Dodadi 21 - O GIKIMOI AWI JAJI ma BUKU

O Ishak wisibuo

¹ Ipasaka, de o Jou Awi laha ongo Saraka gena womisidumu, maro o kia Una wojaji idomaka, so Awi jaji magena asa wosiganapu.

^2-5 Ma orasi gena he yaadoka, maro o Gikimoi wododedemo o Abrahamka, so o Abraham wiperekika, de ma pedeka ongo Sara gena mitilibu de ma roka awi umuru he o taungu ratu moika asa mosibuo o ngopa yanau moi. So ma baba awi ngopa una magena wisironga o Ishak. De ma ngale wamote o Gikimoi Awi bobita wosusuloka, so ma orasi awi ngopa ma umuru o wange tupaange yaadoka de gila-gila una magena wisuna.

^6-7 De ma pedeka motemo, “We! O Gikimoi aku waaka so ngohi inali de tomore sidago lo todohe. Sababu naguuna eko nagumuna o wange manena de ai rokaka itemo, igogou ngohi ai ngopa tasusu. Duma idadi komagena so ngohi lo aku topuo, ngaroko ai roka gena igogou wiperekika. So o nyawa yangodu iise de yananako o hali idadadi gena, ngohi dede ona asa minali de mimore sidago lo midohe kali.” (Nako o bahasa Ibrani ma demo “Ishak” gena ma beto he imatero de o demo moi de ma ngale gena modohe.)

Ongo Hagar de o Ismael yaginihi so isupu

⁸ Ipasaka, de manga ngopa magena wilamo so isolano wisitagi, o wange magena bato de ma baba o rarame ilalamo gena waaka ma ngale ma ngopa wisirarame.

⁹ Duma una de to ona manga gilalo ongo Hagar, muna o Mesir ma nyawa, to ona manga ngopa o Ismael gena iuule de o Ishak ongo Sara ma ngopa. De ma pedeka gena makelelo ona magena,

¹⁰ so motemo ma rokaka, “Naginihi o gilalo moleleani mosupu nanga tahuno de to muna ami ngopa una magena. Upa sidago to muna ami ngopa de ani pusaka lo wamake, ka cawali ai ngopa o Ishak gena aku wamake de wakuasa.”

¹¹ Duma ma roka de ma pedeka ami gogolo magena wosanangiwa de lo awi sininga dasiri, sababu o Ismael lo to una awi ngopa masirete.

¹² So o Gikimoi wotemo, “Abraham, ma ngale ani gilalo moleleani ani tahuka de to muna ami ngopa magena, upa lo ngona nohawateri so namote bato ani pedeka ami dupa. Sababu de ma ngeko o Ishak so ngona ani ngopa de ani dano ma duhutu asa namake maro kia tonijajajika.

¹³ De komagena lo done asa ongo Hagar ami ngopaku lo kanaga awi ngopa de awi dano gena yadala sidago ona lo aku idadi o bangsa moi, sababu una lo to ngona ani ngopa masirete.”

¹⁴ So ma langino de ka o goginita nosi, de o Abraham o ino de o ake ma ngihi o kahino isiaaka gena ongo Hagar ami belekaku wahado ma ngale to ona manga maru. Kagena de una awi ngopa o Ismael una magena womihike ongo Hagarka, de womisulo o ngopedeka muna magena motagi. Imaaka komagena so o gilalo muna magena ongo Hagar momajoboka, de motatagi mokahika o Bersyeba ma tona ibobeleu ma rabaka.

¹⁵ Ma orasi manga ake damataka, de muna ami ngopa magena o ngangaru ma litimika mowitaru de mowihadoku.

¹⁶ So to muna ami ngopa mowitinga nagala o meter o ratu moika, de ami sininga ma rabaka itemo, “Ngohi gena toholu ai ngopa wosone de towinanano.” Dabolo de muna moari mosodu-sodu.

¹⁷ Kagena de ma ngopa awi gari ma ili magena asa o Gikimoi woise so o dipaku Awi malaikat wobicara ma awaka wotemo, “He, Hagar! Dadoohaso nimodo komagena. Ani ngopa awi gari gena o Gikimoi asa woiseka.

¹⁸ So notagi la nahika ani ngopa nowipapa de nowibaja la upa he woari. Sababu ngohi asa taaka la awi ngopa de awi danoku asa yadala sidago idadadi o bangsa moi.”

¹⁹ Dabolo de o Gikimoi waaka so ngaroko ma awa kagena o tona ibobeleu ma rabaka, duma aku makelelo igogou kanaga o sumu moi. So muna motagi ami ake ma ngihi o haiwani ma kahino magena maaho so kugena moguse sidago lo iwedo de asa ami ngopa mowihike la waudo.

²⁰ So o Gikimoi asa kanaga dede ami ngopa o Ismael una magena. O Paran ma tona ibobeleuka kagena wogoge de sidago lo una wilamo. Una gena wocawaro o sihode wosisari so awi manara gena ka wodidiha moi.

²¹ De ma awa gena mowisimodoka de o jojaru moi o Mesirka ma nyawa.

O Abraham de ma kolano Abimelekh imarijaji

²² De o orasi magena lo kagena o Abraham una magenaka ma kolano o Abimelekh de lo awi prajurit manga kapita moi o Pikhol ona yahino gena itemo, “Igogou, o Gikimoi kanaga dede ngona so ngona gena o moi-moi aku naaka de dangodu gena ka idadi daloha.

²³ So o Gikimoi Awi simaka de bilasu ngona nosasi gena igogou ngona gena, ma deka mia tonaka nogoge, de upa lo nomiaka datorou ngomi manenaka bai ngohika, bai ai ngopa-ngopaka, de bai lo ai danoku. Imatero maro to ngohi ai sininga ma loha ngonaka gena he idomaka, naaka komagena ma meta ngohika.”

²⁴ So kagena de o Abraham wotemo, “Ngohi tosasi o Gikimoi Awi simaka.

²⁵ Ngaroko komagena, duma tonisingangasu kanaga to ngona ani nyawa imomanara gena ai sumu moi yakooraka.”

²⁶ So ma kolano wotemo, “Ce! Ma ngale ai nyawa imomanara yaaka komagena naguuna gena ngohi tanakowa, de magena igogou o orasi kangano manena de asa ka toise.”

²⁷ So o Abraham wadehe o duba de o sapi ngai muruo naga de wihike ma kolanoka de asa ona yasinoto imarijaji.

²⁸ Duma una lo wadehe kali, de watinga o duba ma bolu ma rabano gena o duba ma ngopa ma bedeka ngai tumudingi.

²⁹ So ma kolano wisano unaka wotemo, “Dede! Ani duba ma ngopa ma bedeka ngai tumudingi natitingaka gena de ma ngale o kia.”

³⁰ Kagena de una wotemo, “Tuan, o duba ma ngopa ma bedeka ngai tumudingi magena tanu nadehe daloha maro o nonako moi, gena igogou o sumu magegena ngohi masirete tapuawe.”

³¹ Ona imarijaji komagena so o riho magena isironga o Bersyeba (gena ma ngale o sumu tumudingi eko lo o jaji ma sumu).

³² So kagena o Bersyebaka de ona imarijaji dabolo de ma kolano de lo awi kapita ona magena iliho o Filistin ma dokuka ikahika.

³³ De una o Abraham gena o gota moi ma ronga tamariska o hutu moi wodato o Bersyebaka, so ma ngale o Jou Una o Gikimoi Wokokakali gena wisuba.

³⁴ So daboloku de una magena wogoge ma dekano o Filistin ma nyawa manga dokuka.