magena niwingahono, la kanena niwisikahino de ngohi masirete lo aku towikelelo.’

²² De to ngomi mia sango ngonaka gena, yaakuwa mia nongoru gena mia baba widongosa, sababu nako widongosaka, de igogou mia baba done asa wosone.

²³ Duma ngona notemo kali, ‘Nakoso nia nongoru winimotewa de ngini gena tinisimaha kawa, upa lo niahino kali ai simaka.’

²⁴ Ma orasi ngomi miliho mia babaka, de o bi moi-moi o kia ngona notetemo gena misingangasu unaka.

²⁵ So mia baba wotemo ngomika, ‘Hika o Mesirka nitagi kali la o ino sutu ninaija.’

²⁶ De ngomi mitemo, ‘Ngomi manena akuwa mitagi. Sababu nakoso mia nongoru womimotewa, de ngomi gena o nyawa una magena done womisimaha kawa awi simaka miahika kali.’

²⁷ So mia baba magena wotemo ngomika, ‘Ngini gena nianakoka, ai pedeka moi mopuo ami ngopa yanau yasinoto.

²⁸ De una woriria wotagi-tagika de una magena he towikelelo kawa. Nagala o haiwani ifufuru moi wiraca-raca so wiodoka.

²⁹ So nakoso ngini una wononongoru niwingaho kali, de nia dodagi ma rabaka la nibodito so una wosoneli, magena imatero ngini masirete ngohi ai sininga niaaka foloisi dasiri kali sidago lo tosone.’

^30-31 So, baba, nakoso ngohi toliho ai babaka de awi ngopa wononongoru gena woimotewa gena, ma orasi ai baba womikelelo de una wononongoru magena wihiwa de woimotewa, de igogou ai baba asa ka wosone. Sababu nakoso awi ngopa wononongoru gena wosoneka, de una ka woohosi gena wodupa kawa. Komagena imatero bato ngomi masirete awi sininga miasiri kali sidago lo wosone.

³² So ngohi manena ai baba towijaji de lo tosasika, ngohi asa ai nongoru gena towijaga sidago lo towisigiliho bai. De ngohi totemo unaka, ‘Nakoso una gena towisigilihowa ngonaka, de sidago o orasi tosone de ngohi manena asa de ai salaka.’

³³ So kodo, baba! Upa he ai nongoru magena duma togolo tanu ngohi manena bato togoge la todadi to ngona ani gilalo o manara o kia datotubuso gena taaka. De komagena tanu noisimaha la ai nongoru gena woliho imakangaho de awi ria-ria ma binuka.

³⁴ Tomadodooha nakoso ai babaka toliho duma ai nongoru gena towisigilihowa unaka. Kodo! Upa sidago o bodito maro komagena ai babaka widahe gena ngohi takelelo de tamoku.”