Dodadi 3 - O GIKIMOI AWI JAJI ma BUKU

O nyawa ma nonoma o Gikimoi Awi beseso yaholu

¹ Ma orasi magena de o bi haiwani ifofufuru o Jou Gikimoi wosidadika, dangodu ma rabano de o haiwani o ngihia gena ma cawaro wogaka so ma edekati foloi datorou. So kagena de o ngihia moi asa ma sininga ma rabano o dorou ibao so o ngopedeka muna magena imibaja itemo, “Idodooha o Gikimoi winisibeseso nginika, ‘O bi gota dangodu ma sopo upa niaodo.’ ”

² Duma muna motemo o ngihia magenaka, “Hiwa! O bi gota dangodu ma sopo gena aku miaodo.

³ Ka cawali o Gikimoi wotemo, o gota moi o doro ma dongirabaka iooho gena ma sopo upa miaodo de lo upa miatigi. Nakoso o sopo magegena miaodo eko miatigi done ka misone.”

⁴ Magena de o ngihia imibaja kali de itemo, “Hiwa, Una winisihagaka! Nisisonewa, duma nisioho!

⁵ Una wanako nakoso o sopo magena niaodo de o orasi magena asa o loha de o dorou nisinako, so done nimaketero dede Una.”

⁶ So komagena muna manano o sopo magena daloha. De damonge nakoso paodo de lo asa inasicawaro. Komagena manano de monyafusu poli, so gila-gila o sopo magegena madehe so maodoka. So dabolo de mowihike ami rokaka so una lo waodoka.

⁷ Ato yaodo dabolo de imatodoka ona yasinoto imanako ka imawatoka. So o ara ma gota ma soka magena yadehe so yauri yaaka manga baro.

⁸ Imada-mada de o Jou Gikimoi o doro magena watagi-tagi de ona yasinoto Awi dipipi iise. De iloda so o doro ma dongirabaka imamingihuka, la Una upa wakelelo.

⁹ Duma o Jou Gikimoi woaso o nyawa una magenaka, “Ngona kiaka nahika.”

¹⁰ De wosango wotemo, “Ngohi Ani dipipi toiseka, duma imodo so toloda tomamingihuka, sababu ka tomawatoka.”

¹¹ So o Gikimoi wotemo, “Dadoohaso nomanako ka nomawatoka. Nagala o gota ma sopo tonisimamahawa gena naodoka.”

¹² De o nyawa una magena wotemo, “Sababu o ngopedeka noihihike la idadi to ngohi ai dodiao muna magena o sopo magegena moihike, so taodoka.”

¹³ So o Jou Gikimoi wotemo munaka, “Ngona o kia naakaka.” De motemo, “O ngihia magena ibaja so o sopo magegena taodoka.”

¹⁴ Imaaka komagena so o Jou Gikimoi wotemo o ngihiaka, “Maro o kia ngona naaakaka so o bi haiwani dangodu ma rabano ka ka ngona asa Ngohi tonisibobeto. De ani poko asa notase o tonako de o gaapo asa iwosa ani uruko ma bati ani sone ma orasi.

¹⁵ Komagena Ngohi tinisikadanggutu ngona de o ngopedeka muna manena, ngona de muna nia ngopa de lo nia danoku. So to ngona ani ngopa de ani dano asa manga sahe yapiropu de to muna ami ngopa de ami dano asa manga tutuweneka yatudu.”

¹⁶ De Una o ngopedekaka womisitemo, “Maro komagena ngona naakaka so asa nopuo de ani sangisara idogo, so ani siri asa ifoloi. De asa nowisigise ani rokaka de lo una asa wonipareta ngonaka.”

¹⁷ Dabolo de wisitemo ma rokaka, “Ngohi tonisibesesoka ngona o gota ma sopo magena upa naodo, duma ani pedeka ami demo namote so naodoka. La maro komagena ngona naaakaka, so Ngohi o tonaka tosibobeto la nomanara datubuso de ani galasahu ma giliho asa ngona naodo ma bati ani sone ma orasi.

¹⁸ Komagena o tonano asa o totopo de o huru ioho de lo o ngangaru ma soka asa idadi to ngona ani ino.

¹⁹ So komagena ani oho asa isangisara so ani manara dasihilo la ani galasahu ma giliho asa naodo ma bati ani sone ma orasi. Komagena lo ngona ani sihino o tonano so done noliho nomadadi o tona kali.”

²⁰ O nyawa ma nonoma awi ronga o Adam de ma pedeka womisironga ongo Hawa (ma ngale o oho yasiooho), sababu muna done o nyawa yangodu manga awa.

²¹ O orasi magena de o Jou Gikimoi o haiwani ma kahi wadehe so waaka manga baro de wahike onaka la imasibaro.

O Adam de ongo Hawa wadusu o Eden ma dorono

²² De o Jou Gikimoi wotemo, “So komagena o nyawa una magena wiaka so una imatero maro Ngone, de wanakoka o loha de lo o dorou. Duma una towisimaha kawa wotagi o gota isiooho magenaka la upa sidago ma sopo magena wadehe kali la waodo so awi oho ka sidutu ikakali.”

²³ Kagena de o Jou Gikimoi wisisupu o nyawa magegena o Eden ma dorono so wodongosa la bilasu wodadi wototoro. So komagena una wisihino o tonano so o tonaku watoro la wooho.

²⁴ Komagena de o Jou Una magena wisisupuka de wituluruka, so o Eden ma wange ma nyonyieka wasigoge de o kerub yamuruo naga. Ona magena o malaikat manga buturu ilalamo. O gota isiooho ma ngeko magena yojaga la o nyawa upa iwosa. De lo o sumarangi moi wosijaga so ibulutu hika de hino de ma leto ka isosora.