Dodadi 32 - O GIKIMOI AWI JAJI ma BUKU

Yakub wimodo imakamake de o Esau

¹ Kagena de o Yakub awi dodagi wadofa kali, so yahika ma soaka de imakamake de o Gikimoi Awi malaikat yadadala.

² Ma orasi o Yakub wakelelo o bi malaikat magena de una wotemo, “He! O riho manena nagala o Gikimoi de Awi prajurit manga goge ma riho.” Sidago lo o riho magena wosironga o Mahanaim. (Nako o bahasa Ibrani ma demo “Dan” gena ma ngale o riho ngai sinoto.)

³ Dabolo de o Yakub wasulo awi nyawa la itagi kadoka awi ria o Esauka, kiaka una wogoge o Seir ma tonaka o Edom ma daeraka, la awi demo yaaho de isingangasu ma riaka.

⁴ Yakub wosulo, “Ngini bilasu nitemo komanena ai riaka. Ani nongoru womahadoku de wonihoromati gena awi demo komanena, ‘Ngohi he ma dekaka totagi de togoge o Laban awi tahuka maro o nyawa itatagino moi sidago o orasi manena de asa todupa toliho.

⁵ So kanaga to ngohi de ai sapi, keledai, kabi eko o duba de lo ai gilalo ileleani yanau de o ngopedeka. So ai nyawa tasulo ona inisingangasu ngona tonihohoromatika, la tanu ngona aku ai sala nosininga kawa de noidehe daloha.’ ”

⁶ Dabolo de awi nyawa wasusulo magena iliho o Yakubka, de ona itemo, “Ngomi de ani ria gena mimakamakeka. So o orasi manena naga una de awi nyawa manga dala yaratu iha gena he o dodagi ma rabaka ma ngale aku una de ngona nimakamake kali.”

⁷ O habari magena o Yakub woise de una wimodo poli sidago wamalo gena awi woma iperesu. So lebelaha awi nyawa asa waregu waaka o bolu sinotoka. Komagena lo awi kabi de awi duba, awi sapi, de awi unta lo waregu idadi o bolu sinotoka.

⁸ Sababu awi sininga ma rabaka itemo, “Nakoso ai ria de awi nyawa la yahino woikudoti gena, ngaroko o bolu moi itura de yatooma so yahiwaka, duma kanaga o bolu moi ka iohosi.”

⁹ Kagena de o Yakub wotemo, “Ya Jou, ai ete Abraham de ai baba Ishak lo manga Gikimoi. Ngona masirete nosulo ngohika notemo, ‘Notagi de noliho ani doku de ani soaka de ani ria de ani gianongoruka, la done asa tonihike o loha ngonaka.’

¹⁰ Igogou-gogou, ngohi manena ngaroko idadiwa tamake, duma to Ngona Ani sininga ma loha de ma diai ifoloi noisidumu ngohika, maro kia Ngona noisikelelo ani ngopa, ngohi manenaka. Sababu ma orasi idomaka, ngohi o Yordan ma Selera tatola gena cawali de to ngohi ai didiki manena. Duma o orasi manena ai nyawa de ai haiwani foloisi idala so idadi o bolu sinotoka.

¹¹ Kodo! Jou, tanu noisirese de noisiraro o sone de o dorou ai ria awi gia ma sohano, sababu ngohi ka imodo poli. Upa sidago wahino de ai ngopa-ngopa, de manga bi awa, de ngohi lo womisidotoomaka.

¹² Sababu ngohi tosininga Ngona lo notemo daboloka, done asa o loha naaka ngohika, so ai ngopa de ai dano manga dala koloko o dowongi o teo ma dateka so paeto lo pamatawa.”

¹³ De o putu magena una kagena womaidu kasi. Dabolo so ma goginitano, de awi arata moi-moi magena wadehe de watinga la idadi maro awi suba moi ma ria o Esauka.

¹⁴ Awi suba gena o kabi ma bedeka o ratu sinoto, o kabi ma nau ngai monahalo, o duba ma bedeka o ratu sinoto de ma nau ngai monahaloli.

¹⁵ De o unta ma bedeka de ma ngopa-ngopa ka isususi ngai moruwange, o sapi ma bedeka ngai moruha, de ma nau ngai mogiowo, de lo o keledai ma bedeka ngai monahalo de ma nau ngai mogiowo.

¹⁶ Kagena de o bolumoi-bolumoi magena awi gilalo ileleanika wasulo yojaga la o bolu moi upa imakacapu duma bilasu yatingaka, de una wasulo, “Ngini nitagi nidoma de nia bolu magena niojaga la o bolu moi de o bolu moi bilasu kanaga imakitinga ma ngale ifato de ifara, ma ngale upa imakacapu de o bolu ma somoa.”

¹⁷ De kanaga o nyawa ma simaka wobeseso wotemo, “Nakoso de ai ria nimakamake la wonisano ngonaka, ‘Ani baba naguuna,’ eko ‘Kiaka notagi,’ de ‘Ani simaka naguuna awi biara naaho,’

¹⁸ de ngona nosango notemo, ‘Manena ai baba o Yakub awi biara de manena gena awi suba moi ngonaka, so wonihike ngonaka de awi horomati moi ngonaka, so mia baba lo una kagena naga mia duduno wototuuru.’ ”

¹⁹ Komagena o Yakub awi sulo, bai o nyawa ma sinotoka de ma saangeka, sidago lo o nyawa yangodu o biara ma bolu yaaahoka, so wotemo, “Ai demo maro kangano totetemo gena nakoso ai ria nimakamake bilasu unaka nisibicara.

²⁰ De lo bilasu nitemo, ‘O Yakub una lo kagena naga mia duduno wototutuuru.’ ” Wotemo komagena sababu o Yakub awi sininga ma rabaka ibao, “Daloha ilaku ngohi awi sininga aku tasohi de to ngohi ai suba taaka de tasulo, la yatota idoma kasi. La ma ngale ma orasi ngohi de una mimarimake, nagala de magegena aku una awi sininga isanangi de aku ngohi woidehe daloha.”

²¹ Komagena so awi suba gena yatota idoma kasi, de una gena asa wotuuru so womaidusi to una awi dadaruka.

O Gikimoi de o Yakub imakoropu

²² O putu magena o Yakub womomi de gila-gila awi pedeka yasinoto, de o ngopedeka ileleani, de kanaga lo awi ngopa yamogiowo de moi wangaho so o Yabok ma Selera yatola so imasidiado yahika o selera ma sonongaka.

²³ De una wokahino kali, so wosulo awi arata lo yadehe so yaaho de yatota kadoka o Yabok ma Selera ma sonongaka yahado.

²⁴ La kagena una gena wogoge ka womatengoka. Womatengoka, de yanau moi wahino so ona yasinoto imakoropu sidago lo daginita.

²⁵ Ma orasi yanau magena wikeri-keri igogou waakuwa o Yakub wisiruba, lebelaha o goropu ma rabaka de yanau una magena o Yakub awi pugili ma golaku wapada sidago awi todenge ma bobolo gena isaleseka.

²⁶ De yanau una magena wotemo, “Hika noipalako la ngohi toliho, sababu daginitaka.” Kagena de o Yakub wosango wotemo, “Ngaroko idodooha naga lo tonipalakowa, nakoso ngona o loha noisidumu waasi.”

²⁷ De yanau una magena wisano, “Ani ronga o kia.” De wotemo, “Ai ronga Yakub.”

²⁸ De yanau una magena wotemo, “Ani ronga Yakub gena done asa he yapeto kawa, duma asa nisiaso Israel. Sababu ngona dede o Gikimoi nimakoropuka, komagena lo de o nyawa sidago kanaga ngona aku noutungu.” (Nako o bahasa Ibrani ma demo “Israel” gena ma ngale awi goropu dede o Gikimoi.)

²⁹ De o Yakub wisano, “So to ngona ani ronga o kia.” De una wosango wotemo, “Dadoohaso ai ronga nosano.” So kagena de o orasi magena dabolo o Yakub o loha wisidumuka.

³⁰ De o Yakub wotemo, “O Gikimoi Awi jamani takelelo, duma ai rohe isalamati.” So o riho magena o Yakub wosironga o Pniel. (Nako o bahasa Ibrani ma demo “Pniel” gena ma ngale o Gikimoi womasimane.)

³¹ De gila-gila wakelelo o wange ma lako ibao de ma orasi o Pniel wodongosa gena, o Yakub wocuga-cugaka, sababu awi todenge ma bobolo isaleseka.

³² Ma ngale magegena o Israelka ma nyawa o orasi magenasi asa o sihode ma todenge de ma pugili ma gogola ma lake yasasao gena yaodowa. Sababu una o Yakub awi todenge ma bobolo wapadaka, ena gena awi pugili ma kakaci.