Dodadi 39 - O GIKIMOI AWI JAJI ma BUKU

O Yusuf de o Potifar ma pedeka

¹ So o Yakub awi ngopa wononongoruku, una magena awi ronga o Yusuf, kudahu iwingaho sidago o Mesirka imasidiado. De o Ismael ma nyawa ona magena o Yusuf wisiijaka o jojaga manga bobareta moika, una magena awi ronga o Potifar, kagena o Mesirka manga kolano, wisiaso lo ma Firaun, awi pareta ma rabaka gena awi jojaga manga bobareta wilalamo moi.

² De o Mesir ma jojaga manga bobareta kagena awi tahuka gena, o Jou lo kanaga dede o Yusuf. So o Yusuf una magena o kia o moi-moi waaaka gena ka idadi daloha.

³ So o kia asa idadi gena o jojaga manga bobareta una magena dangodu wanako. Wakelelo de wanakoka, de wotemo, “Awalele! O ngopa una manena awi Jou Gikimoi kanaga dede una so o moi-moi o kia bato waaaka gena dangodu ka idadi daloha.”

⁴ Bolo, de ma jojaga manga bobareta una magena o Yusuf gena wingaho daloha, so wotemo, “Yusuf, ngona gena ngohi asa tonitide la nodadi to ngohi ai tahu ma jojaga ma ngale ai raki de ai alamu moi-moi kanaga ai tahu ma rabaka gena dangodu ngona naaturu.”

⁵ So ato witide daboloka, de ka ma ngale Yusuf gena o Jou asa Awi laha wosidumu o jojaga manga bobareta una magenaka. Wosidumuka, so una awi moi-moi dangodu idadi daloha, bai awi raki gena isopo daloha, bai awi alamu foloisi idogo-dogo.

⁶ So lebelaha awi aturu moi-moi dangodu gena wafikiri kawa, so ka o Yusuf wosiaturu. So ka cawali awi ino wooodo masirete gena waaturu awi tahu ma rabaka. De o Yusuf una magena awi rohe de awi jamani lo ka daloha.

⁷ Bolo, de o wange moiku de ma jojaga manga bobareta awi tahu ma rabaka de ma pedeka gena o Yusuf mowinyafusu so muna motemo, “Yusuf ya! Hino la pomaidu.”

⁸ De una wotemo, “Hiwa! Ngohi ai tuan woipiricayaka, so ngohi woitide la tosiaturu awi raki de awi alamu moi-moi awi tahu ma rabaka. De una gena o moi-moi he o kia kawa woisihawateri.

⁹ So nako ai tuan awi tahu ma rabaka ma nyawa gena, ngohi foloisi tolamo. Sababu o moi-moi dangodu gena to una de maro ngohi ma moi waasi woholu woihike ngohika, ka cawali ngona masirete sababu ngona gena ka to una awi pedeka. De nako ngohi de ngona pomaiduka, magena o dorou ilalamo moi maro o Gikimoi wodudupawa. So ani dupa magena ngohi toholu taaka. Magena akuwa taaka.”

¹⁰ Bolo, de ngaroko ma pedeka magena o wange isigeto-geto ka mowibajasi, duma una gena ka woholu womaidu dede muna, de lo wodupa kawa o tahu ma rabaka womikelelo de imarimake.

¹¹ So o wange moiku de o Yusuf o tahu ma rabaka womanara de o nyawa ma binuka lo yahiwa,

¹² de ma pedeka gena unaka mahika. De muna awi juba macoho, de motemo, “Yusuf, toninyafusu. Nahino la ngona de ngohi pomaidu.” Duma una awi juba wahoi de wosupu woloda, so awi juba gena ami giaka igogeka.

¹³ Ato manano awi juba wodongosa de wolodaka,

¹⁴ de muna ami tahu ma leleanika momasigaso de momatotoore, “Niahinosi! Cedekele! O Ibrani ma nyawa una magena iwingahono, la iwisimanara datubuso, duma una asa wodupa womaidu dede ngohi ma ngale ngone wonasiceke. Duma ngohi toaso tomaili-ilika.

¹⁵ Tomatoore so una awi juba wodongosa de wolodaka.”

¹⁶ Bolo, de awi juba magena mahado ami dateka. Daputuku de ma tuan woliho,

¹⁷ de ma pedeka mosingangasu motemo, “O Ibrani ma nyawa ngona nowingahono gena, wahino de wodupa womaidu dede ngohi.

¹⁸ Duma tomatoore so una awi juba wodongosa de wosupu wolodaka.”

¹⁹ Woiseka, de witoosa

²⁰ so o Yusuf wisingosa o bui ma tahuka. O bui kiaka ma kolano awi nyawa yatatago de o rate yasipopilikuka. So o Yusuf gena wogoge o bui ma rabaka.

²¹ Ngaroko kagena o buika wogoge, duma o Jou kanaga de o Yusuf de Awi laha lo iwihike unaka. So o bui wopopareta una magena o Yusuf iwingaho daloha.

²² Komagena so o Yusufka o bui wopopareta o kuasa iwihike unaka, la una wosiaturu o bui ma nyawa yangodu de manga manara moi-moi ona bilasu yaaaka.

²³ Dangodu magena waaturu so o bui wapopareta una magena he wafikiri kawa. Sababu o Jou gena kanaga de o Yusuf, so o moi-moi o kia-kia bato waaaka gena dangodu ka idadi daloha.