Dodadi 19 - O GIKIMOI AWI JAJI ma BUKU

O Sodom de o Gomora ma boditono o Lot wisisupu

¹ Kaputuka de ona yasinoto magena imasidiado o Sodom ma kotaka. Kanaga o kota ma ngora ma simaka o Abraham awi nongoru ma ngopa awi ronga o Lot una kagena womatamiye. So de wakelelo ona yasinoto magena de una womaoko so wotagi wasibubusu. So kagena de una wobukuku wosuba onaka,

² de lo wotemo, “Baba-baba, nako yaaku de tanu nitulu kasi ngohi tinihoromati ai tahuka. Kanena aku nia dohu niatiodo, de lo nimaidu, la ilangi o goginitano de asa to ngini nia dodagi niadofa kali.” Duma ona itemo, “Dadoohawa. Dohaka bato la ngomi putu manena o kota manena ma lapanganka mimasidodogu.”

³ Kagena de una wabaja wagogou so dabolo de aku ona wangaho wasingosa awi tahuka. De una wosulo la awi gilalo ileleani o ino yasakahi, de lo o roti isijai-jai yaosu so ona magena lo yoodoka.

⁴ Yoodoka de ona magena imaidu waasi, de kagena awi tahuka o Sodom ma bi nyawa hitilahi ma ronga so yanau yangodu, bai o gohiduuru de bai o bobereki gena, yahino yasigilolika.

⁵ O nyawa ona magena imatoore de itemo, “He, Lot! O nyawa kangano yahino ani tahuka imasidododogu gena, kiaka yahika. Hika nasisupuno, la aku ngomi yanau de yanau mimatekesikiidu kasi.”

⁶ So una wosupu awi tahuno, de awi tahu ma ngora waperesuka,

⁷ de onaka wotemo, “Baba-baba, ngini gena ai dodiao so togolo tagogou nginika. Kodo! Upa lo o dorou moi niaaka o nyawa ona manenaka bai!

⁸ Hika la ngini niise. Kanaga to ngohi ai ngopa o jojaru yasinoto ona gena de yanau imasikiidu waasi. So ai ngopa ona magena asa tinihike nginika, la dohaka o kia bato to ngini nia nyafusu gena aku niaaka ai ngopaka. Duma ma ngale ai nyawa kanaga ai tahuka igogoge gena, ngohi bilasu tajaga, upa sidago o susa lo yadahe.”

⁹ Duma ona yotemo unaka, “Ce! Ngona gena lo ka o nyawa notatagino, de nodupa bilasu ngomi nomipareta? Taika notagi la upa nomifati. Nakoso noholu, de done ka ngona asa ngomi miniaka foloi dasiri dede o nyawa ona magena bai!” So kagena de gila-gila una wisisosihito ma ngale awi tahu ma ngora yabiau.

¹⁰ Wisisosihito de asa ona yasinoto magena manga gia yatoa so una wilia o tahu ma rabaka wisingosaka, de ma ngora lo yaperesuka.

¹¹ De kagena ona yasinoto yaaka so asa o nyawa yangodu o tahu ma duduka gena he imasigelelo kawa, sidago lo o tahu ma ngora gena ona yangodu he yamake kawa.

¹² Komagena so o nyawa yasinoto magena unaka itemo, “Lot, nakoso kanaga to ngona ani ngopa yanau de o ngopedeka so kanaga de ani modoka, de ani gerdoroa, eko ani tafu de ani hodo, de lo ani ria de ninongoru, eko lo ani awabira igoge o kota manena ma rabaka, hika nangaho la nasisupu ani nyawa ona magena.

¹³ Sababu o kota manena bilasu miasisa. O Jou asa woise dabolo ma ngale o bi nyawa yangodu o kota manena ma rabaka o bi galaki datubuso, so ngomi misinoto manena womisulo miahino o nyawa ona manena miabodito sidago lo miasisa.”

¹⁴ So kagena de una wotagi awi ngopa o ngopedeka yasinoto manga bobaika, de wasulo, “Taika! Nisupu de niloda o kota manena ma rabano. Awalele! O Jou asa wabodito sidago lo wasisa o kota manena de lo ma nyawa yangodu.” Duma manga sininga ma rabaka itemo, “Ce! Nagala una ka wonasangaja bai!”

¹⁵ Ma orasi he yadangade daginita, de ona yasinoto magena unaka itemo, “Taika bai! Hika notagi de ani pedeka de ani ngopa yasinoto la o kota manenano nisupu de niodoloda. Upa sidago o kota manena o Jou wabodito de ngini lo nisone.”

¹⁶ Asa una gena awi akali ibulutuka. Duma o Jou gena Awi edekati una upa wobodito so ona yasinoto gena iwituda, de ma pedeka komagena lo awi ngopa yasinoto so yasisupu o kotano.

¹⁷ Yasisupu o kotano, de gila-gila o malaikat moi gena itemo, “Taika niloda! Upa sidago nisone. Niloda de upa lo nimakiliho nia duduka. De upa lo nimatogu o ponga ma pidoka. Hika idake o talaye niloda la upa ngini nisone bai!”

¹⁸ Duma una gena wotemo, “Kodo, baba! Upa noisulo ngohi o talaye todola.

¹⁹ Igogou, ngona noiriwo daloha ngohika la aku ai rohe isalamati. Duma o tala gena ikuruka poli. Upa sidago kagena taado waasi, de o bodito idahe so tosoneka.

²⁰ He! Hika nomaginano! O doku ma ceceke moi kanaga nia simaka. Aku toloda kagena bai! Tanu noisimaha la ngohi asa kagena tokahika ma ngale ngomi aku misalamati.”

²¹ De o malaikat magena itemo, “Iya, ka daloha. So o doku ma ceceke magena asa ngohi taboditowa de tasisawa.

²² Taika noloda! Nakoso ngona la kagena nomasidiado waasi, de ngohi lo aku waasi o doku manena tosibodito.” (O doku ilolodaka magena o Lot wotemo o doku ma ceceke so isironga o Zoar, ma ngale gena daceke, sidago lo o orasi manena naga.)

²³ Komagena so o wange asa ibao de una o Lot gena o Zoar ma dokuka womasidiadoka.

²⁴ De o Jou wositodokaku o walira de ma uku-ukuka wosimuura o Sodom de o Gomoraku, so yatupuka.

²⁵ Una wosibodito o bi moi-moi dangodu iooho o ponga magena ma pido ma rabaka, so o bi kawasa manga joro-joro yodadato komagena lo o bi nyawa yangodu gena isibodito de o uku.

²⁶ O Lot ma pedeka muna magena mosiningawa o malaikat ma beseso so muna momakiliho ami duduka, de momaginano. So o orasi magena dabolo de, kodo, muna modadi koloko o golingasu moi gena koloko o gasi datotogoika.

²⁷ Ma langino de ka damomarasasi, de o Abraham wotagi kiaka kagunugo una wotorifa o Jou-ka de ona imatekebicaraka.

²⁸ So kagena o riho magenaka de una o Abraham womaginano wogirina de o gubalika, de wakelelo o Sodom de o Gomora ma kota de lo ma ponga ma pidoka, gena o dopo idola koloko o kalero ilalamo moi ma dopo.

²⁹ So ma orasi o Gikimoi o kota sinoto de lo o ponga ma pido magena wasisa, de Una gena o Abraham awi gogolo wosininga so o Lot lo aku wisisupu de wisiloda o bodito ma rabano.

O Lot de awi ngopa o jojaru yasinoto

³⁰ O Lot una magena wimodo o Zoar ma dokuka wogoge so una de awi ngopa o jojaru yasinoto lo imatuluru ikahika o talaka, de ona igoge o tala ma aru moika.

³¹ Ma ngopa o jojaru moriria gena ma nongoruka motemo, “Nanga baba gena he wiperekika, so done o ngopa wamake kawa. De ngone lo nakoso o riho manena ma sigilolino kanaga yanau moi lo yahiwa ma ngale done asa inakawi la aku o ngopa pamake.

³² Hino la ngone nanga baba o dalu powisiudo ma bati widaluka, de asa pomaidu dede una ma ngale ngone o tahu moi gena o ngopa aku pamake.”

³³ So o putu magena de ona manga baba o dalu wisiudo so widaluka, de ma ngopa moriria gena imasikiiduka, duma manga baba gena widalu poli so womanakowa o kia yaaka o putu magena.

³⁴ Ma langino moriria gena ma nongoruka motemo, “Kaputuka ngohi tomaiduka de nanga baba bai! So maha sutusi daputuku de ngone o dalu powisiudo ma bati widalu kali, la ma ngale de ngona asa nimasikiidu kali. Idadi komagena so done asa ngone o ngopa pamake.”

³⁵ O putu magena ona manga baba wisiudo sidago lo widalu kali, so de ma ngopa mononongoruku imasikiidu kali. Duma una gena widalu poli so womanakowa o kia yaaka o putu magena.

³⁶ So kagena de o Lot awi ngopa o jojaru yasinoto magena yatilibu gena ma sihino manga babano.

³⁷ Ma ngopa moriria mosibuo o ngopa yanau moi so mowisironga o Moab. (Nako o bahasa Ibrani ma demo “Moab” gena ma beto he imatero de o demo moili de ma ngale gena ai babano.) So una magena wodadi o Moabka ma nyawa manga ete de manga topora sidago o orasi manena.

³⁸ Ma ngopa mononongoruku mosibuo gena o ngopa yanau moili so mowisironga gena o Ben-Ami (gena ma ngale ai gianongoru ma ngopa). So una magena wodadi o Amonka ma nyawa manga ete de manga topora sidago o orasi manena.