Dodadi 20 - O GIKIMOI AWI JAJI ma BUKU

O Abraham de o Abimelekh manga jarita

¹ O Abraham kagena o Mamreka de wotagi womatuluru o Tona Negebka, ena gena o tona ibobeleuka, de ma koresaraye wokahie so o Kadesh ma kota de o Syur ma kota ma risoaka de kagena wogoge. Kagena dabolo de wotagi wokahika o Gerar ma kotaka,

² de kagena asa una wotemo igogou ma pedeka ongo Sara gena ka ma bira mononongoru, sababu muna gena miloha poli. So kagena de o Gerar manga kolano awi ronga Abimelekh awi nyawa wasulo ongo Sara mingoso de mingaho unaka.

³ So o putu moiku de o Gikimoi womasimane ma kolano una magena awi doguruga ma rabaka, de wotemo, “Igogou, ngona de ani sala so tahiri bilasu tonifanggali gena ngona done nosone. Sababu o ngopedeka moi kanaga ngona nomideheka, muna magena de ami rokaka.”

⁴ Duma sidago o orasi magena o Abimelekh gena imasikiidu waasi de ongo Sara, so ma kolano una magena wotemo, “Ya Jou, ngohi ai sala ihiwa! So ngohi gena tanu upa noisibodito.

⁵ Sababu o Abraham masirete lo wotemo, o ngopedeka magena ka to una awi bira mononongoruku de muna lo motemo komagena bai! Igogou, muna gena ngohi tomideheka, duma ai sininga ma rabaka gena itemo, o kia taakaka, gena itotiai so ai sala lo ihiwa.”

⁶ So awi doguruga ma rabaka gena o Gikimoi wasango wotemo kali, “Magena Ngohi tanako itiai de igogou, ngona naaka gena ani sininga ma rabaka itemo itotiai so ani sala lo ihiwa. Komagena so Ngohi tonifati so yaakuwa de o ngopedeka muna magena nimasikiidu. Upa sidago ngona gena o sala noigaka Ngohika.

⁷ So o orasi manena dabolo ngona notagi bato o ngopedeka muna magena nomisigiliho ma rokaka. De ma roka una magena o nabi moi, so aku una wonisisumbayang la ngona upa nosone. Sababu nakoso nomisigilihowa unaka de, kodo, ngona de ani nyawa yangodu lo bilasu nisone bai!”

⁸ Ma langino de o wange lo asa ibao, de cai-cai ma kolano o Abimelekh awi nyawa imomanara o kadato ma rabaka yangodu waaso yahino imatolomu de awi doguruga gena wasingangasu onaka. So ona yangodu asa o Gikimoi wimodo imasidotirineku.

⁹ Daboloku de ma kolano gena o Abraham iwiaso de iwisano wotemo, “Awadede! So ngona nomiaka ngomi komanena. Ce! Ai sala o kia ngonaka, sidago lo o bodito nomihike ngohika. Tagogou ma loha ani manara magena dasiri poli noisipake ngohika.

¹⁰ So dadoohaso ani manara datotorou de noisipake ngohika.”

¹¹ O Abraham wotemo, “Kodo, ngohi isala. Tatagapi nagala o nyawa o doku manena ma rabaka gena o Gikimoi wisusuba gena yahiwa. So upa sidago ai pedeka o nyawa minyafusu de ngohi gena itoomaka.

¹² De ngaroko lo mia awa gena kanaga iregu so muna lo ami awa o nyawa moi komagena lo to ngohi ai awa gena o nyawa moili, duma igogou ngomi gena o baba ka ka moi. So igogou muna magena to ngohi ai bira masirete gena komagena, de ma duuruka aku ngomi mimamodoka.

¹³ Mutuwade ma orasi o Gikimoi woiaso de woisulo ngohi bilasu ai baba awi tahuno todongosa de totagi o bi doku takiloli maro o nyawa itatagino moi, de ai pedeka tomidedemo, ‘Hika ani laha moi noisidumu ngohino gena nanga dodagi ma rabaka, la o nyawa nagoona bato pomakamake de, kodo, ka cawali ngona notemo magena ai hira woriria.’ ”

¹⁴ Daboloku de ma kolano ongo Sara womisigiliho ma rokaka. De o orasi magena lo ma ngale o Gikimoi wisihoromati gena una wahike lo o duba, de o sapi, komagena lo o nyawa yanau de lo o ngopedeka la idadi o Abraham awi gilalo awi tahuka imomanara.

¹⁵ De wotemo, “Manena to ngohi ai doku de ai tona, so maha dede ngona ani dupa kiaka nahiri la kagena aku nogoge dede ngomi.”

¹⁶ De lo ongo Saraka wotemo, “Ani hira woririaka gena o pipi o salaka ilalamo o cala moi towihikeka, la magena maro ma nonako moi o bi nyawa yangoduka, gena yasinako igogou ngona ani sala moi lo ihiwa.”

¹⁷ Dabolo de o Abraham wosumbayang de wogolo o Gikimoika, so o Gikimoi asa ma kolano wisilohaka, komagena lo ma pedeka de lo awi bi gilalo o ngopedeka awi kadatoka yomomanara yangodu wasiloha.

¹⁸ Sababu ongo Sara ma kolano womingahoka, so ma orasi magena ma ngale o sitiai moi unaka gena, o ngopedeka awi kadato ma rabaka magena yangodu o Jou waaka so he ipuo kawa. So ma ngale magegena asa wasilohaka, sidago ona magena lo aku ipuo kali.