Dodadi 23 - O GIKIMOI AWI JAJI ma BUKU

Ongo Sara mosone

¹ O Abraham ma pedeka ongo Sara muna magena miperekika, so ami umuru ma gaku sidago o taungu 127-ka.

² So kagena o Kiryat-Arba (eko o Hebron) o doku moi o Kanaan ma tona ma rabaka, de muna mosoneka. Komagena so ma ngale o Abraham ma pedeka ami sone magegena so wododora.

³ So woari dabolo de ma pedeka ami sone ma bake magena wadoha kasi, de una wotagi o Het ma nyawaka, ona gena o doku magena ka igogoge de una onaka wotemo,

⁴ “Baba-baba, ngohi manena o nyawa moi totatagino de ngini nia sidongirabaka togoge. Kodo! Nako daloha de nia tona sutu nihike la ngohi taija ma ngale ai pedeka aku tomipoosu o tona magenaku.”

⁵ De ona itemo,

⁶ “Baba igogou, ngomi gena minisigise daloha ngonaka. Ngona manena o roriri moi nococawaro to ngomi mia sidongirabaka bai! So, baba, hino la ngona ani pedeka nomipoosu to ngomi mia boosu daloloha moi gena miaka lo daboloka. Ma ngale so ani pedeka ami boosu gena ngomi misidailako lo de mia sininga isosanangi.”

⁷ So una wobukuku de wosuba onaka,

⁸ de wotemo, “Baba-baba, igogou ma ngale ai pedeka so to ngini nia galusiri gena ngohika, so tanu niriwo de hika nitagi o Zohar ma ngopa o Efronka. De una magena niwigolo

⁹ ma ngale awi aru o Makhpela, kagena awi doro ma dateka gena, una aku wosiija ngohika. De nakoso womode, daloha ilaku wahino kanena la ngini lo nia simaka awi tona ma ija gena asa ngohi tafangu ka totengo, la idadi to ngohi ai tona masirete.”

¹⁰ De o orasi magena o Efron lo womatamiye dede o Het ma bi nyawa imatotolomuno kagena to ona manga dodolomu ma rihoka, ena gena o kota ma ngora ilalamo ma simaka. So kagena o nyawa yadadala manga simaka de una wosango so ona lo yangodu iise wotemo,

¹¹ “Baba, to ngohi ai nyawa, de lo ai ria de ai gianongoru masirete, ona yangodu aku iise sidago lo yanako de isimote daloha gena, igogou ai tona, de ai doro, de lo ai aru asa ngohi tonihike ngonaka, la ma ngale ani pedeka gena aku kagena nomipoosu.”

¹² Mutuwade una o Abraham o Het ma bi nyawa manga simaka wobukuku de awi suba watide ona magenaka.

¹³ So yadadala manga simaka gena o Efronka wotemo, “Kodo! Tanu to ngohi ai sininga ma dupa de ai gogolo manena nosimote daloha. Ena gena, daloha ilaku de ani tona natotoroka magena tanu ngohi taija. De tanu o orasi manena dabolo de ma ija tafanguka gena ngona nadehe daloha, la aku kagena ai pedeka tomipoosu.”

¹⁴ Komagena so o Efron wosango wotemo,

¹⁵ “Ce! O tona o riho moi magena, ngaroko ma ija o pipi ilalamo o salaka gena ngai ratu iha, magena dadoohawa, de idadi maro o ngale moiwa ngona dede ngohika. So, baba, hika tonisimote la ani pedeka kagena nomipoosu.”

^16-18 So o Efron awi demo gena una o Abraham wodupa wosimote so gila-gila una awi pipi waeto ma dala maro kiaka o Efron wapepetoka. Ena gena, o pipi salaka o ratu iha imamote de o nyawa imasiiija manga dudugaka isituga. So o orasi magena dabolo una gena o Het ma nyawa yadadala manga simaka de o pipi ilamo magena wahike o Efronka, ma ngale ona lo aku yakelelo de yanako igogou o tona magena idadi to una awi tona dabolo. Komagena o Efron awi tona o riho moi o Makhpela o Mamre (eko lo o Hebron) ma dateka, o wange ma nyonyieka o Kanaan ma tonaka gena, idadi to Abraham awi tona masireteka, o tona magena dangodu de ma rabaka, kagena de ma aru komagena lo o doro, de ma joro-joro, de lo o bi gota dangodu.

¹⁹ Daboloku de ma pedeka muna magena kagena o Makhpela ma Aruka womipoosuka,

²⁰ gena o Het ma nyawa manga tona waija so idadi ka to una awi tona de awi aru masireteka.