Dodadi 37 - O GIKIMOI AWI JAJI ma BUKU

O Yusuf de awi ria-ria

¹ De o Ishak ma ngopa wononongoru moi, awi ronga o Yakub, una asa o Kanaan ma tonaka wogoge, o tona magena kiaka idomaka awi baba lo wogogeka.

² O Yakub de awi jarita gena kanaga ma pedeka ongo Rahel ami ngopa awi ronga o Yusuf, una magena o Yakub awi ngopa wononongoru moi. De o Yakub ma pedeka ongo Bilha de ongo Zilpa manga ngopa yaruha, ona magena o Yakub awi ngopa yoriria. Ma orasi ma nongoru magena awi umuru o taungu mogiowo de tumudingi, de una de awi ria-ria lo manga baba awi duba yososowohi. So manga nongoru magena awi ria-ria wariwo o duba yojaga, de una wotagi so ma babaka wosingangasuka wotemo, “Baba, ai ria ona magena o dorou yaakaka.”

³ Manga baba magena awi ngopa wononongoruka widupa foloisi ilamo de awi ngopa ma binuka, sababu ma orasi he witihimoka de asa manga nongoru magena wisibuo. De unaka o juba moi daloloha-loha de ihali-hali wosulo yaakaka, de wihike ma ngopa wononongoruka.

⁴ Wihikeka, de ma ria-ria magena imatekebicara yotemo, “Hika niakelelo! Nanga baba gena nanga nongoru una magenaka widupa ifoloisi ilamo dede ngoneka.” So ona magena manga nongoru he widupa kawa de ka widoosa unaka.

⁵ So o putu ma moiku de manga nongoru awi ronga o Yusuf una magena o gogiolo ma rabaka, de doguruga moi wamakeka. De awi ria-ria asa unaka foloisi widoosa ma orasi una awi doguruga magena wosijarita,

⁶ awi ria-ria yangoduka wotemo, “Ai ria, hika nimatamiye la ai doguruga moi tinisingangasu kasi nginika.

⁷ Ai doguruga ma rabaka de ngone kanaga o doro ma rabaka ma ngale o gandum pautu de patolomu. Patolomu de to ngohi ai gandum magena imaokoye. De to ngini nia gandum magena imatolomuno so ai gandum isigilolino de imabukuku, so isuba to ngohi ai gandumka.”

⁸ Ma ria-ria itemo, “Ce! Ngona upa ngomi nomipareta bai. Ngona akuwa ngomi nomipareta.” Bolo, de ona ifoloisi widoosa unaka, sababu de awi doguruga komagena de wasingangasu onaka.

^9-10 De o putu ma moili ma nongoru o doguruga moi wamakeli de wasijarita kali, ma ria-ria de ma babaka wotemo, “Ai baba de ai ria-ria, ai doguruga moili ma rabaka gena o wange, de o ngoosa, de lo o ngoma ngai mogiowo de moi imarukuku isuba ngohika.” Duma ma baba wosidapano ma nongoruka wotemo, “Ai ngopa, ani doguruga magena ma ngale idodooha. Upa sidago ngohi de ani meme de ani ria-ria lo ngomi mingodu misuba ngonaka!”

¹¹ Bolo awi ria-ria ona magena asa widoosa kali unaka. Duma ma baba gena o doguruga magena ka wososininga de watagapi.

¹² De o wange moili awi ria-ria yotagi manga baba awi duba yojaga kali kadoka o Sikhem ma dokuka.

^13-14 De manga baba magena de ma nongoru lo igogesi o Kanaanka, de una wotemo ma ngopa wononongoruka wosibeseso, “Ai ngopa, ani ria-ria gena ai duba yojaga o Sikhemka. So hika notagi la ona nanano kasi. Kadoka isosanangi eko hiwa. Dabolo de noliho kali noisingangasu ngohika.” Bolo ma ngopa wononongoru magena, awi ronga o Yusuf, o Hebron ma pidoka o Kanaan ma tonaka de wotagi kadoka o Sikhemka, awi ria-ria wakurumi.

¹⁵ Waadoka, de kagena ma soaka wokokiloli de o nyawa moi ma nongoru magena wimake de una wotemo, “He, ngopa! Kanena notagi-tagi gena o nyawa nagoona nasari.”

¹⁶ “Baba, ai ria-ria ngo tasari. Nakoso ai ria-ria la kanaga nakelelo, de tanu noisidumu ngohika.”

¹⁷ O nyawa una magena wotemo, “Ona yomajoboka. Ngohi manga bicara sutu togiise gena ona itemo, ‘Hino la potagi o Dotanka.’ ” So manga nongoru una magena wotagi wasiduuruka. Bolo, kagena de o Dotan ma dokuka wahika de asa awi ria-ria, manga nongoru o Yusuf, una magena wamake.

¹⁸ De o Dotan he wadumu de manga nongoru una magena ma soa ka ikurusi, de awi ria-ria asa wikeleloka. Ato imaginano, “Wewe! Nanga nongoru nogenaka.” So woado waasi,

¹⁹ de awi ria-ria magena imatekesibicaraka yotemo, “Una magena bai! Una de awi doguruga ikokulai gena una womasidiadoka.

²⁰ Hino la ngone powitoomaka. La dabolo de awi rohe paumo o sumu moi ma ake ihihiwaku. La ngone posingangasu o haiwani ifufuru asa wiodoka. La upa he una wonapareta, maro o kia idomaka to una awi doguruga wonasijarita ngoneka.”

²¹ Duma kanaga woriria moi awi ronga o Ruben woise o bicara magena de awi sininga ma rabaka wotemo, “Taaka idodooha la upa sidago una witooma.” Komagena so onaka wotemo, “He! Upa powisone bai.

²² Duma lebelaha kagena naga ma soaka de ka powiumo o sumuku, la ma ngale upa he powitooma.” Woriria awi edekati gena ma nongoru asa una witide o sumuye la wisigiliho manga babaka.

^23-24 So tekawa de awi ria-ria wamakeka. Gila-gila witago de ona magena awi juba daloloha yahoika, de wiumo o sumu ma ake ihihiwaku.

²⁵ So kagena de ona igogeku manga maru yaodo. De ato imaginano, eh, ka ma soa ikurusi yakelelo o unta o bolu moi itagi yakahino. Nagala o Ismael ma ngopa de ma danoku o Midian ma tonano gena, o silo, de o bi sou, de lo o bi gososo dabobou o Gilead ma tonaka de yaaho isiija kudahu o Mesir ma daeraku.

²⁶ Yakeleloka, de una woriria magena wotagika, de kanaga ma ria moili awi ronga o Yehuda asa wobicara, awi ria de awi nongoru ma binukaka wotemo, “Ce! Nakoso nanga nongoru powitoomaka, so awi au pauhi de posipongoka, done asa o pipi he pamake kawa.

²⁷ Lebelaha powisiija o Ismael ma nyawaka, la manga manara datubuso waaka, sababu nanga nongoru gena igogou ka to ngone nanga nongoru. Upa sidago nanga nongoru de ngone powitooma.” Kagena de awi demo manena ma ria-ria isigise.

²⁸ So o nyawa imasiiija magena yahino, de gila-gila de manga nongoru magena wisidola de awi ria-ria magena wisiijaka, awi ija cawali o pipi salaka ngai monahalo gena yadeheka. So manga nongoru wingahoka o Mesir ma tonaka.

²⁹ Kagena de manga ria Ruben wahino kali, o sumuno winano duma manga nongoru gena he wihiwaka. So una woari de awi baju waraca.

³⁰ De woliho wahika awi nonongoruka, woari womatotore, “Kodo! O ngopa magena wihiwaka. So ai babaka towisigiliho kawa. Kodo, done ngohi tomadodooha.”

³¹ Kagena de gila-gila manga nongoru awi juba daloloha magena awi ria-ria yadehe de o kabi ma nau yatola so kugena ma auku yatono.

³² Yatonoka, de ona magena imajobo iliho de awi juba yaaho manga babaka. So awi juba yaaho yahika o tahuka. De manga babaka itemo, “Baba, manena ngomi miamakeka. So minisano kasi, manena ani ngopa awi juba eko dasowo.”

³³ So de manga baba o juba magena wakelelo de woari wotemo, “Igogou! O juba manena to ngohi ai ngopa awi juba. Kodo! O haiwani ifofufuru moi wiodo wigoli-golika.”

³⁴ So woari de awi baju waraca-racaka, de wosibeto wotemo, “Ayoo! Ai ngopa gena o haiwani wiodoka, so wihiwaka.” Woari iteka de o baro datataro moi koloko o karong womasitibaku maro o sone ma nonako moi, wamote maro to ona manga adati.

³⁵ Awi ngopa de awi modoka ona yangodu yahino la ma ngale awi gari yatogu, duma una gena woholu so wotemo, “Kodo, ai ngopa! Kodo, ai ngopa!” Manga baba magena woari sidago una magena womatotore wotemo, “Kodo, ai ngopa! De ka ai gari sidago lo tosisone de o sone ma rihoka towosa.” Gena woari womatogu-toguwa.

³⁶ Ona o Ismael ma nyawa o Midian ma tonano magena yahika de yaado kadoka o Mesir ma tonaka. So kagena manga nongoru magena, awi ronga o Yusuf, wisiija kali o jojaga manga bobareta moika, awi ronga o Potifar, kagena o Mesir ma kolano, wiaso lo ma Firaun, to una awi jojaga ma bobareta wilalamo moi.