Dodadi 25 - O GIKIMOI AWI JAJI ma BUKU

O Abraham awi ngopa de awi dano ma pedeka ma somoa moili

¹ O Abraham kanaga lo womodoka de o ngopedeka moili ami ronga ongo Ketura.

² So ma pedeka muna magena mopuo ami ngopa-ngopa yanau manga ronga o Zimran, o Yoksan, o Medan, o Midian, o Isybak de lo o Suah.

³ O Yoksan gena una awi ngopa yanau o Syeba de o Dedan. O Dedan gena una awi ngopa de awi danoku o nyawa igogoge o daera o Asyurka, o daera Letushka, de lo o daera Leumka.

⁴ O Midian gena una awi ngopa yanau o Efa, o Efer, o Henokh, o Abida de lo o Eldaa. Ona yangodu magena ongo Ketura ami ngopa de ami danoku.

^5-6 Ma orasi o Abraham ka woohosi de awi ngopa-ngopa kanaga awi pedeka ma somoaka, gena manga gimina wasitokuka de wahikeka. Dabolo de ona magena wasulo so itagi imatuluru ikahisa o Kanaan ma daera ma wange ma nyonyiesa, ma ngale ona bilasu imatinga ma soa ikuru la ma ngale upa igoge de o Ishak to una awi ngopa ma duhutu. So una awi arata dangodu o Ishak wisitodihike la idadi to una awi warisi.

O Abraham wosone

^7-8 O Abraham gena he wipereki ma duhutuka sidago awi umuru ma dala o taungu 175 de una wosone.

^9-10 So awi ngopa o Ishak de o Ismael iwipoosu o Makhpela ma Aruka, kagena o Mamre (eko lo o Hebron) ma dateka ma wange ma nyonyieka, idodomaka o tona magena o Zohar ma ngopa gena o Efron o Het ma nyawa moi awi tona. So o Abraham ma pedeka ongo Sara idomaka lo kagena mipoosu.

¹¹ Ma orasi ma baba wosoneka, de o Gikimoi Awi laha wosidumu ma ngopa o Ishakka, de ma ngopa una magena asa wogoge o sumu ma dateka o Lahai-Roika (gena ma ngale Una Woooho Ngohi Woikelelo).

O Ismael awi ngopa de awi danoku

¹² O Ismael una magena o Abraham de ongo Hagar manga ngopa yanau moi. Ma awa muna magena o Mesirka ma nyawa moi, ena gena ongo Sara ami gilalo ami tahu ma rabaka moleleleani moi.

¹³ O Ismael gena una awi ngopa yanau kanaga yamogiowo de sinoto de magena nakoso papeto pamomoi iririaka, de posikahuku ena gena o Nebayot, o Kedar, o Adbeel, o Mibsam,

¹⁴ o Misyma, o Duma, o Masa,

¹⁵ o Hadad, o Tema, o Yetur, o Nafish de lo o Kedma.

¹⁶ O bi ngopa-ngopa ona magena idadi lo o bi bangsa ma bolu mogiowo de sinoto manga kolano de manga topora, de lo manga doku de manga goge ma ronga gena isitero maro moi-moi to ona manga ronga.

¹⁷ O Ismael wooho ma deka o taungu 137-ka, kagena de wosoneka.

¹⁸ Awi ngopa de awi danoku igoge gena o Hawilaka de isikahisa o Syur ma tonaka, gena o Mesir ma wange ma nyonyiesa so o Asyur manga simaka, so imatinga dede o Abraham awi ngopa de awi dano ma somoa.

O Esau de o Yakub yasibuo

¹⁹ Manena gena o Abraham awi ngopa o Ishak awi jarita. O Abraham o ngopa moi wamake awi ronga o Ishak.

²⁰ Ma orasi o Ishak wilamoka so awi umuru o taungu moruhaka, de una wokawi de o ngopedeka moi ami ronga ongo Ribka, muna magena o Laban ma bira mononongoruku de manga baba awi ronga o Betuel una magena o Aramka ma nyawa moi, ena gena o Mesopotamia ma daerano.

²¹ Duma ongo Ribka ami ngopa ihiwa, ma sababu komagena so o Ishak wosumbayang de wogolo o Jou Gikimoika, ma ngale ongo Ribka aku o ngopa mamake. So o Jou asa wosimote awi gogolo magena sidago lo ongo Ribka aku moroheka.

²² Muna ami ngopa gena isago so mosibuo waasi, de ami poko ma rabaka iruwahe sidago lo ongo Ribka motemo, “Dadoohaso bilasu idadi komanena to ngohi ai poko ma rabaka.” De gila-gila muna mogolo o Jou-ka, la Una aku o ngeko de o simodoto womihike munaka.

²³ So o Jou wotemo munaka, “O bangsa sinoto ani poko ma rabaka, ngona asa nosibuo o bangsa sinoto imakokalawangi. Woriria de wononongoru gena, wononongoru foloisi wiputuru, so wononongoru awi gilalo ma manara datubuso asa woriria waaka.”

²⁴ De ongo Ribka ami orasi yaado mopuo, so mosibuo o ngopa yanau yasinoto sababu ami ngopa isago.

²⁵ Woriria awi kahi gena maro isisawala de lo wigogogo moi koloko o juba dagogo. Sababu komagena so una wisironga lo o Esau. (Nako o bahasa Ibrani ma demo “Esau” gena ma ngale wigogo.)

²⁶ Ma orasi ami ngopa ma sinotoka mosibuo gena awi gia o Esau awi tutuene wacohono. Sababu komagena so wononongoruku wisironga lo o Yakub. (Nako o bahasa Ibrani ma demo “Yakub” gena ma beto he imatero de o demo moi de ma ngale gena o tutuene.) O orasi magena o Ishak awi umuru he o taungu moributangaka, de asa awi ngopa yasinoto magena yasibuo.

O Esau awi haku maro o ngopa woriria wosiija

²⁷ Ipasaka, de o Ishak awi ngopa yasinoto magena ona yalamoka, de woriria o Esau gena awi manara wodidiha de wocawaro so wogoge lo ka o ponga ma pidoka. Duma wononongoru o Yakub una o nyawa moi awi sininga irihi so wodupa wogoge manga tahu ma rabaka.

²⁸ O Ishak wisayangi ifoloi gena woriria o Esauka, sababu awi dupa o wange de ka o sihode waodo. Duma manga awa ongo Ribka ami sayangi ifoloi gena wononongoru o Yakubka.

²⁹ O wange moiku de kanaga wononongoru o kupuo dasosawala womasakahi so de daosaka, womatodoka woriria lo asa wodiha woliho so wisapi carawa.

³⁰ Sababu wisapi poli so una wogolo wotemo wononongoruka, “Ai nongoru, ngohi isapi poli. Kodo! Tanu ani kupuo dasosawala magena sutu noihike.” Ma sababu komagena so una wisironga lo o Edom. (Nako o bahasa Ibrani ma demo “Edom” gena ma beto he imatero de o demo moi de ma ngale gena dasosawala.)

³¹ Kagena de wononongoru wosango wotemo, “Ka daloha hitilahi o ria ma haku magena noihike ngohika.”

³² De woriria wotemo, “Tosidooha de ngohi ai ria ma haku magena sidago ngohi isapi poli so dangade he tosone.”

³³ Kagena wononongoru wotemo kali unaka, “Bilasu nosasi kasi, igogou-gogou o haku magena noihike ngohika.” Gila-gila woriria wosasi sidago o tonaku lo wangapoka de awi haku magena lo ma nongoru wihikeka.

³⁴ Daboloku de asa wononongoru gena o roti de o gaahu kupuo dasosawala wasosakahika gena wadehe de wihike ma riaka. So de woodo de woudo daboloka, gila-gila una wotagika. Ma dodagi de ma ngeko komagena woriria o Esau wosiceke eko wafaduliwa to una awi ria ma haku eko maro o ngopa iriria.