Dodadi 31 - O GIKIMOI AWI JAJI ma BUKU

O Yakub woloda de o Laban widongosa

¹ O wange moika, de Yakub woise o Laban awi ngopa-ngopa imatekebicara itemo komanena, “Niakelelo o Yakub gena kanaga nanga baba awi arata wakooraka, so de nanga baba awi arata magena una aku womasikaya.”

² De lo Yakub wikelelo o Laban awi gogoho de awi sininga maro he idodoma kawa, so awi bio ka datotoosa.

³ So o Jou Gikimoi wotemo o Yakubka, “Hika la ngona noliho de notagi ani baba, de ani ete de ani topora, de lo ani ria de ani gianongoru manga tonaka, de Ngohi lo asa kanaga dede ngona ani dodagi ma rabaka.”

⁴ O demo magena woise daboloku de o Yakub awi ngopa wasulo so ongo Rahel de ongo Lea yaaso la yahino o pidoka, kiaka kagena o kabi de o duba ma rihoka.

⁵ Kagena una wotemo onaka, “Tanako de tosihodaka, ena gena nia baba awi sininga ma dorou ngohika so maro he idodoma kawa, duma ai baba awi Gikimoi gena kanaga dede ngohi.

⁶ De ngini masirete lo nianako, ngohi gena tomanara de ai sininga igogou sidago ai buturu lo todamata-mataka ma ngale nia baba.

⁷ Duma nia baba awi sininga ipelu so woiaka dorou ngohika, sidago lo ai gaji wafangu wosipara ma mogiowo. Ngaroko komagena, duma o Gikimoi gena wisimahawa so o sangisara kia bato upa waaka ngohika.

⁸ So nakoso una wotemo, ‘Kabi eko duba ibata-bata magena to ngona nigimina,’ done asa ipuo de ma ngopa ibata-bata. De nakoso una wotemo, ‘Daliliranga idadi to ngona ani gimina,’ done asa o kabi eko o duba magena ipuo de ma ngopa daliliranga.

⁹ Magena o Gikimoi waaka de aku wadehe nia baba awi biara ma ngale woihike ngohika.

¹⁰ O putu moiku ma orasi o kabi de o duba magena ma dupa imatekemodoka de ngohi totoguruga de takelelo o kabi de o duba ma nau gena ka daliliranga, ibata-bata de lo dababalanga gena imatekemodoka de ma bedeka.

¹¹ De o Gikimoi Awi malaikat ai doguruga ma rabaka itemo ngohika, ‘Yakub!’ De tosango totemo, ‘Iya, Jou!’

¹² Kagena de Una wotemo, ‘Nanano la nakelelo! O bi kabi de o duba imomodoka gena igogou daliliranga, ibata-bata, de lo dababalanga, sababu o Laban awi sininga ma dorou ngonaka gena takelelo de tanakoka.

¹³ Ngohi manena to ngona ani Gikimoi, ma orasi o Betelka de ngona o tugu moi naaka o tetono de o gososo dabobou nosidahuka, ma ngale ani suba de ani sasi naaka Ngohika. So o orasi manena hika nomasidailako, la ngona bilasu nosupu de o doku manena nodongosa, de noliho ani ria de ani gianongoru manga dokuka.’ ”

¹⁴ Idadi komagena, so ongo Rahel de ongo Lea isango o Yakubka itemo, “Igogou-gogou, ngomi manena mia baba womasiija dabolo ngonaka. So orasi manena to ngomi mia baba awi arata lo womisigiminawa de mia warisi lo ihiwa.

¹⁵ So ngomi manena maro ka o nyawa ma somoa. So ka o lawe ma depi moi lo womihike kawa.

¹⁶ Duma arata dangodu maro kia o Gikimoi wadedehe to ngomi mia babano, magena lo idadi to ngomi mia arata de mia kaya, de to ngomi mia ngopa-ngopa manga arata de manga kaya. So o orasi manena o kia o Gikimoi wotetemo ngonaka gena, hika namote de naaka bato.”

¹⁷ Komagena so Yakub awi alamu moi-moi dangodu wosidailako daboloka, de awi unta wadehe so wasibane awi ngopa-ngopa de awi pedeka yasinoto magena.

¹⁸ De awi biara o duba de o kabi watuda de lo awi arata kia una wamamake o Padan-Aram ma pidoka, de womajobo wokahika ma baba o Ishak kagena o Kanaan ma tonaka.

¹⁹ Ma orasi ona imajobo gena o Laban asa wotagi awi duba-duba ma gogo waguti so o tahuka wihiwa, de ongo Rahel ma baba awi terafim maro awi palanga de awi rohe ma pareta gena matosi so maahoka.

²⁰ De o Yakub lo iwiaka o akali ma toroa o Labanka, so wotagi lo womasingangasuwa ma ngale o Yakub asa wotagi de womajobo.

²¹ Ma ngeko komagena o Yakub de awi arata de awi biara dangodu waaho so wotagi woloda. Una wotagi wokahika o Efrat ma Selera watola de wotagi wameta o Gilead ma talaka wokahika.

O Yakub woloda so o Laban winihi

²² Ma orasi he o wange saange dabolo pasaka, de o Laban womagiise de wanako, igogou o Yakub gena wolodaka.

²³ So awi gianongoru de awi ngopa-ngopa watolomu ma ngale o Yakub winihi ma deka o wange tumudingika, ona iwisiduuru o Gilead ma talaka yameta.

²⁴ So o putu moiku de o Laban awi doguruga ma rabaka gena o Gikimoi womasimane de wotemo, “Nomasitiari daloha de upa lo ani demo datotorou ma depi moi lo upa nosigangamo o Yakubka.”

²⁵ Ma dongoho o Laban womasidiado o Yakubka gena, o Yakub awi dadaru waaka daboloka o Gilead ma tala ma dateka. Komagena so o Laban, de awi gianongoru, de to ona ma ngopa-ngopa lo asa o dadaru imagakali.

²⁶ Dabolo de o Laban wotemo o Yakubka, “Kiaso noiaka komanena sidago de ani akali ma dorou so ai ngopa-ngopa ngopedeka nasiloda koloko to ngona ani dafa.

²⁷ Dadoohaso noiakali so nomapongo-pongo de nolodaka. Ce! Nakoso noisingangasu tanu aku ngohi tonisitota de ai lipa, de o gosoma o soda, de o nere ma ngale o nali de o more ma rabaka pogoge.

²⁸ Ma boboloi o orasi ma cunu lo noihikewa ma ngale ai dano yanau de ai ngopa o ngopedeka aku tahame kasi. Igogou-gogou, manena to ngona ani fuma ma manara.

²⁹ Ngona manena gena ngohi tonipareta so aku o dorou moi taaka ngonaka, duma ani baba awi Gikimoi kaputuka wosidapano dabolo ngohika wotemo, ‘Nomasitiari daloha la o demo datotorou ma depi moi lo upa nosigangamo o Yakubka.’

³⁰ So nakoso o orasi manena la ani dupa ngona bilasu notagi, sababu ani baba de ani gianongoru ifoloisi nasininga, de dadoohaso ngona bilasu natosi to ngohi ai terafim gena maro ai palanga de ai rohe ma pareta.”

³¹ De o Laban awi demo magena o Yakub wasango wotemo, “Ngohi imodo ai sininga ma rabaka upa sidago ani ngopa-ngopa eko ai pedeka gena aku nakoora de nasimahawa ngohi imote.”

³² Sababu o Yakub wanakowa ongo Rahel matosika so wotemoli, “Nakoso ani rohe ma pareta eko ani palanga la namake kanaga o nyawa moika, una magena upa lo wooho. Kanena nanga gianongoru yangodu manga simaka natailako de ani arata magena nasari to ngohi ai gina moi-moi ma rabaka, la nakoso namake de tojaji ma ngale ani arata magena aku nadehe.”

³³ So kagena de o Laban wowosa so wasari o Yakub awi dadaruka, dabolo de ongo Lea ami dadaruka, komagena lo manga gilalo yasinoto ileleanika duma wamakewa. So ongo Lea ami dadaruno wosupuka, de wotagi wowosa kali ongo Rahel ami dadaruka.

³⁴ Duma ma baba awi palanga eko awi rohe ma pareta magena ongo Rahel maihuka, so ami unta ma kaduku mongadoka, de ma dokuka momatamiye. O Laban manga borua wapelenga de lo manga sasao wasose de wasari, duma o palanga magena wamakewa.

³⁵ Kagena de ongo Rahel motemo ma babaka, “Ai baba, upa nitoosa ma ngale ngohi akuwa touti la tomaoko to ngohi ai baba awi simaka, sababu ngohi o ngoosa tamake.” So o Laban wasari de awi sininga wagogou duma wamakewa.

³⁶ Mutuwade o Yakub witoosa so imaringamo de o Laban sidago o Labanka wotemo, “Ai dorou de ai sala lo ihiwa, de noitahe so sidago noinihi ma guruno manena.

³⁷ Ai borua de ai bebeta lo napelenga de nasoseka lo ani arata gena namakewa. Hika ani arata isisisa gena nadehe de nahadoku ani gianongoru de to ngohi ai gianongoru manga simaka, la ona aku inahiri ngona dede ngohi naguuna wotero.

³⁸ Ma deka o taungu monahalo ma raba ngohi togoge dede ngona ani tahuka. So kanaga ani duba eko ani kabi ma bedeka ka ngai moi lo waali ma ngopa itura, de ani kabi eko ani duba ma nau moi lo taodo waasi.

³⁹ De kanaga lo o haiwani ilalago yagoli de yatago ma moi waasi tatota ngonaka, so ka ngohi masirete asa tatagali ngaroko torugi. Kanaga lo bai o wange eko o puputu o nyawa yatosi, magena dangodu noisulo bilasu ngohi tatagali.

⁴⁰ Ngohi masirete o wange ma sahu so igalasahu, de o puputu ma alo tatamaha so ai idu lo itibalangu de lo ai giolo lo tamakewa. Ngaroko komagena, duma ngohi ai sininga itotiai ani manara bilasu taaka.

⁴¹ Komagena ma deka o taungu monahalo togoge ani tahuka. Ena gena, ma deka taungu mogiowo de iha tomanara ma ngale ani ngopa o ngopedeka yasinoto noihike tomasipedeka, de lo tomanara o taungu butanga ma ngale ani biara o kabi de o duba noihike ngohika. De kanaga he ma para ma mogiowo dabolo ngona ai gaji natagali de ani akali ma dorou.

⁴² Posibicara patotiai, nakoso ai baba Ishak de ai ete Abraham manga Gikimoi wisusuba gena ai oho ma rabaka woidodiaowa, nagala aku noidusu la ngohi toliho de totagi lo ai arata ihiwa-hiwa. Duma ai gangela de ai sangisara o Gikimoi wanako so woisidailako lo daboloka, de kaputuka asa wonisidapano dabolo ngonaka.”

O Yakub de o Laban manga jaji moi o Jou Awi simaka

⁴³ Dabolo de o Laban o Yakubka wotemo, “O ngopedeka-ngopedeka ona manena to ngohi ai ngopa, de lo manga ngopa ona manena to ngohi ai dano, de ani biara dangodu manena lo ma sihino ngohino. Komagena so totemo o kia ani lako nosikokelelo, magena lo dangodu ka to ngohi ma rehe-rehe. Duma dohaka, sababu o orasi manena to ngohi ai ngopa-ngopaka de lo to ona manga ngopa-ngopa isibubuoka gena, o kia lo waali tahike onaka.

⁴⁴ Mutuwade o orasi manena dabolo hino la ngona de ngohi nanga teto ma tugu posigoko de posipiliku, la idadi o jaji ma sosininga moi ma ngale ngona de ngohi.”

⁴⁵ So kagena de o Yakub o teto moi wadehe de waokoye, idadi maro ka o tugu moi.

⁴⁶ Dabolo de wotemo awi nyawa yanauka, “O teto nitolomu.” So ona o teto idehe de yatolomu de yatopuye, dabolo de ona iodo de iudo o teto ma dolomu magena ma dateka.

⁴⁷ De o Laban o teto yatotopuye, magena wosironga de o bahasa Aramaic o Yegar-Sahaduta, duma o Yakub wosironga de o bahasa Ibrani o Galed (gena ma ngale o teto yatopuye idadi o sosininga).

⁴⁸ Kagena de o Laban wotemo, “O teto yatotopuye o wange manena idadi o sosininga de o nonako moi ma ngale ngona dede ngohi.” Ma ngale magegena o teto yatotopuye manena ma ronga o Galed.

⁴⁹ De kanaga o riho magena isironga lo o Mizpa (gena ma beto he imatero de o demo moi de ma ngale gena o jaga ma riho), sababu wotemoli, “O Jou Gikimoi done asa wonajaga ngona de ngohi ngaroko pomaritinga ma soa ikuruka.

⁵⁰ Nakoso ngona o sala naaka ai ngopa-ngopaka, de nakoso o ngopedeka ma somoali namodoka salanta ngona asa namodokaka to ngohi ai ngopa-ngopa, gena nomasosininga ngaroko o nyawa ma somoa yanakowa, duma o Gikimoi asa wodadi saksi ma ngale ngona dede ngohi.

⁵¹ O teto itotopuye manena de o tugu moi posigokoka, gena ma ngale ngona dede ngohi o orasi manena.

⁵² O teto itotopuye de o tugu manena idadi o sosininga moi gena, igogou-gogou o orasi ma simaka ngohi akuwa tatiho o teto itotopuye magena de ai sininga datorou ngonaka. De komagena lo ngona akuwa natilaku de natiho o teto itotopuye magena de ani sininga datorou ngohika.

⁵³ De lo togolo tanu o Abraham de o Nahor manga Gikimoi, Una magena to ngone nanga baba manga Gikimoi, done asa idadi hakim ngoneka.” Kagena de o Yakub wosasi ma ngale awi baba o Ishak to una awi Gikimoi wisusuba.

⁵⁴ De o Yakub wosisuba so awi suba o haiwani moi watola o tala magenaka. De una wakoro awi ria de awi gianongoru so ona yangodu imatolomuno. So ona iodo de iudo daboloka, de ka o putu magena bato ona imasidodogu o tala magenaka.

⁵⁵ Ma langino, de o Laban awi dano-dano yangodu wahameka, de ma ngale awi ngopa yasinotoka wotemo, “Tanu ngone pooho o dame ma rabaka.” Dabolo de o Laban asa womajobo woliho awi doku de awi tahuka.