Dodadi 24 - O GIKIMOI AWI JAJI ma BUKU

O Ishak iwisimodoka

¹ O orasi magena o Abraham gena he wiperekika, de o moi-moi waaaka awi oho ma rabaka gena o Jou Awi laha wasidumu dabolo unaka.

² So kanaga o wange moiku de awi tahu ma jojaga, gena awi gilalo imomanara wimoi una magena wosidodihimo de awi arata dangodu de awi gilalo yangodu awi tahu ma rabaka wosidadailako, una magena wiaso so wotemo, “Mote nanga adati de nanga galepu gena hika ani gia gena nahado ai ugu ma litimika.

³ De o Jou gena o Gikimoi kanaga o dipa de o dunia wapopareta Awi simaka nosasi gena, igogou ngona upa lo notagi nahika o Kanaan ma dokuka, la kagena o jojaru moi nomilahi ma ngale ai ngopa o Ishak gena ma pedeka.

⁴ Duma ngona bilasu notagi de nahika kadoka ai doku de ai soaka kiaka kagena ngohi isibubuoka, ma ngale kanaga ai ria de ai gianongoru manga ngopaku o jojaru moi nomilahi de nomisuku, la idadi to ngohi ai ngopa ma pedeka.”

⁵ So kagena de awi gilalo womomanara una magena wosano unaka wotemo, “Idodooha nakoso o jojaru magena ami tahuno mosupu moholu, de ngohi tomingaho lo momote moholu o doku manenano, de kanaga to muna ami dupa gena bilasu ani ngopa gena towingaho de towitota kadoka to ngona ani doku de ani soaka.”

⁶ Duma una wotemo, “Idadiwa bai! De upa lo nobarani ai ngopa nowingaho kadoka o jojaru magena ami tahu de ami dokuka.

⁷ Sababu ngohi manena dabolo, kiaka o Jou Gikimoi o dipa de o dunia wapopareta gena, Una masirete ngohi woisisupu ai baba awi tahuno de ai ria de ai gianongoru manga doku de manga soano, sidago lo Una wojaji gena igogou-gogou o tona manena woihike ngohika sidago lo to ngohi ai ngopa, de ai dano, de lo ai galaweweku. De kanaga Una lo asa wodupa woniriwo so Awi malaikat aku nimote ma ngale o ngeko inihike ngonaka, la o jojaru moi aku namake kadoka ai ria de ai gianongoru manga sidongirabaka, de muna magena modadi ai ngopa ma pedeka.

⁸ Duma nakoso o jojaru muna magena la moholu momote gena ngonaka, o sasi manena nidapaduwa eko inidahewa. Ka cawali upa lo ai ngopa nowingaho kadoka onaka.”

⁹ Dabolo de o gilalo womomanara una magena awi gia gena o Abraham awi ugu ma litimiku wahadoka, de asa una wosasi de wojaji o kia o Abraham wosusulo done asa waaka de awi sininga igogou.

¹⁰ Kagena de awi gilalo womomanara una magena wadehe o Abraham awi unta ngai mogiowo de lo awi arata kiaka o bi moi-moi ma ija ihahali, so awi untaku wosibaneka de womajobo wotagi wokahika woriria o Nahor awi doku de awi soaka, ena gena o Aram-Mesopotamia ma tonaka kudahu o koremiaku.

¹¹ So kadahu wahuku o kota ma duduka womasidiado de awi unta-unta magena wosiwoma kasi, o sumu moi ma dateka. Ona kagena manga orasi nakoso o wange la he itaru so damada-madaka, gena o bi ngopedeka yahino o ake imasiui o sumu magenaka.

¹² So kagena de awi gilalo una magena wosumbayang de wogolo wotemo, “Jou, ai baba Abraham awi Gikimoi, tanu noiriwo ngohi, la o wange manena Ani laha unaka gena nosimane so ngohi aku tamake o jojaru moi modadi awi ngopa ma pedeka.

¹³ Hika ngohi kanena o sumu ma dateka tomaokoye, de ma cunusi de o kota manena ma jojaru asa yahino o ake imasiui.

¹⁴ De kanaga o bi jojaru magena manga sidongirabaka moi done asa togolo munaka, ‘Ai ngopa, tanu ani ake o rubeka magena aku sutu taudo.’ De tongongano muna mosango motemo, ‘Hino, baba, la o ake manena so naudo kasi, dabolo de asa ani unta-unta magena lo o ake tosiudo.’ Nako idadi de imaaka komagena, de tanu muna magegena kanaga nomihirika, modadi o Ishak ma pedeka. So komagena ngohi tanako igogou Ngona Ani laha ai baba o Abrahamka gena nowisikeleloka.”

^15-16 Ma orasi una ka wosumbayangsi, de o jojaru moi miloha icarawa de asa momasigohoye mahino o sumu magenano, de o rube moi mamokuno. Muna ami ronga ongo Ribka, ma baba awi ronga o Betuel, de o Betuel ma baba gena o Abraham awi ria o Nahor de ma awa gena ongo Milka. Ongo Ribka gila-gila mahika o sumuka, de o ake mosiui so ami rubeku moguseka. De matide mamoku so he motagi moliho ami tahuka,

¹⁷ de o gilalo una magegena womagogora wahika womimake munaka, de wotemo, “Ai ngopa, tanu ani ake sutu noihike la taudo.”

¹⁸ De muna motemo, “Kodo, baba! Hino la o ake magenena naudo kasi.” Gila-gila o rube magena mosiguti ami belekaku so macohono, so o gilalo una magena waudo.

¹⁹ So una woudo dabolo de muna motemo, “Ngohi lo asa o ake tosiui la, baba, ani unta-unta asa o ake tosiudo ma bati ma kiri ma dudu lo isisa.”

²⁰ Komagena so cai-cai bato ami ake o rubeka magena moguse o bi unta ma ake ma rihoku, de motagi momagogora o sumuka, o ake mosiui kali foloisi ilamo, ma ngale awi unta-unta magena o ake iudo sidago lo ma kiri ma dudu isisaka.

²¹ O orasi magena o gilalo una magena womitailako womapopongo, ma ngale wanako ma diai gena igogou o Jou aku waaka so awi manara magena aku ma sopo wamake eko ihiwa.

²² So awi unta-unta dangodu magena iudo daboloka, de o Abraham awi gilalo una magena wotagi so awi ngati-ngati ihahali moi o guracino wadehe de wahika ongo Ribka, ami ngunuka wodiliko de ami gia ngai sinoto ma betekoka ma talanga o guraci wositiba daboloka.

²³ De kagena asa muna womisano wotemo, “Ai ngopa, so ani baba gena naguuna. De awi tahuka gena hitilahi o putu moi aku ngohi de ai dodiao ona manena mimasidodogu?”

²⁴ De muna motemo, “Ai baba gena o Betuel, de ai ete gena o Nahor, de ai ede gena ongo Milka.

²⁵ To ngomi mia tahuka gena de ma riho so aku nimasidodogu de lo kanaga o dumule idala ma ngale o haiwani de nanga biara ma ino.”

²⁶ Komagena so o gilalo magena wobukuku de wosuba o Jou-ka,

²⁷ wotemo, “O giliri tatide de tosilamo o Jou Awi ronga, sababu ai baba o Abraham awi Gikimoi gena Una wototiai, so Awi laha asa wosidumu ai baba o Abrahamka, sidago lo maro o kia naga wijajaji unaka so ngohi woituda de woingaho, la woisikahika ai baba to una awi ria de awi gianongoruka.”

²⁸ Dabolo de o jojaru muna magena momagogora motagi ma awa ami tahuka, de o moi-moi idadika gena modedemo onaka.

^29-30 Kanaga muna ma hira woriria moi awi ronga o Laban. Una lo woise o kia ma bira ami dedemo ma ngale o Abraham awi gilalo moi womomanara to una awi demo. De una o Laban lo wakelelo ma bira ami ngunuka, de ami gia ma girinaka, de ma gubalika lo kanaga de ma talanga o guracino. Mutuwade una wosupu awi tahuno, de womagogora wokahika o sumu ma dateka, kia kagena o Abraham awi gilalo moi ka wookoye de lo awi unta-unta.

³¹ So ma hira woriria gena wotemo, “Baba, igogou ngona o Jou Awi laha gena wonihike de wonisidumuka. De dalohawa nakoso ngona de ka o doku ma duduka nogoge. So tanu nahino noimote ngohi la to ngomi mia tahuka nomasidodogu. Kanaga to ngona ani ngihi lo misidailako dabolo, de komagena lo to ngona ani unta-unta ma riho de ma ino lo misidailako daboloka.”

³² So o gilalo una magena wotagi ma hira wimote la kagena to ona manga tahuka wisingosaka. De ma hira gena wosidailako so o unta ma gina magena dangodu yosigutika, de o dumule de o ino yodehe so o haiwani magena yatopo so iodoka. Dabolo de o ake yodehe ma ngale o gilalo una magena de awi nyawa imakokangaho to ona manga dohu yatiodo.

³³ La ma orasi o ino isifato de isiaka dabolo o lamako, de o gilalo una magena wotemo, “Ngohi done manena toodo waasi, nakoso ai baba o Abraham awi beseso tosingangasu waasi nginika.” De ma hira wotemo, “Hika nodedemo.”

³⁴ So kagena de o Abraham awi gilalo womomanara una magena awi demo wosingangasu so wotemo, “Ai baba de ai awa, ai ria de ai gianongoru topakisani. Upa nia sininga ikurangi de niadehe ma ngale. Kodo! Ngohi manena maro ai baba o Abraham awi gilalo womomanara moi awi tahu ma rabaka.

³⁵ Gena ngohi masirete takelelo de tanako ma ngale o Jou wosidumu Awi laha ai baba Abrahamka, so una magena wokaya de awi arata idala poli. O Jou asa wihike unaka awi haiwani gena o duba, o kabi, o sapi, o unta, de o keledai gena idala icarawa, de lo kanaga o guraci de o salaka, de komagena lo awi gilalo yanau bai lo o ngopedeka imomanara awi tahu ma rabaka.

³⁶ De o orasi manena naga una gena he wiperekika, de kodo, ai baba ma pedeka ongo Sara gena o ngopa yanau moi mowisibuoka, so ma baba awi arata dangodu magena idadika to ma ngopa awi arata de awi warisi moi.

³⁷ Komagena imaaka so una masirete ngohi woisulo de bilasu awi simaka tobukuku de tojaji, sidago lo tosasi gena, bilasu awi pareta magena taaka de ai sininga igogou de woisitemo ngohika, gena komanena, ‘Upa lo notagi nasuku de nalahi o bi Kanaan ma ngopa de ma jojaru la ai ngopa nowihike womasipedeka.

³⁸ Duma bilasu notagi de nasari ai ria de ai gianongoruka, ena gena ai baba awi ngopa de awi danoku. So taika la ngona bilasu kudahu notagi ma ngale kanaga ai ria de ai gianongoru manga ngopaku, o jojaru moi nomilahi de nomisuku, la idadi to ngohi ai ngopa ma pedeka.’

³⁹ So kagena de ngohi towisano totemo, ‘Ai baba, nakoso o ngopedeka magena moholu tomingaho nonena tomisikahino, de done taaka idodooha.’

⁴⁰ De una wotemo, ‘O moi-moi ngohi taaka imatero maro ngohi mimarimoi dede o Jou-ka, so Una magegena asa wasulo la aku iniriwo ma ngale ani manara ma sopo magena aku namake. La ngona asa namake ai ngopa ma pedeka gena ai ria de ai gianongoru masirete manga sidongirabano de ai baba masirete awi ria de awi gianongoru manga ngopaku.

⁴¹ So ka cawali ona masirete la nakoso iholu to ngona ani sasi, gena inidapaduwa.’

⁴² So ma orasi kangano ngohi o sumuka tomasidiado de tosumbayang ai sininga ma rabaka, ‘Kodo, Jou! Tanu Ngona ai baba o Abraham awi Gikimoi aku noiriwo la ai manara manena asa ma sopo tamake Ngonano.

⁴³ Ngohi gena he kanena o sumu ma dateka tomaokoye, la nakoso o jojaru moi o ake mahino momasiui de ami ake tagolo la sutu moihike taudo.

⁴⁴ La nakoso muna moihike taudo de modupa lo ai haiwani o unta-unta o ake mosiudo gena, muna magena dabolo o Jou womihirika, idadi to ngohi ai baba o Abraham awi ngopa yanau ma pedeka.’

⁴⁵ Komagena so ka tosumbayangsi de ongo Ribka momasidiadoka, de ami rube mamokuno ma ngale o ake momasiui o sumuka. So kagena de ngohi totemo munaka, ‘Kodo! Tanu noiriwo la ani ake sutu taudo.’

⁴⁶ De gila-gila muna ami rube mosiguti ami belekaku, de motemo, ‘Hino la noudo. De ani unta-unta lo done asa ngohi o ake tosiui la dangodu magena tosiudo ma bati ma kiri ma dudu isisa.’

⁴⁷ Dabolo de asa ngohi tomisano totemo, ‘So ani baba gena naguuna.’ De muna motemo, ‘Ai baba gena o Betuel, ena gena o Nahor de ongo Milka manga ngopa.’ So kagena de o ngati-ngati moi o guracino tadehe so ami ngunuka todiliko de ami gia ngai sinoto ma betekoka o talanga o guraci tositiba.

⁴⁸ De ai baba o Abraham awi Gikimoi, o Jou Una magenaka, ngohi tobukuku de tosuba ma ngale Una towigiliri, sababu Una masirete aku woituda de woingaho ai baba o Abraham awi ria de awi gianongoruka, sidago lo ngohi aku tomimake o jojaru muna magena ma ngale to una awi ngopa.

⁴⁹ So o orasi manena ai demo gena he ikuru kawa, so nakoso daloha ilaku de nisimote daloha ai baba awi dupa de awi sininga ma gawene, maro to una awi gianongoru masirete. De tanu nisingangasu de nidedemo, ma ua eko ma oe, komagenawa eko komagena. Duma nakoso nitemo komagenawa eko ua de, kodo, done ngohi manena kiali taaka de kekiaka tokahikali.”

⁵⁰ So ma hira o Laban de ma baba o Betuel isango itemo, “O baba-baba de o ria de o gianongoru, o moi-moi idadadi manena ma sihino o Jou-no, so ngomi gena he miaaku kawa mitemo de lo akuwa misiholu. So idadi de imaaka maro o Jou Awi dupa so komagena dabolo.

⁵¹ So mia ngopa ongo Ribka gena ngaroko ka nomingaho bato, la idadi ani baba o Abraham awi ngopa ma pedeka, maro kanaga o Jou wosidailako daboloka.”

⁵² Ma orasi o Abraham awi gilalo gena woise to ona manga demo magena, de una winali so manga simaka o Jou wisigiliri de Awi ronga wosilamo.

⁵³ So kagena de o gilalo una magena awi borua wapelenga so o baju, de o jojora o guraci, de lo o salaka so dangodu magena muna ongo Ribka womihike, de komagena lo ma hira o Labanka de lo ma awaka gena wahike foloisi daloha de ihahali.

⁵⁴ Dabolo de o gilalo una magena de awi nyawa imakokangaho yangodu ona iodo de iudoka, de o putu magena ona lo kagena imaidu. So o goginita ona imomino, de una o jojaru ma hira de ma awaka wotemo, “Baba de awa, nakoso daloha ilaku de tanu nimisimaha la ngomi asa miliho kadoka mia babaka.”

⁵⁵ Duma ona itemo, “Kodo! Tanu daloha ilaku de ongo Ribka upasi motagi la kanena mogogesi, hitilahi o nahadi moi eko o wange mogiowo ma rabasi de asa aku muna motagi dede ngini.”

⁵⁶ Duma o gilalo una magena wotemo, “Kodo! O Jou Awi laha wosidumu so ai manara ma sopo magena tamakeka. So hika nisimaha la ngohi aku toliho ai baba awi tahuka.”

⁵⁷ De ona yangodu itemo, “Hino la lebelaha ongo Ribka imiaso ma ngale muna masirete pomisano.”

⁵⁸ So gila-gila muna imiaso de misano itemo, “Idodooha ngona nodupa o orasi manena dabolo o nyawa una manena nowimote.” De muna motemo, “Ngohi gena ka tomode.”

⁵⁹ Mutuwade ona he imibadu kawa so imisimahaka, ma ngale o jojaru ongo Ribka gena de ma awa momipopiara lo itagi dede o Abraham awi gilalo womomanara de to una awi nyawa imakangahoka.

⁶⁰ So ona manga sininga ma loha isidumu so ongo Ribka mitemo, ma demo gena komanena, “Ngona nanga bira gena tanu nodadi o nyawa yadadala manga awa. De ani ngopa de ani danoku yapareta manga saturu ma bi doku.”

⁶¹ Imitemo-temo dabolo de muna de ami gilalo o bi ngopedeka ileleleani yamuruo naga lo ona yangodu imasidailako de o untaku ipane so imajobo imakomote de o Abraham awi nyawa.

⁶² Ma dongoho magena o Ishak gena asa woliho wokahino o Lahai-Roi (gena ma ngale Una Woooho Ngohi Woikelelo) o Tona Negebno, so kanaga wogoge idaku o koresaraye wosima.

⁶³ So kanaga o wange moiku he damada-mada so una wosupu awi doro ma rabaka wotagi-tagi, de womatodoka wakelelo o unta-unta gena idahu ikahie de ka unaye wimeta.

⁶⁴ So de ongo Ribka mowikelelo una magena o Ishak, de muna mouti ami untaku.

⁶⁵ De mosano o gilalo una magenaka motemo, “Una magena naguuna o doro ma rabano asa ka ngone wonametano.” De o gilalo magena wotemo, “Una magena to ngohi ai baba ma ngopa.” So ma ngale mowihoromati gena muna gila-gila bilasu ami baro o saledangi madehe so ami bio mosisaoka.

⁶⁶ Dabolo de o gilalo una magena wodedemo o Ishakka maro o kia una waaka de wosidadailakoka.

⁶⁷ So kagena de o Ishak womisingosa ongo Ribka ma awa ongo Sara gena ami tahuka. Dabolo de muna gena o Ishak womasipedekaka. De muna magena asa una womisiboso ifoloi, sidago lo awi siningaka aku wamake ma siduduga, sababu awi sininga ma beleso gena ma ngale ma awa asa he mihiwaka.