Dodadi 40 - O GIKIMOI AWI JAJI ma BUKU

Ma kolano awi gilalo ileleleani yasinoto manga jarita

^1-2 Kagena dabolo de o wange moiku, de o Mesirka manga kolano awi gilalo ileleleani yasinoto o sala moi yaaka ma kolanoka. Woleleleani moi awi manara gena wapareta ma kolano awi udo ma dupa Yaaaka. Kanaga woleleleani moili wapareta ma kolano awi roti yooosu. O sala yaakaka, so kanaga ileleani yasinoto magena lo ma kolano wadoosaka.

³ De manga sala ma dagali magena wositatapu waasi de wosulo so yasinoto yasingosa o bui ma tahu ma rabaka, kiaka ijajaga ma bobareta wogogogeka, de kagena lo o Yusuf wisingosa idomaka.

⁴ So o bui wopopareta wosulo la o Yusuf wapareta de wajaga o gilalo ileleleani yasinoto magena. Kagena o nyawa yasinoto ileleleani wajaga ma orasi itekaka,

⁵ de o putu moiku ona yotoguruga. Una moi awi doguruga de ma ngaleka, de una moili awi doguruga de ma ngaleli.

⁶ De ma goginitano, o Yusuf wowosa wahika onaka, de wakelelo ona gena maro yatuhudu de ka imasosininga.

⁷ So kagena o bui ma rabaka de una wasano ma kolano awi nyawa ileleani yasinotoka gena wotemo, “He! Nidoohaso ngini ka nitotuhudu.”

⁸ “Kaputuka de ngomi misinoto mitoguruga, duma kanaga o nyawa moi lo yanakowa mia doguruga ma ngale so misingangasuwa ngomika.” Kagena de una wotemo, “Ma ngale dangodu gena o Gikimoi ka wanako so asa ngoneka wonasingangasu. So nako daloha ilaku, de hika nia doguruga magena nisijarita ngohika.”

⁹ So kagena de una ma kolano awi udo-udo ma leleani gena wotemo, “Nakoso komagena, de ai doguruga manena tonisijarita kasi. Ai doguruga ma rabaka gena ngohi takelelo kanaga o anggur o hutu moi.

¹⁰ De ma rohe magena ma sago ngai saangeka. De asa itoori de ioho sidago ma anggur magena isopo de daom.

¹¹ Ma anggur isopoka, de ma kolano awi udo-udo daloloha tacohono, de kugena todeho. So tatehoka, de towihike unaka.”

¹² Magena de o Yusuf una o udo-udo ma leleanika wotemo, “Baba, ani doguruga magena de ma ngaleka. Ma doori ngai saange gena imatero de o wange saange.

¹³ So o wange saangeka, done ma kolano asa wosulo la ngona o buino wonisisupu de asa wonitide kali, maro idodoma, la ma kolano awi dupa wauudo magena naleleani kali.

¹⁴ So nakoso ngona ma kolano awi loha namakeka gena, tanu noisayangi la nowisingangasu ma kolanoka ma ngale ngohi. De nako komagena, la ngohi lo o buino woisisupu.

¹⁵ Sababu ngohi ma nonomaka gena, o Ibrani ma tonaka de itago de asa ingaho ngo nonena. De lo kanena o Mesirka ngohi ma moi waasi o dorou taaka sidago o buika isingosa.”

¹⁶ So kagena de una ma kolano awi roti waoosu wakelelo, igogou o udo-udo ma leleani awi doguruga gena ma ngale una masireteka o loha iwisingangasu. So wotemo, “Nakoso komagena, de to ngohi ai doguruga lo tonisijarita kasi. Ai doguruga ma rabaka gena ngohi takelelo kanaga to ngohi ai saheka o karaja ngai saange, de o karaja magena ma rabaka kanaga lo de ma roti de ma momamika.

¹⁷ De ma karaja idodoku ma rabaka o roti de o momami ma bio idala gena ma kolano iwigaka. Duma o namo idadala yahino de ma roti de ma momami magena yaodoka.”

¹⁸ Gena de o Yusuf wosingangasu kali, o roti wooosuka gena wotemo, “Baba, ani doguruga magena lo kanaga de ma ngaleka. Ma karaja ngai saange gena ka imatero de o wange saangeli.

¹⁹ So done o wange saangeka, de ma kolano asa wosulo la ngona lo o buino nisisupu de o gota ma umaka nilikoku la asa nosone. De o namo idadala yahino de asa ani lake yaodo.”

²⁰ Komagena so sidago o wange saange yaado gena, imakomote de ma kolano awi sibuo ma wangeka gena, una asa o odo ilalamo waaka, la ma ngale awi tahu ma rabaka awi gilalo ileleleani yangodu yahino la irarame. O rarame ma rabaka de wosulo la awi gilalo ileleleani yasinoto magena o buino yasisupu.

²¹ Buino yasisupuka, de awi udo-udo ma leleani gena asa iwitide kali, la maro idodoma so ma kolano awi dupa wauudo asa aku una waleleani kali.

²² Duma una ma kolano awi roti waoosu gena o gota ma umaka wilikoku, maro awi doguruga ma ngale kiaka o Yusuf wisingangasuka.

²³ De una ma kolano awi udo-udo ma leleani gena ngaroko iwitide kali, duma o Yusuf gena wisininga kawa, de wiwosaka.