Dodadi 4 - O GIKIMOI AWI JAJI ma BUKU

O Adam de awi pedeka manga ngopa ma domoka wototooma moi

¹ Ma moiku de o Adam de awi pedeka imasikiidu so ongo Hawa asa moroheka. De ami orasi imasidiado so mowisibuoka o ngopa yanau moi de motemo, “Ma Jou woiriwoka so tamake o ngopa yanau.” So ma ngopa ma domo mowisironga o Kain, ma ngale tamakeka.

² So ma orasi moili de o ngopa yanau moi mowisibuo kali. Ma nongoru magena wisironga o Habel. De o ngopa yasinoto magena yalamoka, de ma ria awi manara gena una wototoro de ma nongoru awi manara gena una o duba wojajaga.

³ O wange ma moiku, de ma ria awi doro ma sopo magena waaho la wosisuba o Jou-ka.

⁴ De ma nongoru una o duba ma ngopa ma domo ma lake daloloha de dasasaki gena waaho la womasisuba o Jou-ka. De ma nongoru o Habel awi suba o Jou wadehe daloha.

⁵ Duma ma ria o Kain awi suba magena o Jou waholu, so una witoosa.

⁶ So kagena de o Jou wotemo woririaka, “Upa he nitoosa.

⁷ Ngona nanakoka, nako o loha naaka de asa nosanangi. Duma nako o dorou naaka de o dorou asa ininihi-nihi la nitooma maro o lalahekana yanihi la yagoli o haiwani bi uudu. So hika nomasidodiahi la asa o dorou natooma.”

⁸ Kagena de ma ria magena womaoko wotemo awi nongoruka, “Habel, hino o pongaka potagi.” Ona yasinoto itagi so imasidiado o pongaka, de gila-gila ma ria magena witooma ma nongoru so wosoneka.

⁹ So o Jou wosano ma riaka, “Ani nongoru o Habel gena kiaka wahika.” De una wosango, “Asoko! Ai nongoru ngohi towijajagawa.”

¹⁰ So o Jou wobicara wotemo, “Ce! Ani nongoru o Habel nowitooma so wosoneka. Awi au o tonaka tamake imatero maro awi ili ma dagali iaso Ngohika igolo la tafanggali.

¹¹ Naaka komagena so tonisilahi de tonisibobeto, sababu ani nongoru awi au o tona yaudoka so tonisisupu o tona manenano.

¹² Komagena lo o tona magena ma sasaki ihiwaka, so natoro de nodato duma o goho iohowa de idadi kawa. So ani dodogu lo ihiwaka so ngona ka notagi-tagi de nokokiloli.”

¹³ So woriria magena wotemo o Jou-ka, “Nako komanena, de ai sangisara datubuso poli so tapohawa.

¹⁴ Kodo! O wange manena Ani tonano noisisupuka, de Ani simaka asa togoge kawa. Ai dodogu ihiwa so asa ka totagi-tagi, de nako o nyawa imake ngohi asa ka itooma.”

¹⁵ So o Jou wotemo, “Hiwa! Nako o nyawa moi wonitooma de asa to una awi manara ma fanggali ma sangisara ma para ma tumudingika.” So dabolo de o Jou o nonako wahado o Kainka la ngaroko o nyawa wimake, duma upa witooma.

¹⁶ Komagena de woriria awi ronga o Kain womajoboka ma Jou Awi simano. So o Kain ka wotagi-tagi o Nod ma tonaka. (Ma ronga o Nod ma ngale tagi-tagi.) Gena o Eden ma doroka de ma wange ma nyonyieka.

¹⁷ Ma moiku de o Kain o doku moi wosigoko dabolo waasi, de ma pedeka imasikiidu so morohe de mowisibuo o ngopa yanau moi. De o Kain ma ngopa magena wisironga o Henokh. So o doku magena lo asa wosironga o Henokh, gena yamote to una awi ngopa ma ronga.

¹⁸ O Henokh magena wilamo de ma pedeka mosibuo o ngopa moi awi ronga o Irad. De o Irad awi ngopa ma ronga o Mehuyael. De o Mehuyael awi ngopa ma ronga Metusael. De o Metusael awi ngopa ma ronga o Lamekh.

¹⁹ O Lamekh magena womodoka o ngopedeka yasinoto. Awi pedeka ma nonomaka ami ronga ongo Ada de awi pedeka ma sinotoka ami ronga ongo Zila.

²⁰ So ongo Ada magena mowisibuo o ngopa yanau moi awi ronga o Yabal. O nyawa la kanaga o sapi ipopiara so yorihiwa de imatotuluru yakahika yakahino gena, una magena to ona manga baba.

²¹ De ongo Ada mowisibuo kali o ngopa yanau moili awi ronga o Yubal. O nyawa la kanaga o kecapi yolului de o suling yowuwuwu gena una magena to ona manga baba.

²² De ongo Zila magena mowisibuo o Tubal-Kain. Una magena o besi de o tembaga wotututu. De ma bira moi ami ronga ongo Naama.

²³ O orasi ma moiku de o Lamekh womasihie awi pedeka yasinotoka de wotemo, “He! Ada de Zila, ai demo niise. Nako o nyawa wocacanga moi wahino de o orasi magena dabolo ngohi asa towitooma.

²⁴ De koloko o nyawa la kanaga o Kain iwitooma de o Gikimoi o nyawa magena wisifanggali o sangisara sidago ma para ma tumudingi, so o nyawa la ngohi lo itotooma asa wasifanggali o sangisara sidago ma para ma moritumudingi de tumudingi.”

²⁵ Ma orasi o Habel witooma de wosoneka, de o Adam de ma pedeka imasikiidu kali. So muna morohe de mowisibuo o ngopa yanau moili. So motemo, “Sababu o Habel o Kain witoomaka, so o Gikimoi o ngopa yanau moi ka woihike kali.” So mowisironga o Set, ma ngale o Gikimoi Awi laha wosidumu.

²⁶ So de o Set wilamoka, de ma pedeka mosibuo o ngopa moi de wisironga o Enos. De o orasi magegena dabolo de ma noma-noma o nyawa yangodu wisiaso o Gikimoi o Jou.