Dodadi 43 - O GIKIMOI AWI JAJI ma BUKU

O Yusuf awi ria-ria itagi kali o Mesirka de manga nongoru o Benyamin iwingaho

¹ Bolo, de kagena o Kanaan ma bi nyawa yangodu ona manga ino damata de o bare ilalamo gena imatoguwa.

² So ma baba una magena awi ronga o Yakub (wisiaso lo o Israel) awi tahu moi ma raba lo ona manga ino o Mesirno yaiija, gena yaodo so he damataka. Kagena de manga baba wotemo, “Ai ngopa-ngopa, hika o Mesirka nitagi kali la o ino sutu ninaijali.”

³ Ma ngopa awi ronga o Yehuda gena wotemo, “Baba, o nyawa una magena ngaroko womisihagawa, sababu womisulo miliho de womisitemoka, ‘Nakoso nia nongoru la niwingahowa, de ngini gena upa he niahino kali ai simaka nimaokoye.’

⁴ So nakoso ka nomode la nowisulo mia nongoru o Benyamin gena womimote, de ma ngale ngona nosulo gena ngomi asa mitagi la o ino miija kali.

⁵ Duma nakoso noholu so mia nongoru nowisimahawa, upa he womimote gena, ngaroko ngona nomisulo, duma ma ngale ngomi gena mitagi miholu. Sababu o nyawa una magena ngomika wotemoka, nakoso mia nongoru la ngomi miwingahowa, de ngomi gena womisimaha kawa upa he miahino kali awi simaka.”

⁶ Kagena de manga baba wotemo, “Ce! Lebelaha ma orasi ma nonomaka de o nyawa una magenaka tanu upa niwisingangasu kanaga ngini de nia nongoru moili bai. Upa sidago to ngohi ai sininga gena o orasi manena niaaka foloili dasiri.”

⁷ “Ya, baba. Tanu komagenawa, duma una magena ka womitailako bai. De womisano-sano ngomika, nakoso mia baba gena woohosi, de kanaga lo ngomi de mia nongoru moisi eko hiwa. De ngomi lo miwisingangasuka bai. So bolo, baba, una asa wosulo so bilasu mia nongoru miwingaho gena, igogou kanaga de awi edekati maro komagena ngomi mianakowa.”

⁸ So kagena de manga babaka o Yehuda wotemo, “Baba, tanu ngona nosulo la ai nongoru ngohi woimote, ma ngale o orasi manena dabolo asa mitagi mikahika o Mesirka. Sababu ngone de to ngone nanga ngopa lo inangodu nanga ino damataka, so upa sidago posone.

⁹ Mutuwade ngohi tojaji de tosasi ngonaka, ai baba, gena ngohi masirete asa ai nongoru towijaga sidago lo ai rohe isone bai. De ngona, baba, ani sininga ma rabaka aku notemo ngohi manena gena aku ngona noingongano. So nakoso ai nongoru la towisigilihowa ngonaka gena, sidago ma orasi ngohi manena tosone, gena de ai salaka.

¹⁰ Duma he ma dekaka ngomi mitamaha bai, so nakoso ma nonomaka la upa nomitahani, tanu orasi manena ngomi mikahika de mikahino o Mesirka he ma sinoto dabolo.”

¹¹ Dabolo de manga baba magena awi ngopa yoririaka magena wasulo de wotemo, “We! Nakoso komagena, de nia karong ma rabaku gena nisingosa nanga doro ma bi sopo daloha-loha, ma ngale o hadiah niwigaho o nyawa una magenaka. O hadiah gena o madu sutu, o bi sou koloko o silo sutu, o bi gososo dabobou, o saketa ma sopo de lo o kapa ma sopo.

¹² De lo niaaho o pipi o ino ma ija foloi ilamo, de lo o pipi isigogiliho de nia karongku yongangadoka, gena bilasu niahike kali onaka. Nagala yasala so nia karongku yongado kali.

¹³ So ma ngale nia nongoru gena niwingaho la nitagi kasi. Niahika o nyawa una magenaka.

¹⁴ De ma orasi ngini niahika o nyawa una magena awi simaka, de tanu o Gikimoi Wilalamo asa winisayangi la ma ngale o nyawa una magena aku wisimaha so ai ngopa o Simeon o buino wisisupu de lo o Benyamin lo aku niwisigiliho. Duma ma ngale ngohi gena, nakoso to ngohi ai ngopa la wosone gena, tadoohawa duma done ngohi manena toari de tododora, sidago ka ai sone ma wange.”

¹⁵ Bolo, so kagena de ona yoriria imasidailako la cai-cai bato de itagi yakahika o Mesirka, o hadiah de o pipi ifoloi ilamo yaaho de manga nongoru lo iwingaho. So o Mesirka imasidiadoka, de yahino kali ma wakil Yusuf awi simaka.

¹⁶ De ma orasi o Yusuf wakelelo igogou awi nongoru Benyamin lo womote de awi ria-ria yangodu, de una wosulo awi tahuka ileleani wapoparetaka wotemo, “O nyawa ona manena ai tahuka niangaho. De kagena ai sapi dasasaki moi niatola de niasakahi, ma ngale o wange itiaika de o nyawa ona magenena de ngohi asa o odo ilalamo miaaka.”

¹⁷ Bolo, de awi tahu wapopareta una magena wotagi so awi gianongoru magena wangaho awi tahuka wasingosaka.

¹⁸ Awi tahuka yahika de ona magena yamodo sababu manga sininga ma rabaka gena itemo, “Ce! Ngone ma wakil awi tahuka inangaho ma ngale o ino ma ija o pipi gena nanga karongku done yongado kali, so awi edekati gena wonaakali o dorouka wonasikahika ma ngale inatago, de ngone de nanga keledai lo paaka o manara datotubuso.”

¹⁹ So o tahu ma ngoraka yahika de yosibicara awi tahu wapopareta una magenaka yotemo,

²⁰ “Kodo, baba. Tanu mia demo noise. Ngomi ma nonomaka miahino o Mesirka o ino mimaijaka,

²¹ de mitagi miliho mia dokuka, de o putu ma nonoma so miadodoguka, ato mia karong miahoi de kanaga ma rabaka mia ino ma ija gena isigiliho dangoduka. So o orasi manena asa ma ija magena miaaho misigiliho kali nginika.

²² De lo miaaho o ino ma ija ifoloi ilamo la o ino mimaija kali. Igogou, ngomi mianakowa dadoohaso o ino ma ija ma nonomaka de kanaga mia karong ma rabaku isingosa kali.”

²³ Una wopopareta wotemo, “Dadoohawa. Upa nihawateri. To nia baba de lo to ngini nia Gikimoi Una magena nagala ma ija nia karongku wosingosa. Sababu ngohi manena nia pipi ma nonomaka gena tamakeka.” Bolo, de wotagi so o Simeon o bui ma rabano wisisupu so wingaho onaka.

²⁴ So ona yangodu wangaho kagena o Yusuf awi tahu ma rabaka, de o ake wotota ma ngale manga dohu yatiodo de o dumule wodehe ma ngale manga keledai lo aku iodo.

²⁵ De ona yogiise kagena o tahuka la o wange itotiai ona de o Yusuf asa yoodo, de ma ngale o wange itiai asa una woliho, de to ona manga hadiah yaaaho gena isidailako manga karongka yadehe la yahike unaka.

²⁶ So o Yusuf wolihoka, de ona manga hadiah magena yatota so wihike unaka. Wihikeka, de imabukuku so wisuba unaka.

²⁷ Wisubaka, de una awi ria-riaka wobicara wotemo, “So to ngini nia baba, idomaka nisingongangasu ngohika gena wiperekika, de ka wososanangi eko hiwa. Ka woohosi?”

²⁸ “Ya, baba. Ka mia baba, una magena wonihoromati gena, igogou wososanangi de ka woohosi.” De kagena ona imabukuku so wisuba kali.

²⁹ Ato wanano ona manga dongirabaka kanaga o awa moika ma ngopa so to una awi nongoru ma duhutu o Benyamin. So wotemo onaka, “Una manena idomaka nisingongangasu ngohika nagala to ngini nia nongoru.” De una wononongoruka magena wotemo, “Ngopa, tanu o Gikimoi Awi laha wosidumu ngonaka.”

³⁰ De kagena cai-cai wosupu kasi. Sababu awi sininga ma rabaka awi nongoru gena wisiboso foloi maro ka to una awi kusi-kusi de womapopongoka, so bilasu wotagi awi ngihi masireteka de kagena woari wosodu-sodu.

³¹ Woari daboloka, de awi bio wamasauka, de wosupu kali wahino onaka. Wahinoka, de awi sininga wosiputuru la upa sidago woari kali, so wosulo awi tahu ma leleanika wotemo, “Poodo kasi.”

³² So kanaga o odo ilalamo ma rabaka gena una magena o nyawa ilalamo moi so o meja moika woodo womatengo. De awi ria-ria o meja moi kali yoodo imatinga. De o Mesir ma nyawa lo kanaga yooodo, sababu yoodo de o Ibrani ma nyawa gena itiaiwa, ona magena lo imatinga o meja moi kali.

³³ De kagena una awi simaka kanaga awi ria-ria manga mejaka ona yasitami imafato, so woriria gena ma nonomaka sidago lo una wononongoru gena ma dodoguka. So ona imatekebicara moi de moika itemo, “Pei! Dadoohaso ngomi mimatami yamote ngomi mia umuru moi-moi.”

³⁴ So una awi meja masirete ma ino ma bioka gena o tahu ma leleani yosiaka de yahike onaka, de o Benyamin gena asa wihike ifoloi o ino o bio motoha de to ona ma binuka manga ino. Komagena so ona de o Yusuf yoodo sidago lo yadalu.