Dodadi 26 - O GIKIMOI AWI JAJI ma BUKU

O Gikimoi Awi jaji o Abrahamka o Ishak wisitatapu kali

¹ Imatero maro idodomaka ma orasi o Abraham woohosi, de o bi doku magenaka manga ino he damata gena o orasi manena asa idadi kali. So ma baba o Ishak womatuluru wotagi o Filistin ma nyawa manga kolanoka o Abimelekh o kota Gerarka, la aku kagena wogoge.

² Kagena de o Jou womasimane unaka, de wotemo, “Ishak, upa o Mesirka notagi duma bilasu nogoge o tona moi Ngohi tonisidudumuka.

^3-4 O tona magenaka, nakoso nogoge, de Ngohi asa tonidongosawa de Ai laha lo tonisidumu ngonaka, de lo o tona dangodu magena asa tonihike ngonaka de lo ani ngopa de ani danoku. De ani ngopa de ani danoku magena lo asa ifoloi yadala, manga dala gena imatero de o bi ngoma o dipaka. De ma ngale to ngona ani ngopa de ani dano moi so done o dunia ma bi bangsa dangodu yamake o loha. Komagena ani baba o Abrahamka gena Ai jaji idomaka so asa tosiganapu.

⁵ Sababu ani baba gena to Ngohi Ai demo de Ai bobita dangodu gena ka wosigise.”

⁶ So o Ishak o Gerar ma kotaka wogogeka.

⁷ Wogogeka, de o kota magena ma nyawa yahino ma ngale ma pedeka ngo Ribka gena imisano. Una wimodo so awi sininga ma rabaka wotemo, “Nako tosingangasu muna magena ai pedeka de nagala ona asa ngohi itooma, sababu muna magena miloha poli.” So wosango onaka wotemo, “Muna magena to ngohi ai bira.”

⁸ So daboloku de o Ishak kagena wogoge so he o wange muruo nagaka, de kanaga o wange moiku de ma kolano Abimelekh womaginano awi o jangelano de wakelelo o Ishak de ongo Ribka gena imaricade de imarihame o ngihi ma rabaka.

⁹ Ma sababu komagena so wosulo o Ishak iwiaso la awi simaka, de wotemo, “Ce! O ngopedeka magena, ngaroko lo ani pedeka, de dadoohaso ngona notemo muna gena ka ani bira moi.” De o Ishak wosango wotemo, “Awadede! Baba, ngohi imodo poli, nakoso totemo muna magena to ngohi ai pedeka, de ma ngale muna gena o nyawa done asa ngohi itooma.”

¹⁰ Kagena de ma kolano Abimelekh wotemo, “Awadede! Dadoohaso ani manara komagena naaka ngomino. Nakoso kanaga ai kawasa ma rabaka la o gohiduuru moi imasikiidu de to ngona ani pedeka, done ngona masirete asa o bodito nomigaka so igogou ngomi de mia sala o Gikimoi Awi simaka.”

¹¹ So dabolo de ma kolano Abimelekh wobeseso de wasisitiari awi kawasaka wotemo, “Nakoso kanaga o nyawa moi la wobarani waaka o dorou, bai o nyawa una manenaka de bai lo ma pedeka, una magena bilasu wisangisara sidago lo wosone.”

¹² O orasi magena de idadi o Ishak o doku magenaka wosolano awi gisisi wosihaja ma ngale awi doroka wosidato de o taungu magena una o sopo wamake idala gena, iliho ma para ratu moi wositero maro o kia una watudu eko lo wodato. Sababu o Jou Gikimoi Awi laha wosidumu unaka,

¹³ so awi doro de awi joro-joro ma sopo foloisi idogo-dogo de foloisi idala, so una wodadi maro o nyawa wokakaya moi.

¹⁴ Mutuwade o Filistinka ma nyawa widoosa unaka, sababu awi nyawa ileleani yadala komagena lo awi duba de lo awi sapi foloisi idala,

¹⁵ sidago lo o sumu, kiaka idodoma o Abraham woohosi de awi nyawa ileleani yapopuawe gena, o tona yogese so yodiduka.

¹⁶ Komagena so ma kolano Abimelekh wosulo wotemo o Ishakka, “Hika notagi de nosupu to ngomi mia doku de mia tonano. Ce! Upa sidago ngona foloisi nokuasa dede ngomi o doku ma duhutu.”

¹⁷ Imaaka komagena, so o Ishak wosupu de wotagi de kagena o Gerar ma pidoka o dadaru womasigoko. So kagena una wogoge gena itekawa.

¹⁸ So o sumu wopuawe kali, kiaka idodoma de ma baba o Abraham wapuaweka, duma ma orasi o Abraham wosone de wositodongosaku o Filistinka ma nyawa o tona yogese de yodididuka. De o bi sumu magena wosironga gena imatero de ma baba wosirorongaka.

¹⁹ O Ishak wosulo so awi nyawa ileleani kagena o Gerar ma pidoka o sumu ipuawe kali, de ma ake yamake gena foloisi ilamo.

²⁰ Duma o nyawa o haiwani yasosowohi o Gerarka gena yatoosa so ona de o Ishak awi haiwani yasosowohi gena imatekekangamo de ona itemo, “Wewe! O ake manena gena to ngomi mia ake.” Komagena ma sababu so o sumu magena o Ishak wosironga gena “O Gangamo”.

²¹ Kagena de o Ishak awi gilalo ileleleani o sumu ma somoa kali yapuawe, duma o sumu magena lo ka yongamo kali. Ma sababu komagenali so o sumu magena o Ishak wosironga lo “Pomakalawangi”.

²² Imaaka komagena so lebelaha ona imatuluru o riho magegenano de o sumu ipuawe kali ma para ma saangeka. O riho damomuaneka manena o sumu yapuawe kali, duma o gangamo he ihiwaka de idadi kawa. Ma sababu komagena so o Ishak o sumu magena wosironga lo “Inasimahaka”. De wotemo, “O orasi manena o Jou Gikimoi wonasimahaka ma ngale ngone aku pogoge de podobiau o tona eko o daera manenaka, de done asa ngone nanga oho daloha de posanangi.”

²³ Dabolo de gila-gila o Ishak womajobo de wotagi, so una asa womasidiado o Bersyeba ma dokuka.

²⁴ So o putu magena de o Jou Gikimoi womasimane o Ishakka de wotemo, “Ngohi manena ani baba o Abraham awi Gikimoi so upa ngona nimodo, sababu Ngohi asa kanaga dede ngonaka de Ai laha tonihike ngonaka, komagena lo taaka sidago ani ngopa de ani dano asa dala icarawa, sababu magena to Ngohi Ai jaji moi Ai nyawa woisigogise o Abrahamka.”

²⁵ So kagena o Ishak o teto watopuye de waaka o nonako moi ma ngale o riho magegenaka, de o Jou Gikimoika wisuba de wigiliri. De una lo o dadaru kagena womasigoko de awi gilalo ileleleani gena o sumu ipuawe kali.

O Ishak de ma kolano Abimelekh imakajaji

²⁶ So kanaga o wange moiku de ma kolano Abimelekh de o Ahuzat awi siduduga moi de lo o Pikhol o prajuritka manga kapita yahino la ma ngale aku imakamake de o Ishak.

²⁷ So o Ishak wotemo, “Idodoma ngini manena gena ngohi nilawangi sidago lo nisisupu nia doku de nia tonano, de o orasi manena niahino ngohino gena nia edekati o kia eko lo idodooha.”

²⁸ Kagena de ona isango itemo, “O orasi manena asa ngomi mianako ma diai gena igogou ngona gena kanaga o Jou wonimote-mote, so nakoso nomode de to ngomi mia dupa gena tanu hino la ngone pomakajaji de lo pomatekesikasasi.

²⁹ Idomaka ngomi o dorou moi lo upa sidago miaaka ngonaka, de lo misimaha la ngona aku notagi nakahika de nakahino ani rohe isosanangi. Komagena lo o orasi manena bilasu nagogou ma loha kanena de isikahika upa lo o dorou moi naaka ngomika. Igogou, o Jou Awi laha gena igoge dede ngonaka.”

³⁰ Dabolo de o Ishak wasingosa awi dadaruka de wasitamiye, so asa ona iodo de iudo de manga sininga isosanangi.

³¹ Ma goginitano, de asa ona ka ilangi-langisi, de manga jaji isibicara de lo isiputuru de moi-moi to ona manga sasi. Dabolo de o Ishak womasiloloaka de wasimaha ona iliho, so ngaroko ona imatekedodiaoka, duma imakitinga kali.

³² O wange magena lo o Ishak awi gilalo ileleleani asa yahino isingangasu unaka, ma ngale o sumu yapapuawe gena ona itemo, “Baba, o sumu ma ake gena miamakeka.”

³³ So una o sumu magena wosironga Syeba. (Nako o bahasa Ibrani ma demo “Syeba” gena ma beto he imatero de o demo moi de ma ngale gena o sasi de lo o pahala.) Komagena ma ngeko de ma sihino o doku magena sidago isironga lo ka o Bersyeba (gena ma ngale o pahala ma sumu de lo o jaji ma nonako).

O Esau awi pedeka gena o bangsa ma somoano

³⁴ Ma orasi o Ishak awi ngopa woriria o Esau awi umuru he o taungu moruha, de una wokawi de o jojaru yasinoto ona magena o Het ma bi nyawano. Ena gena, moi ami ronga ongo Yudit o Beeri awi ngopa de moili ami ronga ongo Basmat o Elon awi ngopa.

³⁵ Ona yasinoto magena manga sisininga, de manga goko, de manga bane asa o Ishak de ongo Ribka manga oho yakangela sidago lo manga sininga ipeleso.