Dodadi 29 - O GIKIMOI AWI JAJI ma BUKU

O Yakub wogoge o Laban awi tahuka

¹ So kagena de o Yakub womajobo kali, de wotagi wokahoko o bi doku o wange ma nyonyieko.

² Ma orasi womasidiado o pido moika, de womaginano hika de hino de wakelelo o sumu moi, kagena o kabi de o duba o bolu saange yogilolino o sumu magena ma dateka, sababu bilasu o sumu magenaka o sowohi-sowohi manga kabi de manga duba o ake isiudo. Kanaga lo o sumu magena ma dodalake gena o teto ilalamo moi.

³ So nakoso manga kabi de manga duba ma bobolu magena dangodu yaahono, kagena de asa o nyawa ona magena o sumu ma dodalake o teto ilalamo magena yaloloka, de asa o ake isiui la to ona manga kabi de manga duba isiudo. Dabolo de asa o teto magena yalolo kali, la o sumu magena isitalakeka.

⁴ Ma hiwasi de o Yakub wasano o nyawa ona magenaka wotemo, “O gianongoru ngini manena o kiano ma nyawa.” De ona itemo, “Ngomi o Haran ma bi nyawa.”

⁵ De wosano kali onaka, “O Nahor ma dano o Laban gena ngini ka niwinako?” De ona itemo, “Una magena ngomi ka miwinako bai.”

⁶ Kagena de o Yakub wotemo kali onaka, “So una kanaga wososanangi?” De ona itemo, “Una gena wososanangi. Duma hika nomaginano ma ngopa o ngopedeka ongo Rahel lo nogenaka, muna lo to una awi kabi de awi duba maaho la kanena o ake mosiudo.”

⁷ De o Yakub onaka wotemo, “O wange gena asa itotiai so daputu waasi, de dadoohaso nia kabi de nia duba niatolomu. Lebelaha hika o ake nisiudoka de niaaho la nitagi nisiodo kali.”

⁸ Duma ona isango itemo, “Ngomi kanena mia manara komagenawa. Bilasu mia kabi de mia duba ma bolu la imatolomu dangoduka, de asa o teto magena mialolo eko o sumu ma dodalake miahoika, de asa mingodu mia kabi de mia duba misiudo.”

⁹ Ma orasi ka wobobicarasi de ongo Rahel de to muna ami kabi de ami duba asa imasidiadoka. Ngaroko muna o ngopedeka moi, duma to ma baba awi kabi de awi duba muna masowohi.

¹⁰ Ma orasi o Yakub womikelelo ongo Rahel gena, ma awa ma hira masirete o Laban ma ngopa, la o Laban awi kabi de awi duba maaho, de una wakahika o sumu ma dateka. Gila-gila o sumu ma dodalake o teto ilalamo magena waloloka, de o ake o sumuka wosiui so o kabi de o duba magena wosiudo.

¹¹ Wosiudo dabolo de asa o Yakub wahika ongo Rahel so imarimake de awi nali de awi more ifoloika, so woari.

¹² De lo womasingangasu munaka wotemo, “Ngohi manena igogou to ngona ani baba de to ngohi ai awa gena o hira de o bira, so ngohi manena ongo Ribka ami ngopa.” Gila-gila muna momagogora motagi la ma baba o Labanka mosingangasu.

¹³ So de ma baba woise o habari magena ma ngale ma bira ma ngopa o Yakub wahino, de tai-tai womagogora so wahika wisibubusu, so imakololo de wihameka, de wingaho so itagi awi tahuka. So o tahu ma rabaka de asa o Yakub wosingangasu ma ngeko idodooha gena wosijarita o Labanka.

¹⁴ De o Laban wotemo, “Igogou-gogou, ngona manena to ngohi ai toto ma depi.” Komagena so o Yakub o Laban awi tahuka wogoge ma deka o ngoosa moika.

O Yakub o Laban awi manara waaka ma ngale ongo Rahel de ongo Lea womasipedeka

¹⁵ Kagena o Yakub wogoge o ngoosa moika, de o Laban wotemo unaka, “Idadiwa bolo, nakoso ngona nomanara ngohika, de ka toniparacuma eko kia lo waali tonihike, sababu ngona gena ai bira ma ngopa moi. So hika noidedemo o kia ngona ani dupa ngohika tonihike ma ngale ani gangela ma fangu eko ma fanggali.”

¹⁶ O Laban una kanaga awi ngopa o jojaru yasinoto moriria moi ami ronga ongo Lea, de kanaga mononongoruku moi muna ami ronga ongo Rahel.

¹⁷ Ongo Lea gena muna migasi de ami lako sutu irongo, duma ongo Rahel muna miloha de ami jamani daoga.

¹⁸ O Yakub gena ongo Rahel foloi womidupa, sababu magegena so una wotemo, “Epe, ngohi todupa tomanara ma deka o taungu tumudingi, hitilahi ani ngopa mononongoruku ami ronga ongo Rahel noihike la idadi ai pedeka.”

¹⁹ De o Laban wosango wotemo, “Tosidooha de o nyawa ma somoa tahike, lebelaha ngonaka tonihike. So hino la nogoge ngohika bato.”

²⁰ Idadi komagenaka, so o Yakub asa womanara o Labanka ma deka o taungu tumudingi, hitilahi ma ngopa mononongoruku gena womasipedeka. Duma de ma ngale awi dupa de lo awi gawene munaka o taungu tumudingi ma deka gena wamalo koloko ka o wange muruo naga de yaadoka.

²¹ So manga jaji ma orasi yaadoka, de o Yakub wotemo o Labanka, “Hika ai bobai nomisisupu la ngomi asa mikawi, sababu nanga jaji ma orasi yaadoka.”

²² So kagena de o Laban o bi nyawa o doku ma rabaka yangodu wakoro ma ngale manga kawi magena wosirarame.

²³ So ma putuku de o Laban o Yakub wisihaga so ma ngopa moriria ongo Lea gena wotagi womitota duma o Yakub wominakowa, so o putu magena ona imasikiiduka.

²⁴ Komagena ongo Zilpa o Laban womihike ongo Leaka, la idadi to muna ami roriwo eko ami nyawa ileleani ami tahu ma rabaka.

²⁵ So de ma ginitano womikelelo. Wewe, ongo Rahel misowo duma ka moriria ongo Lea! Kagena de o Yakub wotemo o Labanka, “Ce! Ma nonomaka pomarijaji ngohi tomanara ngonaka ma ngale gena ongo Rahel. De kiaso noiaka komanena de lo ani akali ma dorou nosipake ngohika.”

²⁶ Duma o Laban wisango de wotemo, “To ngomi mia doku ma adati de ma galepu gena, idadiwa mia ngopa iriria ikawi waasi de inonongoru gena miasikawi idoma.

²⁷ So hika posimote la posidadi kasi ani kawi ma rarame de ai ngopa muna manena ma bati o wange tumudingika, de done asa ma duuruka de ai ngopa mononongoruku lo tonihike ngonaka, la idadi ani gangela ma bobangu moi, hitilahi ngona bilasu nomanarali ma deka o taungu tumudingi kali.”

²⁸ Manga dupa komagena, so o Yakub wosimote daloha awi kawi ma rarame de ongo Lea isidadi ma bati o wange tumudingi, so daboloka kagena asa o Laban awi ngopa mononongoru ongo Rahel womihike kali o Yakubka la womasipedeka.

²⁹ Komagena lo awi tahuka moleleani moi ami ronga ongo Bilha gena ongo Rahelka womihike la idadi ami tahuka ma nyawa ileleani moi.

³⁰ Kagena de o Yakub lo imasikiiduli de ongo Rahel de awi siningaka gena ongo Rahel foloi womidupa de womisiboso dede ongo Leaka. Ma ngeko komagena so o Yakub bilasu womanara kali o Labanka ma deka o taungu tumudingi kali.

O Yakub awi ngopa-ngopa

³¹ O Jou Gikimoi wanako o Yakub awi sininga igogou ongo Lea gena womidupawa, ma ngale magegena o Jou aku waaka so ongo Lea done asa de ami roheka de mopuo, duma ongo Rahel gena asa mopuowa.

³² Ma orasi ongo Lea modami de mitilibu, de asa mosibuo o ngopa yanau moi so iwisironga o Ruben (gena ma ngale “He! Ngo yanau,”) sababu motemo, “O Jou gena igogou wakelelo to ngohi ai sininga ma beleso, so kanena de isikahika done asa ai roka ngohi lo woidupa de woisiboso.”

³³ Kagena de modami so mitilibu kali so mowisibuo kali o ngopa yanau moili, de motemo, “O Jou gena wanakoka igogou ngohi gena ai roka woidupawa, de o Jou asa o ngopa yanau manena lo woihike kali.” So ami ngopa una magena mowisironga o Simeon. (Nako o bahasa Ibrani ma demo “Simeon” gena ma beto he imatero de o demo moi de ma ngale gena woise.)

³⁴ Kagena de modami so mitilibu kali de mowisibuo kali o ngopa yanau moili, de motemo, “Manena moili ma ngale gena ai roka foloi woidupa ngohika, sababu de una manena so awi ngopa yanau he yaruwange dabolo ngohi tosibuo.” Ma ngale magegena so ami ngopa una magena mowisironga o Lewi (gena ma beto he imatero de o demo moi de ma ngale gena pomaricade).

³⁵ Kagena de modami so mitilibu kali so mosibuoli o ngopa yanau moili, de motemo, “Manena moili gena ai sukuru tatide o Jou-ka.” Ma sababu magegena o ngopa una magena mowisironga o Yehuda (gena ma beto he imatero de o demo moi de ma ngale gena o giliri). So ka una magenaka de ongo Lea he mopuo kawa.