Dodadi 28 - O GIKIMOI AWI JAJI ma BUKU

¹ So kagena de ma baba ma ngopa wononongoru iwiasoka, de unaka wotemo, “Ai ngopa, hino nomatamiye ai dateka la o kia naga moi tonibesesosi. Nakoso nokawi de upa lo o Kanaan ma ngopedeka gena nakawi.

² Ma ngale magegena hika nomasidailako, la notagi o Padan-Aram ma dokuka de nogoge ani awa ma baba o Betuel awi tahu moika. La kagena asa o ngopedeka moi nomagese ani awa ma hira ma duhutu o Laban awi ngopa-ngopaku de asa nomasipedeka.

³ Tongongano de togolo tanu o Gikimoi Wilalamo asa Awi laha wosidumu ngona de ani pedekaka, la asa nipuo sidago lo ani ngopa de ani dano done ifoloisi idogo de yadala. La ma ngale ani ngopa de ani danoku done asa yobuo-buo sidago manga bangsa ma bolu gena yadala o duniaka.

⁴ De lo tanu Awi laha kia o Abrahamka iwisidumuka gena, komagena lo ngonaka sidago lo ani ngopa de lo ani galaweweku. La ma ngale ngona aku napareta o tona eko o doku kia ngona nogogoge magena maro ka o nyawa itatagino moi. O tona magena o Gikimoi iwihike dabolo o Abrahamka.”

⁵ Dabolo de ma baba o Ishak wisulo ma ngopa o Yakub womajobo de wotagi wokahika o Padan-Aram ma dokuka la kagena o Betuel ma ngopa o Laban o Aram ma nyawaka, ena gena ongo Ribka muna woriria o Esau de o Yakub manga awa to muna ami hiraka.

Woriria o Esau womasipedeka kali

⁶ Woriria o Esau wikelelo igogou ma baba ma ngopa wononongoruka wiaso so wogolo o Jou Awi laha widogo unaka, de wisulo lo daboloka wotagi kadoka o Padan-Aramka, ma ngale o ngopedeka womasari la kagena asa wokawi. Upa sidago lo o Kanaan ma ngopedeka de una wakawi.

⁷ De igogou wononongoru wosigise de wamote ma baba de ma awa manga demo, so gila-gila womajobo de wotagi wakahika o Padan-Aramka.

⁸ Kagena asa woriria womanako gena, igogou-gogou ma baba gena o Kanaan ma ngopedeka gena wadupawa ma dorou.

⁹ Ma sababu magegena ma ngopa woriria, ngaroko kanaga lo awi pedeka yasinotosi o Kanaan ma nyawa, una wotagi so ongo Mahalat womidehe de womasipedekali. Ongo Mahalat gena ami baba o Ismael, de ami ete gena o Abraham, de lo ami hira gena o Nebayot.

Wononongoru o Yakub awi doguruga moi o Betelka

¹⁰ Mutuwade o Bersyebaka de wononongoru wotagi wokahika o Haran ma kotaka.

¹¹ So wahika ma soaka de widuputuka, so bilasu o riho womasisari la womaidu kasi. So o teto moi wadehe la waaka awi gogerena, bolo de kagena womaidu so o teto magena womasigerenaye.

¹² De awi gogiolo ma rabaka asa una wotoguruga gena wakelelo o ngute ikukuru-kuruye moi iokoye o duniaka, de ma ide sidago o sorogaye itiki eko yaado. De wakeleloli o Gikimoi Awi malaikat-malaikat gena iuti de idola, yamote o ngute magegena.

¹³ De wikelelo o Jou lo Awi simaka de wotemo, “Ngohi manena ani ete de nitopora o Abraham awi Jou Gikimoi de lo o Ishak awi Jou Gikimoi. O tona kiaka ngona nomaiiduka o orasi manena gena done asa tonihike ngonaka, de lo ma bati ani ngopa de ani dano, sidago lo ani galaweweku.

¹⁴ Ani ngopa, de ani danoku, de lo galaweweku o orasi ma simaka done asa manga dala maro o dowongi o teo ma dateka. So done asa ifero de yodobiau, de lo yapareta o wange ma siwa, o wange ma dumu, o koresara sidago lo o koremiaka. So de ma ngale ngona, de ani ngopa, de ani dano sidago lo ani galaweweku o bi nyawa yangodu o dunia ma dokuka asa o Jou Awi laha wosidumu.

¹⁵ Igogou-gogou, ngona asa Ngohi tonidodiao de ngona asa Ngohi tonitaru, maro o dadaru taloloha moi ani dodagi ma rabaka de kiaka bato ngona nokahika. De Ngohi asa tonidiko de toningaho, la tonisigiliho kali o tona magenenano asa nokahino kali. Sababu Ngohi gena tonidongosa kawa, duma Ngohi bilasu taaka maro o kia Ngohi tonijaji dabolo ngonaka.”

¹⁶ Ma orasi o Yakub awi gogiolo ma rabaka de wamamalono de wotemo, “Igogou-gogou, o riho manenaka o Jou lo Una kanaga de kiaso ngohi tanakowa.”

¹⁷ So una wohairani de wotemo, “Pei! O riho manenaka gena ka pohairani poli. Manena ngaroko lo o Gikimoi Awi tahu de lo manena o soroga ma ngora moi.”

¹⁸ Ma langino Yakub o teto womasigogerena magena wadehe de waaka maro o tugu moi. So waokoye de o gososo woguseka, ma ngale o tona magena igogou o Gikimoi Awi tona.

¹⁹ De o riho magena wosironga o Betel, ma ngale gena o Gikimoi Awi Tahu, duma idodoma o riho magena isironga gena o Lus ma kota.

²⁰ Dabolo de o Yakub awi sasi waaka o Gikimoika, de wosumbayang wotemo, “Nakoso igogou Ngona asa noidodiao de noitaru ai dodagi ma rabaka manena, de o ino noihike la aku toodo de o baju noihike la aku tapake,

²¹ sidago ngohi aku toliho ai baba awi tahuka, gena igogou Ngona o Jou gena to ngohi ai Gikimoi.

²² De lo o teto taakaka maro o tugu moi, magena idadi to Ngona Ani tahu ma ngale inisuba. De kanaga o kia bato Ngona noihike ngohika, done asa todupa taregu la o gimina ma mogiowoka magena o regu moi tahike maro ai suba Ngonaka.”