Dodadi 35 - O GIKIMOI AWI JAJI ma BUKU

Ma sinotoka o Yakub wokahika o Betelka

¹ Ma ngeko komagena, so o Gikimoi o Yakubka wotemo, “Hika nomasidailako la notagi o Betelka nokahika kali la kagena nogoge. So naaka o puji ma tahu moi Ngohika. Ma orasi Ngohi kagena de ngona noloda ani ria awi simano, de Ngohi o Gikimoi gena tomasimane dabolo ngonaka.”

² So kagena de o Yakub wasingangasu awi tahu ma raba moi de lo awi nyawa wimomote yangoduka wotemo, “Niaumo to ngini nia puji ma somoa nia sidongirabano, de nia rohe niatebi kasi de lo nia baju lo bilasu niatagali kasi gena, ma ngale o dorou nia siningaka niadoha de upa lo niamote.

³ De hino la ngone pomasidailako de nanga moi-moi posidiahi la pomajobo o Betelka potagi. Kagena asa ngohi o puji ma tahu moi o Gikimoika taaka de tosigoko. Sababu ma orasi ai ngeko isidopeneto Una masirete woiriwoka de woireseka o susa de o bodito ma rabano de lo kekiaka ngohi totagi Una kanaga dede ngohi.”

⁴ So ona yangodu manga puji ma somoa maro o palanga, de manga rohe ma pareta, de lo manga gota ma ngutu dangodu yatolomu so yahike o Yakubka, komagena lo manga ngati-ngati lo yahoi manga ngauno, so dangodu yahike o Yakubka. So una asa wapoosu o gota ilalamo moi ma litimiku o Sikhem ma dokuka.

⁵ Dabolo de asa ona itagi. De o Gikimoi modo waaka o bi kota magegena ma sigilolino sidago o Yakub de awi ngopa-ngopa itagi imajobo lo yanihi kawa.

⁶ Sidago lo o Yakub de awi tahu ma raba moi de awi nyawa imomote yangodu imasidiado o Lus ma kota o Kanaan ma tonaka, gena ma ronga lo o Betel.

⁷ So kagena o Yakub o puji ma tahu moi o Gikimoika wosigokoka, de o riho magena wosironga El-Betel, ma ngale gena o Betelka ma Gikimoi, sababu kanena de o Gikimoi masirete womasimane unaka ma orasi una woloda ma ria awi simano.

⁸ Kagena naga lo ongo Ribka ami awa piara moi ami ronga ongo Debora mosone so muna mipoosu o Betel ma duduka o gota ilalamo moi ma litimiku, sidago lo o gota magena isironga O Gari ma Gota Ilalamo.

⁹ Ipapasaka ma orasi o Yakub awi dodagi o Padan-Aramka de woliho o Kanaan ma tonaka, de kagenali o Gikimoi womasimane kali unaka de o Gikimoi Awi laha wisidumu daboloka.

¹⁰ De o Gikimoi wotemo, “Sidago o orasi manena ani ronga o Yakub. Ngaroko komagena, o orasi kangano manena de ikahika gena ani ronga he o Yakub kawa, duma o Israel magena to ngona ani ronga.

¹¹ Ngohi o Gikimoi gena Tolamo, de done asa taaka so ngona nopuo so ani ngopa de ani dano asa foloisi yadala la idadi bangsa moi. Sidago lo o bangsa-bangsa ma bolu ilalamo magena asa manga sihino ngonano, de o bi kolano-kolano lo gena ma sihino ngonano.

¹² De o tona manena kiaka tahikeka o Abraham de o Ishakka gena, done asa tonihike ngonaka, de ani ngopa de ani dano, sidago lo ani galaweweku.”

¹³ Dabolo de o Gikimoi asa womasisaka o Yakub awi simano, so he womasimane kawa.

¹⁴ O riho kiaka o Gikimoi de o Yakub imabobicaraka kagena o teto moi waokoye la idadi maro o sosininga moi. De lo o teto magena imatero de awi suba moi so ma dokuku asa o anggur wogopola de lo o gososo woguse.

¹⁵ De o riho magena lo wosironga “O Betel”.

O Benyamin mowisibuo ongo Rahel mosone

¹⁶ Dabolo de o Yakub de awi duo-duo ma gila itagi o Betel yodongosa. So itagi kali yakahika o Efrataka, duma yahika ma soaka de o Efrata gena ka ikurusi, de ongo Rahel ami orasi yaado so ami poko dasiri ma ngale mopuo. Duma ami buo ma sangisara datubuso sababu ami ngopa gena isupu iholu.

¹⁷ So ma orasi ami siri misilaku de foloi datubuso, de ma bidan gena motemo munaka, “Ani sininga nosiputuru sababu ani ngopa yanauli.”

¹⁸ Duma he idadi kawa sababu ami sone ma orasi he yaadoka, so ami woma itola waasi de ami ngopa ma ronga mosingangasu lo daboloka, ena gena o Ben-oni, ma ngale ai siri datubuso ma ngopa, dabolo de mosoneka. Duma ma baba gena wisironga o Benyamin (gena ma ngale ai ngopa wihohoromati).

¹⁹ Komagena imaaka ongo Rahel ami sone. So muna asa mipoosu o ngeko ma dalateka, kiaka o ngeko magena o Efrataka ikokahika de o orasi manena naga gena isironga o Betlehem.

²⁰ So o Yakub o teto o tugu moi kagena wosigokoye ami boosu ma dokuka, sidago o orasi manena o teto magena lo kanagasi isinonako ongo Rahel ami boosuka.

²¹ So dabolo de o Israel, eko o Yakub gena, awi dodagi wadofa kali sidago wahika o Migdal-Eder ma candi watihoka, de kagena una asa o dadaru womagaka.

²² Ma orasi o Israel kagena igogesi, de igogou o Ruben de ongo Bilha ma baba awi pedeka piara moi imasikiidu de o hali magena o Israel wogiise de wanako. Kanaga o Yakub awi ngopa-ngopa manga dala yamogiowo de sinoto.

O Yakub awi ngopa-ngopa de lo Ishak awi sone

²³ Ongo Lea ami ngopa gena o Yakub awi ngopa woriria o Ruben asa huku o Simeon, o Lewi, o Yehuda, o Isakhar de lo o Zebulon.

²⁴ Ongo Rahel ami ngopa gena o Yusuf de o Benyamin.

²⁵ De ongo Bilha ongo Rahel ami gilalo ileleani ami ngopa gena o Dan de o Naftali.

²⁶ Ongo Lea ami gilalo ileleani ongo Zilpa ami ngopa gena o Gad de o Asyer. Ona magena o Yakub awi ngopa yanau o Padan-Aramka de yasibuo.

²⁷ O Yakub wotagi ma bati ma baba o Ishakka wiado o Mamre o Kiryat-Arba ma dateka gena, o Hebron ma tonaka, kiaka idodoma o Abraham de o Ishak kagena igoge maro o nyawa itatagino.

^28-29 Manga baba o Ishak awi umuru ma dala taungu 180 de igogou una wiperekika, so awi wange asa itumu de asa una wosone. So awi ngopa woriria o Esau de wononongoru o Yakub asa wipoosuka.